ఉరేసుకున్న యువకుడు.. కిందకు దింపడానికి 4 గంటలు శ్రమించిన పెంపుడు శునకం

మూగజీవాలను ఎంతో ఇష్టంగా చూసుకుంటూ.. పెంపుడు శునకాలను తమ ఫ్యామిలీలో ఒకరిగానే భావిస్తారు. అవి కూడా వారి పట్ల అంతే ప్రేమను కురిపించి, విశ్వాసాన్ని చాటుకుంటాయి. కొన్నిసార్లు వారికోసం ప్రాణాలు సైతం ఫణంగా పెట్టి పోరాడుతాయి. మూగజీవాలు మనుషుల పట్ల కనబరిచే ప్రేమ గురించి ప్రత్యేకంగా చెప్పనక్కర్లేదు. తాజాగా, ఓ శునకం తన యజమాని పట్ల ప్రేమను చాటుకుంది. ఉరివేసుకుని ఆత్మహత్య పాల్పడిన యజమానిని కిందకు దింపేందుకు దాదాపు 4 గంటలపాటు శ్రమించింది. ఆ సమయంలో స్థానికులు సహా పోలీసులను లోపలికి రానివ్వలేదు. చివరికి మత్తుమందు ఇచ్చి శునకాన్ని బంధించి.. శవాన్ని కిందకు దింపారు. గుండెల్ని పిండేసే ఈ ఘటన ఉత్తర్‌ ప్రదేశ్‌లోని ఝాన్సీలో అదివారం రాత్రి చోటుచేసుకుంది.

వివరాల్లోకి వెళ్తే ఝాన్సీలోని పంచవటి కాలనీలో రైల్వే ఉద్యోగి ఆనంద్ అగ్నిహోత్రి కుటుంబం నివసిస్తోంది. అతడు కుమారుడు సంభవ్‌ అగ్నిహోత్రి (25) కొన్నేళ్లుగా సివిల్స్‌ కోసం సిద్ధమవుతున్నాడు. ఆనంద్ భార్య కొద్ది రోజులుగా అనారోగ్యంతో బాధపడుతోంది. చికిత్స కోసం ఆమెను ఆనంద్ భోపాల్‌కు తీసుకెళ్లడంతో కుమారుడు ఇంటి వద్దే ఉన్నాడు. పెంపుడు కుక్క అలెక్స్‌ కూడా సంభవ్ వద్దే ఉంది. ఈ క్రమంలో ఆదివారం రాత్రి 10 ఆనంద్‌ ఎన్నిసార్లు ఫోన్‌ చేసినా సంభవ్‌ నుంచి సమాధానం రాలేదు.

దీంతో ఆందోళనకు గురైన ఆయన పక్కింటి వారికి ఫోన్‌ చేసి కుమారుడి గురించి ఆరాతీశారు. వారు ఆనంద్ ఇంటికి వెళ్లి తలుపుతట్టినా లోపలి నుంచి ఎటువంటి స్పందనలేదు. కేవలం పెంపుడు శునకం అరుపులు మాత్రమే వినిపిస్తున్నాయి. ఈ విషయం ఆనంద్‌కు వారు చెప్పడంతో ఆయన పోలీసులకు సమాచారం ఇచ్చారు. అక్కడకు చేరుకున్న పోలీసులు తలుపు తెరిచి చూసేసరికి సంభవ్ ఉరివేసుకుని ఆత్మహత్య చేసుకున్నాడు. పోలీసులు లోపలికి వెళ్లేందుకు ప్రయత్నించగా వారిపై అలెక్స్‌ దాడి చేసింది. చివరకు మున్సిపల్ అధికారులను రప్పించి శునకానికి మత్తుమందు ఇచ్చి బంధించారు.

అనంతరం సంభవ్‌ మృతదేహాన్ని స్వాధీనం చేసుకుని పోస్ట్‌మార్టం కోసం తరలించారు. అయితే, అలెక్స్‌ కూడా కాసేపటికే చనిపోవడం బాధాకరం. అధిక మోతాదులో మత్తు మందు ఇవ్వడం వల్లే శునకం మరణించిందని స్థానికులు ఆరోపిస్తున్నారు. తన కళ్లెదుటే యజమాని ఉరేసుకోవడం అలెక్స్ తట్టుకోలేకపోయింది. అతడ్ని కిందకు దింపేందుకు తీవ్రంగా ప్రయత్నించింది. సంభవ్ దుస్తులు, కాళ్లపై అలెక్స్ రక్కిన గుర్తులు ఉన్నాయి. ఇక, సివిల్స్‌కు సన్నద్ధమవుతోన్న సంభవ్.. ఒత్తిడితో ఆత్మహత్యకు పాల్పడినట్టు బంధువులు చెబుతున్నారు. కష్టపడి చదివినా పరీక్షల్లో విజయం సాధించలేకపోవడంతో మనస్థాపానికి గురైనట్టు తెలిపారు.