ఉద్యోగాల పేరుతో డ్రగ్స్ ఇచ్చి కొరియన్ బాధితులపై అత్యాచారాలు

ఉద్యోగాల పేరుతో యువతులపై అత్యాచారాలకు పాల్పడిన కేసులో ఆస్ట్రేలియాలోని భారత సంతతికి చెందిన ప్రముఖ వ్యక్తిని కోర్టు దోషిగా నిర్ధారించింది. ఇటీవలి కాలంలో సిడ్నీ చరిత్రలోనే ‘వరస్ట్ రేపిస్ట్‌’గా బాలేశ్ దన్‌ఖర్‌ను కోర్టు అభివర్ణించింది. రాజకీయాలతో అనుబంధం ఉన్న నిందితుడు.. ఉద్యోగ ప్రకటనలతో ఐదుగురు కొరియన్ మహిళలకు ఎర వేసి, డ్రగ్స్‌ ఇచ్చి అత్యంత క్రూరమైన దాడులకు పాల్పడినట్టు సిడ్నీ డౌనింగ్ సెంటర్‌ డిస్ట్రిక్ట్ కోర్ట్ జ్యూరీ సోమవారం నిర్దారణకు వచ్చినట్టు సిడ్నీ మార్నింగ్ హెరాల్డ్ పత్రిక పేర్కొంది.

నిందితుడ్ని ‘ఓవర్సీస్ ఫ్రెండ్స్ ఆఫ్ బీజేపీ’ మాజీ చీఫ్ అని కూడా ఆ పత్రిక తెలిపింది. మహిళలపై లైంగిక దాడులకు సంబంధించిన దృశ్యాలను నిందితుడు బెడ్ పక్కనే ఉన్న సీక్రెట్ కెమెరాలు, ఫోన్‌లో రికార్డు చేసినట్టు వెల్లడించింది. నిందితుడిపై నమోదైన 39 ఆరోపణల్లోనూ దోషిగా తేలాడు. తనకు బెయిల్‌ మంజూరు చేయాలని ధన్‌ఖర్ కోరగా.. న్యాయమూర్తి నిరాకరించారు. వచ్చే నెలకు విచారణ వాయిదా వేసిన న్యాయస్థానం.. శిక్షను ఇంకా ఖరారు చేయలేదు.

వైవాహిక జీవితం సంతృప్తికరంగా లేకపోవడంతో ఒంటరితనం వల్ల తాను మహిళలతో సంబంధాలు పెట్టుకున్నానని ధన్‌ఖర్ తెలిపాడు. ఈ కేసులో చట్టపరమైన రక్షణ కోసం అతడు ఆస్తులను అమ్ముకున్నాడు. ఇతర మహిళలతో ధన్‌ఖర్ గడుపుతోన్న డజన్ల కొద్దీ వీడియోలను 2018లో పోలీసులు గుర్తించారని నివేదిక పేర్కొంది. ఆ వీడియోల్లోని మహిళల్లో కొందరు అపస్మారక స్థితిలో ఉండగా.. మరి కొందరు పీడకలలు వస్తున్నట్టుగా బాధపడుతుండటాన్ని వీడియోల్లో గుర్తించారు.

ఈ వీడియోల కోసం ఫోల్డర్‌‌లు క్రియేట్ చేసిన నిందితుడు.. కొరియన్ మహిళ పేరుతో వాటిని భద్రపరిచినట్టు డిటెక్టివ్‌లు గుర్తించారు. అపస్మారక స్థితిలో ఉన్న బాధితురాలిపై లైంగిక దాడి చేస్తోన్న 95 నిమిషాల నిడివి ఉన్న వీడియో కూడా ఇందులో ఉంది. తన గదిలో బెడ్‌ పక్కనే అలారం క్లాక్‌లోని సీక్రెట్‌ కెమెరా ఏర్పాటుచేసి.. అత్యాచారానికి పాల్పడుతుండగా రికార్డు చేస్తూ పైశాచిక ఆనందం పొందేవాడని తెలుస్తోంది.

ధన్‌ఖర్ గతంలో సిడ్నీ ట్రెయిన్స్, ఏబీసీ, ఫైజర్‌లో డేటా విజువలైజేషన్ కన్సల్టెంట్‌గా పనిచేశాడు. 2018 అక్టోబరులో నిందితుడి ఫ్లాట్‌తోపాటు ఓ హోటల్‌ గదిలో సోదాలు జరపగా మత్తు పదార్థాలు కలిపిన డ్రింక్స్‌ బాటిళ్లు, రేప్‌ దృశ్యాలు, మహిళలతో ఏకాంతంగా ఉండగా తీసిన మొత్తం 47 వీడియోలతో కూడిన హార్డ్‌డ్రైవ్‌ లభ్యమైంది. ధన్‌ఖర్ 2018 జులైలోనే ఆర్గనైజేషన్‌కు రాజీనామా చేశాడని బీజేపీ ఆస్ట్రేలియా విభాగం వెల్లడించింది. అతడు చేసిన పనులను తాము తీవ్రంగా ఖండిస్తున్నట్లు తెలిపింది. చట్ట ప్రకారం అతడు శిక్షార్హుడని తెలిపింది.