టీడీపీ అనుకూల మీడియా విషం కక్కుతోంది: గుడివాడ అమర్నాథ్

రాష్ట్రంలో జరుగుతున్న అభివృద్ధి చూడలేక టీడీపీ అనుకూల మీడియా విషం కక్కుతోందని  రాష్ట్ర పరిశ్రమలు, ఐటీ శాఖ మంత్రి గుడివాడ అమర్నాథ్ మండిపడ్డారు. రాష్ట్రంలో జరుగుతున్న అభివృద్ధిని చూసి తెలుగుదేశం పార్టీ నేతలు పడుతున్న బాధ చూస్తుంటే జాలి వేస్తోందని ఆయన సెటైర్లు వేశారు. ఈ మేరకు తాడేపల్లిలోని వైసీపీ కార్యాలయంలో మంత్రి గుడివాడ అమర్నాథ్ మీడియాతో మాట్లాడుతూ.. ఈ నెల 22వ తేదీన మచిలీపట్నం పోర్టు నిర్మాణానికి శంకుస్థాపన జరుగుతుందని ప్రకటించారు.

రాష్ట్రంలో జరుగుతున్న పారిశ్రామిక ప్రగతిని చూసి టీడీపీ అనుకూల మీడియా తట్టుకోలేకపోతోందని.. భోగాపురం ఎయిర్‌పోర్ట్‌, సీపోర్ట్‌ నిర్మాణాలు ఆ మీడియాకు కనబడటం లేదా? అని మంత్రి అమర్నాత్ సూటిగా ప్రశ్నించారు. చంద్రబాబును అధికారంలోకి తెచ్చి గ్రాఫిక్స్ చూపించాలని ఆ మీడియా తపన పడుతోందని దుయ్యబట్టారు. మొన్ననే అదానీ డేటా సెంటర్‌కు శంకుస్థాపన జరిగిందన్నారు. మొదటి వెసెల్‌ని ఈ డిసెంబర్‌కి రామాయపట్నం పోర్టుకు తేవాలని ముఖ్యమంత్రి వైఎస్ జగన్మోహన్ రెడ్డి కృత నిశ్చయంతో ఉన్నారని చెప్పారు.

నాలుగు పోర్టులు, ఎయిర్‌పోర్టు, పారిశ్రామిక కారిడార్ నిర్మాణాలను చూసి తట్టుకోలేక పోతున్నారని మంత్రి అమర్నాత్ మండిపడ్డారు. ఆ మీడియాలో రాసే వార్తలు చూస్తుంటే వారికి సిగ్గుశరం లేదని అర్థం అవుతోందని దుయ్యబట్టారు. 2019 నాటికి ప్రభుత్వ ఉద్యోగులు నాలుగు లక్షలే ఉంటే.. సీఎం జగన్ వచ్చాక 6 లక్షల ఉద్యోగాలు అయ్యాయని పేర్కొన్నారు. రాష్ట్రంలో పెరిగిన ఈ ఉద్యోగాలు ఎవరికి వచ్చినట్లో చెప్పాలని డిమాండ్ చేశారు.

ఇక, ఎంఎస్ఎంఈ సెక్టార్ నుంచి కొత్తగా 12 లక్షల ఉద్యోగాలు వచ్చాయని.. ఐటీ రంగంలో భారీగా ఉద్యోగాలు వచ్చాయని మంత్రి అమర్నాథ్ పేర్కొన్నారు. ఐటీ సెక్టార్‌లో మరో లక్ష ఉద్యోగాలు త్వరలోనే రాబోతున్నాయని వెల్లడించారు. అలాగే, నాలుగు ఎలక్ట్రానిక్ రంగాల్లో కూడా పెద్ద ఎత్తున ఉద్యోగాలు వస్తున్నాయని చెప్పారు. కొత్త పోర్టుల నిర్మాణ సమయంలో వేలాది మందికి అవకాశాలు వస్తున్నాయని పేర్కొన్నారు. రాష్ట్రంలో 9 ఫిషింగ్ హార్బర్ల నిర్మాణాలు జరుగుతున్నాయని చెప్పారు.

ఈజ్ ఆఫ్ బిజినెస్‌లో ఆంధ్రప్రదేశ్ రాష్ట్రం మూడేళ్లుగా ఫస్ట్ ప్లేస్‌లో ఉందని మంత్రి అమర్నాథ్ గుర్తు చేశారు. బల్క్ డ్రగ్ ప్రాజెక్టును తామే సాధించామని.. ఈ విషయంలో కేంద్ర ప్రభుత్వం ఇచ్చిన నివేదికలు కూడా కొన్ని మీడియా సంస్థలకు కనపడటం లేదని దుయ్యబట్టారు. దేశంలోని అతిపెద్ద పారిశ్రామిక వేత్తలు ఏపీకి వచ్చి పెట్టుబడులు పెడుతున్నాని తెలిపారు. అవేవీ టీడీపీ అధినేత చంద్రబాబునాయుడుకు, ఆయన అనుకూల మీడియాకు కనబడటం లేదా అని ప్రశ్నించారు.

గ్లోబల్ ఇన్వెస్టర్స్ సమ్మిట్‌లో రూ. 13 లక్షల కోట్ల పెట్టుబడులు పెడుతున్నట్లు‌ పారిశ్రామికవేత్తలు ప్రకటించారని మంత్రి అమర్నాథ్ చెప్పారు. అయితే, తప్పుడు వార్తలు రాసి ప్రజలను నమ్మించాలని వారి ప్రయత్నిస్తున్నారని ఆరోపించారు. పరిశ్రమల కోసం తాము చేస్తున్న కృషిని రాష్ట్ర ప్రజలు గుర్తించారని చెప్పారు. మూడు పారిశ్రామిక కారిడార్‌లు ఉన్న ఏకైక రాష్ట్రం ఆంధ్రప్రదేశ్ మాత్రమే అని అన్నారు. పరిశ్రమల నెలకొల్పేందుకు ఇక్కడ అపార అవకాశాలు ఉన్నాయని పారిశ్రామికవేత్తలు సైతం గ్రహించారని మంత్రి అమర్‌నాథ్‌ స్పష్టం చేశారు.