నల్లుల కాటుతో ప్రాణాలు కోల్పోయిన ఖైదీ.... అమెరికాలో చోటు చేసుకొన్న ఘటన

జైల్లో విచారణ ఖైదీగా ఉన్న ఓ వ్యక్తి నల్లుల కాటుతో ప్రాణాలు కోల్పోచిప దారుణమైన ఈ ఘటన అమెరికాలోని అట్లాంటా జైలులో చోటుచేసుకుంది. అతడ్ని ఉంచిన గదిలోని కీటకాలు, నల్లుల కారణంగా చనిపోయాడని బాధితుడి కుటుంబ సభ్యులు ఆరోపిస్తున్నారు. దీనిపై తక్షణమే విచారణ జరిపించాలని డిమాండ్ చేసిన బాధితుడి కుటుంబం.. వెంటనే జైలును మూసివేసి, వేరే ప్రాంతంలో ఏర్పాటు చేయాలని కోరుతున్నట్టు న్యూయార్క్‌ పోస్టు ఓ కథనం వెల్లడించింది. పోలీసులు తెలిపిన వివరాల ప్రకారం.. లాష్యాన్ థామ్సన్ అనే 35 ఏళ్ల యువకుడ్ని అక్రమంగా బ్యాటరీ ఛార్జింగ్‌ చేస్తున్నడనే ఆరోపణలతో అట్లాంటా పోలీసులు గత ఏడాది జూన్‌ 12న అరెస్టు చేశారు.

విచారణ కోసం అతడ్ని ఫుల్టాన్‌ కౌంటీ జైలుకు తరలించారు. థామ్సన్ మానసిక స్థితి సరిగా లేదని గుర్తించిన అధికారులు.. వైద్య నిపుణుడితో చికిత్స అందించారు. అయితే, సెప్టెంబరు 13న అతడు సెల్‌లో అచేతనంగా పడి ఉన్నట్లు గమనించిన జైలు అధికారులు సీపీఆర్‌ చేశారు. శరీరం స్పందించకపోవడంతో మృతి చెందినట్లు ధ్రువీకరించారు. దీనిపై బాధితుడి కుటుంబం తీవ్ర ఆగ్రహం వ్యక్తం చేస్తోంది. ప్రాణాలతో తీసుకెళ్లి శవంగా పంపారని, అధికారులు సరైన సమయంలో స్పందించి ఉంటే తమ బిడ్డ బతికేవాడని కన్నీటిపర్యంతమయ్యింది.

‘ప్రాణాలతో జైలుకు తీసుకెళ్లి.. మూడు నెలల తర్వాత మృతదేహాన్ని అప్పగించారు.. సరైన సమయంలో అధికారులు స్పందించి ఉంటే థామ్సన్‌ ప్రాణాలతో ఉండేవాడు.. జైలులో ఖైదీలతోపాటు వారిి ప్రాణాలకు హానికలిగించే కీటకాలు, నల్లులను కూడా ఉంచుతారా? నిర్లక్ష్యంగా వ్యవహరించిన జైలు అధికారులు అక్కడ పని చేసేందుకు అనర్హులు.. వారిని వెంటనే విధుల నుంచి తప్పించి, మరణానికి బాధ్యులు ఎవరో తేల్చాలి’’ అని బాధితుడి కుటుంబం తరఫు న్యాయవాది మైఖేల్ డి హర్పర్ డిమాండ్‌ చేశారు.

ఫుల్టాన్‌ జైలులో పరిశుభ్రత లోపించడమే థామ్సన్‌ మృతికి కారణమని కోర్టు దృష్టికి తీసుకెళ్లారు. థాంప్సన్ ఆరోగ్యం క్షీణిస్తున్నట్లు జైలు సిబ్బంది గమనించారని, అయితే అతడికి సహాయం చేయడానికి ప్రయత్నించలేదని ఆరోపించారు. జైలు లోపల ఫోటోలు థాంప్సన్ శరీరం, అతడి సెల్‌లో భయంకరమైన, అపరిశుభ్రమైన పరిస్థితులను చూపుతాయని, దుమ్ము ధూళి శిధిలాలతో నిండి ఉందని ఆరోపించారు.

మరోవైపు, థామ్సన్ రక్తనమూనాలను పరీక్షించిన వైద్యులు.. అతడిపై ఎలాంటి భౌతిక దాడి జరగలేదని నిర్ధారించారు. అయితే, బాధితుడి రక్తంలో నల్లుల రక్తనమూనాలు ఉన్నాయని, అవి తీవ్రంగా కుట్టిన కారణంగా ఇన్ఫెక్షన్ చేరడంతో మరణించి ఉంటాడని అభిప్రాయపడ్డారు. మృతికి గల స్పష్టమైన కారణాలను మాత్రం వెల్లడించలేదు. కోర్టు ఆదేశాల మేరకు దీనిపై పూర్తి స్థాయిలో దర్యాప్తు చేపడుతున్నట్లు అట్లాంటా పోలీసులు వెల్లడించారు. అలాగే, జైలులో కీటకాలు, నల్లుల నివారణకు 5 లక్షల డాలర్లు ఖర్చుచేస్తున్నట్టు ఫుల్టాన్ కౌంటీ అధికారులు తెలిపారు.