అమెరికాలో షాకింగ్ ఘటన... ఆ ఆరోపణలపై ఆరుగురు మహిళా టీచర్ల అరెస్ట్

విద్యార్థులపై లైంగిక వేధింపులకు పాల్పడ్డారనే ఆరోపణలపై రెండు రోజుల వ్యవధిలోనే ఆరుగురు మహిళా ఉపాధ్యాయులను అరెస్ట్ చేయడంతో అమెరికాలో అలజడి నెలకొంది. కెంటకీ రాష్ట్రంలోని డాన్‌విల్లేకు చెందిన 38 ఏళ్ల ఎలెన్ షెల్‌పై థర్డ్ డిగ్రీ అత్యాచారానికి పాల్పడినట్టు కేసు నమోదయ్యింది. ఈ కేసులో దాఖలు చేసిన క్రిమినల్ ఫిర్యాదు ప్రకారం.. ఇద్దరు 16 ఏళ్ల అబ్బాయిలతో మూడు సందర్భాలలో షెల్ లైంగిక చర్యలకు పాల్పడినట్టు ఆరోపించారు. ఆమెను గురువారం గారార్డ్ కౌంటీ జిల్లా కోర్టులో హాజరుపరిచారు.

ఉడ్‌లాన్ ఎలిమెంటరీ స్కూల్‌లో ఉపాధ్యాయ సహాయకురాలిగా పనిచేస్తోన్న షెల్.. దానికి ముందు లాంకాస్టర్ ఎలిమెంటరీ స్కూల్‌లో ఉద్యోగం చేశారు. బాయిల్ కౌంటీ స్కూల్ అధికారులు అరెస్టు గురించి తల్లిదండ్రులకు ఒక లేఖ పంపినట్లు స్థానిక పోర్టల్ నివేదించింది. అరెస్టైన ఉపాధ్యాయురాలిని అడ్మినిస్ట్రేటివ్ సెలవుపై పంపారు. లైంగిక దుష్ప్రవర్తనకు పాల్పడినందుకు కనీసం ఆరు మహిళా ఉపాధ్యాయులను అరెస్ట్ చేసిన కేసులు అమెరికాలో ఇటీవలి రోజుల్లో వెలుగులోకి వచ్చాయి.

అర్కాన్సాస్‌కు చెందిన మహిళా టీచర్ హీథర్ హరే (32) ఫస్ట్ డిగ్రీ అత్యాచారం ఆరోపణలను ఎదుర్కొంటున్నారు. ఓ టీనేజర్‌ విద్యార్ధితో ఆమె లైంగిక సంబంధం పెట్టుకున్నట్టు ఆరోపణలు ఉన్నాయి. ఒకహామాకు చెందిన ఎమిలే హన్‌కాక్ (26)‌ అనే మహిళా టీచర్‌... విద్యార్థితో శారీరక సంబంధం పెట్టుకుందనే ఆరోపణలపై గురువారం అరెస్ట్ చేసినట్టు న్యూయార్క్ పోస్ట్ తెలిపింది.

స్థానిక మీడియా ప్రకారం లింకన్ కౌంటీలోని సబ్‌స్టిట్యూట్ టీచర్ ఎమ్మా డెలానీ హన్‌కాక్‌పై 15 ఏళ్ల విద్యార్థితో అనుచిత సంబంధానికి సంబంధించి అభియోగాలు మోపారు. వెల్‌స్టన్ పబ్లిక్ స్కూల్స్‌లో పనిచేస్తోన్న ఆమె.. క్లాస్ రూమ్‌ను పడక గదిగా మార్చుకుని, లైంగిక చర్యల్లో పాల్గొనట్టు కోర్టు పత్రాలు వెల్లడించాయి. ఇరువురూ స్నాప్‌చాట్‌లో కూడా కమ్యూనికేట్ చేసినట్టు పేర్కొంది.

న్యూయార్క్ పోస్ట్ ప్రకారం.. అయోవాలోని డెస్ మోయిన్స్‌లోని క్యాథలిక్ హైస్కూల్‌లో ఇంగ్లీష్ టీచర్ క్రిస్టెన్ గాంట్(36).. ఒక టీనేజ్ విద్యార్థితో తన స్కూల్ లోపల,వెలుపల ఐదుసార్లు లైంగిక చర్యల్లో పాల్గొన్నారనే ఆరోపణలతో కేసు నమోదయ్యింది. స్థానిక మీడియా ప్రకారం.. జేమ్స్ మాడిసన్ హైస్కూల్‌లో అల్లీహ్ ఖేరద్‌మాండ్ అనే ఉపాధ్యాయురాలు (33) నెలల వ్యవధిలో విద్యార్థితో లైంగిక చర్యల్లో పాల్గొన్నారు.

నిందితురాలు ఖేరద్‌మాండ్ 2016 నుంచి ఫెయిర్‌ఫాక్స్ కౌంటీ స్కూల్స్‌లో లెర్నింగ్ డిజేబుల్టీ టీచర్‌గా పనిచేస్తున్నారు. పెన్సిల్వేనియాకు చెందిన జావెలిన్‌ త్రో మహిళా కోచ్ హన్నా మార్త్ (26).. తన వద్ద శిక్షణ తీసుకుంటోన్న 17 ఏళ్ల బాలుడితో లైంగిక సంబంధం పెట్టుకున్నారు. నార్తాంప్టన్ ఏరియా హైస్కూల్ ట్రాక్ అండ్ ఫీల్డ్ అథ్లెట్‌తో లైంగిక సంబంధం పెట్టుకున్నట్టు గుర్తించిన పోలీసులు.. ఆమెను అరెస్ట్ చేసినట్టు న్యూయార్క్ పోస్ట్ నివేదిక తెలిపింది.