ప్రశాంతిని హత్య చేసినట్లు ఒప్పుకున్న చక్రవర్తి

చిత్తూరుకు చెందిన బ్యూటీ పార్లర్ ప్రశాంతి తానే హత్య చేసినట్లు నింధితుడు చక్రవర్తి ఒప్పుకున్నాడు. పెళ్లికి కుటుంబ సభ్యులు ఒప్పుకోకపోవడంతో చనిపోదామని నిర్ణయించుకున్నామని.. తాను చనిపోతనాంటూ గొంతు, చెతి నరాలు కోసుకున్నట్లు చెప్పాడు. ఆ సమయంలో ప్రశాంతి సైలెంట్‌గా ఉండటంతో గొంతు నులిమి హత్య చేశానని చెప్పాడు. చక్రవర్తి తీవ్ర గాయాలతో ప్రస్తుతం తిరుపతిలోని ఆస్పత్రిలో చికిత్సపొందుతున్నాడు.

చిత్తూరులోని కొండమిట్టలో నాగరాజు స్థానిక తాలుకా పోలీస్‌స్టేషన్‌లో హెడ్‌కానిస్టేబుల్‌గా విధులు నిర్వహిస్తున్నారు. ఆయన రెండో కుమార్తె దుర్గా ప్రశాంతి వేలూరు రోడ్డులోని ఆనంద థియేటర్ దగ్గర పార్లర్‌లో బ్యూటీషియన్‌. ఈ క్రమంలో ప్రశాంతికి తెలంగాణ రాష్ట్రం భద్రాది కొత్తగూడెం జిల్లాకు చెందిన చక్రవర్తితో రెండేళ్ల ఫేస్‌బుక్‌‌లో పరిచయం ఏర్పడినట్లు తెలుస్తోంది. గతంలో అతడు హోటల్స్‌లో చెఫ్‌గా పనిచేశాడు. ప్రశాంతితో పరిచయం తర్వాత చక్రవర్తి తన మకాంను చిత్తూరుకు మార్చేశాడు.

స్థానిక దర్గా కూడలిలో తల్లి ప్రమీల, స్నేహితుడు శశికుమార్‌తో కలిసి మూడు నెలలుగా బ్రెడ్‌ ఆమ్లెట్‌ షాపు నిర్వహిస్తున్నారు. ప్రశాంతిని అప్పుడప్పుడు కలుస్తూ మాట్లాడుతున్నాడు. ఈ క్రమంలో మంగళవారం మధ్యాహ్నం చక్రవర్తి ప్రశాంతి బ్యూటీపార్లర్‌ దగ్గరకు వెళ్లాడు. ఇంతలో ఏం జరిగిందో ఏమో లోపలి నుంచి అలికిడి వినిపించింది.. అనుమానంతో స్థానికులు వెళ్లి లోపలికి వెళ్లి చూశారు.

చక్రవర్తి, ప్రశాంతి పార్లర్‌ లోపల రక్తపు మడుగులో పడి ఉన్నారు. స్థానికులు ఇచ్చిన సమాచారంతో వెంటనే పోలీసులు ఘటనా స్థలానికి చేరుకున్నారు. ప్రశాంతి మృతదేహంపై ఎలాంటి గాయాలు లేవు. చక్రవర్తి గొంతు, చేతులకు గాయాలు ఉన్నాయి. అప్పటికే ప్రశాంతి చనిపోగా.. చక్రవర్తిని వెంటనే ప్రభుత్వ ఆస్పత్రికి తరలించారు. అక్కడి నుంచి మెరుగైన వైద్యం కోసం తిరుపతికి తీసుకెళ్లారు. యువతి డెడ్‌బాడీని పోస్టుమార్టం నిమిత్తం జిల్లా ఆస్పత్రికి తరలించారు. ముందు పోలీసులు అనుమానాస్పద మృతిగా కేసు నమోదు చేశారు. అయితే ఇప్పుడు చక్రవర్తి ప్రశాంతిని చంపినట్లు ఒప్పుకున్నాడు.

ముందు పోలీసులు హత్యనా, ఇద్దరూ కలిసి ఆత్మహత్యాయత్నం చేశారా అనే అనుమానాలు వ్యక్తమయ్యాయి.. చక్రవర్తి చెబితే కానీ క్లారిటీ రాదని భావించారు.. అతడు ఏం జరిగిందో చెప్పడంతో పోలీసులు ఓ అంచనాకు వచ్చారు. ఈ కేసుపై పోలీసులు అధికారికంగా ప్రకటన చేయనున్నారు. మరోవైపు ప్రశాంతి మరణంతో కుటుంబం తీవ్ర విషాదంలో ఉంది. ఈ హత్య ఘటన స్థానికంగా సంచలనంగా మారింది.