మన భావజాలాన్ని కలుషితం చేసేందుకు కొన్ని శక్తుల కుట్ర

పార్టీ శ్రేణులకు జనసేన అధినేత పవన్ కళ్యాణ్ పలు సూచనలు చేశారు. ఆంధ్రప్రదేశ్‌లో జనసైనికులు అప్రమత్తంగా ఉండాలి.. ఎవరైనా మాట్లాడేముందు వాస్తవాలను నిర్ధారించుకోవాలని పవన్‌ కళ్యాణ్‌ సూచించారు. ఈ మేరకు జనసేన నాయకులు, వీరమహిళలు, జనసైనికులకు సోమవారం పవన్ కళ్యాణ్ బహిరంగ లేఖ రాశారు. ఆంధ్రప్రదేశ్‌ రాష్ట్ర అభివృద్ధి, ప్రజా శ్రేయస్సు కోసం మనం శ్రమిస్తున్న తరుణంలో మన దృష్టి మళ్లించేందుకు, భావజాలాన్ని కలుషితం చేసేందుకు కొన్ని శక్తులు నిరంతరం పనిచేస్తున్నాయని ఆందోళన వ్యక్తం చేశారు.

జనసేన పార్టీ పట్ల ప్రజలకు ఉన్న సానుకూల దృక్పథాన్ని దెబ్బతీసే కల్పిత సమాచారాన్ని మన శ్రేణులకు చేర్చే కుట్రలకు పాల్పడుతున్నట్లు విశ్వసనీయంగా సమాచారం ఉందని పవన్ కళ్యాణ్ పేర్కొన్నారు. వాటిని మనం చేసుకుని పార్టీ నాయకులు, శ్రేణులు ముందుకు వెళ్లాల్సిన అవసరం ఉంది. అందువల్ల పార్టీలోని ప్రతి ఒక్కరూ అప్రమత్తంగా ఉండాలన్నారు.

ప్రతి విమర్శలు, తీవ్రమైన ఆర్థిక నేరాల గురించి మాట్లాడాల్సి వచ్చినపుడు ముందుగా పార్టీ రాజకీయ వ్యవహారాల కమిటీ దృష్టికి తీసుకెళ్లాలని పవన్ కళ్యాణ్ సూచించారు. వారి సూచనలు, సలహా మేరకే మాట్లాడాలన్నారు. పార్టీలోని నాయకులు, వీర మహిళలు, జనసైనికులు మాట్లాడే ప్రతి మాట పార్టీపై ప్రభావం చూపుతుందని.. అందుకే పార్టీలోని ప్రతి ఒక్కరూ అప్రమత్తంగా ఉంటూ మాట్లాడే ముందు వాస్తవాలను నిర్ధారించుకోవాలని కోరారు. స్థాయి, తీవ్రత హద్దులు దాటినట్లు సభ్య సమాజం భావించని విధంగా మన మాటలు ఉండాలన్నారు.

అలాగే, ఒక వ్యక్తి గురించి మాట్లాడే సమయంలో అకారణంగా వారి కుటుంబ సభ్యుల పేర్లను ప్రస్తావించవద్దని పవన్ కళ్యాణ్ సూచించారు. ఆధారాలు లేకుండా నేరారోపణలు చేయొద్దని.. అది పార్టీకి, సమాజానికి మంచిది కాదన్నారు. ‘‘నన్ను విమర్శించే వారికి, వ్యక్తిగతంగా దూషించే వారికి బదులు చెప్పే సమయంలో నేను చాలా అప్రమత్తంగా ఉంటానన్న సంగతి మీ అందరికీ తెలిసిందే. ప్రతి అక్షరాన్ని, ప్రతి మాటను బేరీజు వేసుకుంటూ హద్దులు దాటకుండానే కొంత మేరకు తగ్గి బదులు చెబుతాను. ఎందుకంటే మన నుంచి వచ్చే ప్రతి మాటకు అంత బలం ఉంటుంది.. ఆ బలం అపసవ్యంగా మారకూడదు.’’ అని పవన్ కళ్యాణ్ అన్నారు

ఇక, సరైన ధ్రువపత్రాలు లేకుండా ఎవరిపైనా ఆర్థిక నేరారోపణలు చేయొద్దని పవన్ కళ్యాణ్ సూచించారు. మీడియాలో వచ్చిందనో.. ఎవరో మాట్లాడారనో నిర్ధారణ కానీ అంశాలపై చెప్పొద్దన్నారు. అలాగే, పొత్తులపై సోషల్‌ మీడియాలో వచ్చే సమాచారం ఆధారంగా ఎట్టిపరిస్థితుల్లోనూ మాట్లాడవద్దని పవన్ కళ్యాణ్ సూచించారు. ఈ విషయంలో మేలు చేసే నిర్ణయం తానే స్వయంగా తీసుకుంటానని పునరుద్ఘాటించారు. సయోధ్యగా ఉన్న రాజకీయపక్షాల్లో చిన్నా చితకా నాయకులు తమపై ఏమైనా విమర్శలు చేస్తే వాటిని ఆ నాయకుడి వ్యక్తిగత విమర్శలుగా భావించాలని.. వాటిని ఆయా పార్టీలకు ఆపాదించవద్దని పవన్‌ కళ్యా బహిరంగ లేఖలో పేర్కొన్నారు.