అనారోగ్యంతో ఆస్పత్రికి హిమాచల్ సీఎం తల్లి,,వైద్యుడు అసభ్యంగా ప్రవర్తించినట్టు ఆరోపణలు

హిమాచల్ ప్రదేశ్ ముఖ్యమంత్రి సుఖ్విందర్ సింగ్ సుఖు మాతృమూర్తికి చేదు అనుభవం ఎదురయ్యింది. అనారోగ్యంతో ఆస్పత్రికి వెళ్లిన ఆమె పట్ల వైద్యుడు అసభ్యంగా ప్రవర్తించాడు. ఏప్రిల్ 9న జరిగిన ఈ ఘటన ఆలస్యంగా వెలుగులోకి వచ్చింది. దీనిపై విచారణకు అధికారులు ఓ కమిటీని నియమించారు. హమీర్పుర్ జిల్లాలో జరిగిన ఘటనకు సంబంధించిన వివరాల ప్రకారం.. సీఎం సుఖ్విందర్ సింగ్ సుఖు తల్లి సంసారో దేవికి ఏప్రిల్ 9న కడుపునొప్పి రావడంతో తన బంధువులను తీసుకుని నాదౌన్ సివిల్ ఆస్పత్రికి వెళ్లారు. ఈ సమయంలో అక్కడ ఉన్న వైద్యుడు తనపట్ల అసభ్యంగా ప్రవర్తించారని సంసారో దేవి ఆరోపించారు.

ఈ ఘటన జరిగిన మర్నాడే హమీర్‌పూర్ జిల్లాలో సీఎం సుఖ్విందర్ పర్యటించారు. మూడు రోజుల పర్యటన కోసం ఏప్రిల్ 10న హమీర్పుర్ చేసుకున్న సీఎం.. ఈ విషయమై చీఫ్ మెడికల్ ఆఫీసర్ను (సీఎమ్ఓ) వివరణ కోరారు. అనంతరం డాక్టర్కు షోకాజ్ నోటీసులు జారీ చేశారు అధికారులు. ఈ షోకాజ్ నోటీసుకు ఆరోపణలు ఎదుర్కొంటున్న వైద్యుడు సమాధానం ఇస్తూ.. తాను అసభ్యంగా ప్రవర్తించలేదని చెప్పారు. రోగితో పాటు వచ్చిన కుటుంబ సభ్యులను మాస్కులు ధరించమని మాత్రమే సూచించానని పేర్కొన్నాడు.

అంతేకాదు, ఆ వృద్ధురాలు ఎవరో తనకు తెలియదని.. చికిత్స అనంతరం ఆమెకు ఔషధాలు కూడా అందుబాటులో ఉంచినట్లు వివరించాడు. వైద్యుడి సమాధనం నేపథ్యంలో చీఫ్ మెడికల్ ఆఫీసర్ డాక్టర్ ఆర్కే అగ్నిహోత్రి ముగ్గురు సభ్యులతో విచారణ కమిటీని ఏర్పాటుచేశారు. బ్లాక్ మెడికల్ ఆఫీసర్ (బీఎమ్ఓ) నేతృత్వంలోని ఈ కమిటీ.. సాధ్యమైనంత త్వరగా నివేదికను సమర్పిస్తుందని సీఎంఓ అగ్నిహోత్రి తెలిపారు. ఇలాంటి ఘటనలు పునరావృతం కాకుండా చర్యలు తీసుకుంటామని వివరించారు.

ఇదిలా ఉండగా, గతేడాది డిసెంబర్లో జరిగిన హిమాచల్ ప్రదేశ్ అసెంబ్లీ ఎన్నికల్లో కాంగ్రెస్ పార్టీ విజయం సాధించడంతో.. ముఖ్యమంత్రిగా సుఖ్విందర్ సింగ్ సుఖు ప్రమాణ స్వీకారం చేశారు. ఈ సందర్భంగా సుఖ్విందర్ తల్లి సంసారో దేవి ఆసక్తికర వ్యాఖ్యలు చేశారు. తప్పు చేస్తే.. ఇప్పటికీ తన కుమారుడి చెంపలు వాయిస్తానని అన్నారు. కుటుంబ ఆర్థిక పరిస్థితుల దృష్ట్యా సుఖును ప్రభుత్వ ఉద్యోగిగా చూడాల కలగన్నాను.. కానీ అతడు మాత్రం రాజకీయాలను ఎంచుకున్నారని సరసోదేవి వ్యాఖ్యానించారు. కొడుకు ఎంత ఎత్తుకు ఎదిగినా తల్లికి బిడ్డేనని.. పెళ్లైన తర్వాత కూడా అనేక సార్లు సుఖును కొట్టానని గుర్తుచేసుకున్నారు. ఇంత వయసు, హోదా వచ్చినా.. ఏనాడూ తనకు ఎదురు చెప్పలేదని అన్నారు.