ద్వేష రాజకీయాలకు అనుమతించబోం,,,మమతా బెనర్జీ

తృణమూల్ కాంగ్రెస్ అధినేత్రి, పశ్చిమ్ బెంగాల్ ముఖ్యమంత్రి మమతా బెనర్జీ.. బీజేపీపై మరోసారి నిప్పులు చెరిగారు. దేశాన్ని విభజించే విద్వేషపూరిత రాజకీయాలను చేయాలని కొందరు ప్రయత్నం చేస్తున్నారని ఆమె దుయ్యబట్టారు. నా ప్రాణాలనైనా ఇస్తాను కానీ, దేశ విభజనకు అనుమతించబోనని మమతా ఉద్ఘాటించారు. రంజాన్ పండుగను పురస్కరించుకుని కోల్‌కతాలోని రెడ్ రోడ్ వద్ద నిర్వహించిన ఈద్‌లు ఫితర్ నమాజ్‌లో పాల్గొని మమతా ప్రసగించారు. ఈ సందర్భంగా ప్రజలంతా ఏకమై.. 2024 ఎన్నికల్లో బీజేపీని ఓడించాలని ఆమె పిలుపునిచ్చారు. ‘దేశాన్ని విభజించి ద్వేషపూరిత రాజకీయాలు చేయాలని కొందరు ప్రయత్నిస్తున్నారని... నా ప్రాణం ఇవ్వడానికైనా సిద్ధమే కానీ దేశ విభజనను మాత్రం అనుమతించను’ అని దీదీ స్పష్టం చేశారు.

దేశ రాజ్యాంగాన్ని మార్చడానికి బీజేపీ ప్రయత్నిస్తోందని ధ్వజమెత్తారు. పశ్చిమ్ బెంగాల్‌లో ఎన్ఆర్సీ అమలకు అనుమతించే ప్రసక్తేలేదని మమతా బెనర్జీ తేల్చిచెప్పారు. పొరుగు దేశాల నుంచి వచ్చిన మైనారిటీలకు భారత పౌరసత్వం కల్పించే జాతీయ పౌర రిజిస్టర్, పౌరసత్వ సవరణ చట్టం అవసరం లేదని, ఉన్న పౌరసత్వ రికార్డులు, చట్టాలు సరిపోతాయని టీఎంసీ వాదిస్తోంది. పాక్, బంగ్లాదేశ్, అఫ్గన్ దేశాల నుంచి వలస వచ్చిన హిందువులు, సిక్కులు, బౌద్ధులకు మాత్రమే భారత పౌరసత్వం కల్పించేలా పౌరసత్వ చట్టాన్ని కేంద్రం సవరించడాన్ని తీవ్రంగా వ్యతిరేకించింది.

‘‘ ధనబలం (రాజకీయ ప్రత్యర్థుల), కేంద్ర దర్యాప్తు సంస్థలతో (రాజకీయ ఉద్దేశంతో టీఎంసీని టార్గెట్ చేశారనేది ఆరోపణ) పోరాడటానికి నేను సిద్ధంగా ఉన్నాను.. కానీ నేను తల వంచను.. మరో ఏడాదిలో మన దేశంలో ఎవరు అధికారంలోకి రావాలో నిర్ణయించే ఎన్నికలు జరగనున్నాయి.. విభజన శక్తులకు వ్యతిరేకంగా ఐక్యంగా పోరాడతామని వాగ్దానం చేద్దాం.. వచ్చే ఎన్నికల్లో మనమందరం కలిసి వారికి వ్యతిరేకంగా ఓటు వేస్తామని ప్రతిజ్ఞ‌ చేద్దాం... ప్రజాస్వామ్యాన్ని పరిరక్షించడంలో విఫలమైతే అంతా అయిపోతుంది’’ అని బెంగాల్ సీఎం పిలుపునిచ్చారు."