పాకిస్థాన్ ఆయుధ డిపోలో రెండు భారీ పేలుళ్లు,,,తీవ్రతకు కుప్పకూలిన పోలీస్ స్టేషన్ భవనం

పాకిస్థాన్‌లోని ఓ ఆయుధ డిపోలో సోమవారం రాత్రి భారీ పేలుళ్లు సంభవించాయి. వాయువ్య పాకిస్థాన్‌లోని ఉగ్రవాద నిరోధక మందుగుండు సామాగ్రి డిపోలో పేలుళ్లు చోటుచేసుకోగా.. ఈ ఘటనలో కనీసం 13 మంది మృతి చెందారు. మరో 50 మందికి పైగా గాయపడినట్టు పోలీసులు తెలిపారు. ప్రావిన్షియల్ పోలీసు చీఫ్ అక్తర్ హయత్ మాట్లాడుతూ.. వాయువ్య స్వాత్ లోయలోని ఉగ్రవాద నిరోధక కార్యాలయంలో పేలుళ్లు సంభవించాయని వెల్లడించారు. పేలుళ్లు జరిగిన ప్రదేశం 2009లో సైనిక ఆపరేషన్‌‌కు ముందు ఇస్లామిక్ ఉగ్రవాదులు నియంత్రణలో చాలాకాలం ఉందని చెప్పారు.

ఈ ఘటనకు షార్ట్ సర్క్యూట్ కారణమని అధికారులు భావిస్తున్నారు. ‘విద్యుత్ షార్ట్ సర్క్యూట్ వల్ల కావచ్చు. బయటి నుంచి జరిగిన దాడికి సంబంధించి ఇప్పటివరకు ఎలాంటి ఆధారాలు లభించలేదు’ అని పోలీస్ అధికార ప్రతినిది ఓ ప్రకటన వెలువరించారు. వేర్పాటువాదం బలంగా ఉన్న స్వాత్ లోయలో పోలీసులు, తీవ్రవాద వ్యతిరేక దళాలు ఉనికి గణనీయంగా ఉంది. 2018లో అఫ్గన్ వైమానిక దాడిలో హతమైన పాకిస్థాన్ తాలిబన్ మాజీ చీఫ్ ముల్లా ఫజులుల్లా, ఉగ్రవాదుల కాల్పుల్లో గాయపడిన నోబెల్ గ్రహీత మలాలా యూసఫ్‌జాయ్‌లు ఈ ప్రాంతానికి చెందినవారే.

ఇదిలావుంటే పేలుళ్లకు సంబంధించిన ఇతర కోణాలపై దర్యాప్తు జరుపుతున్నట్లు అధికార ప్రతినిధి తెలిపారు. ఈ పేలుళ్లలో మరణించిన వారిలో ఎక్కువ మంది ఉగ్రవాద నిరోధక పోలీస్ అధికారులేనని, భవనం పక్కనే వెళ్తున్న ఒక మహిళ, ఆమె బిడ్డ కూడా మరణించారని హయత్ చెప్పారు. ఈ పేలుళ్లు ఆత్మాహుతి దాడి లేదా ఉగ్రవాద చర్యగా కనిపించడం లేదని ఉగ్రవాద నిరోధక విభాగం ప్రాంతీయ చీఫ్ సోహైల్ ఖలీద్ మీడియాతో అన్నారు.

‘మా వద్ద భారీ మొత్తంలో ఆయుధాలు ఉన్న దుకాణం ఉంది.. కొంత అజాగ్రత్త కారణంగా దానిలో పేలుడు సంభవించవచ్చని మేము ఇప్పటివరకు నమ్ముతున్నాం.. ఈ విషయంలో మేము మా ఎంపికలన్నింటినీ పరిశీలిస్తున్నాం..’ అని పేర్కొన్నారు. కాగా, గాయాలతో చాలా మంది చికిత్స పొందుతున్నారని, వారిలో కొందరి పరిస్థితి విషమంగా ఉందని స్థానిక ఆస్పత్రి వైద్యులు వెల్లడించారు.