రష్యాతో యుద్ధం తర్వాత జెలెన్‌స్కీతో తొలిసారి ప్రత్యక్షంగా మోడీ భేటీ

జపాన్‌లోని హిరోషిమా వేదికగా జరుగుతోన్న జీ-7 దేశాల కూటమి శిఖరాగ్ర సమావేశానికి భారత ప్రధాని నరేంద్ర మోదీ ప్రత్యేక ఆహ్వానితుడిగా హాజరైన విషయం తెలిసిందే. ఈ సందర్భంగా ఉక్రెయిన్ అధ్యక్షుడు వొలొడిమిర్ జెలెన్‌స్కీ‌ను కలిసిన మోదీ.. యుద్ధం విషయంలో కీలక హామీ ఇచ్చారు. ఉక్రెయిన్‌- రష్యా వివాదాన్ని మానవత్వానికి సంబంధించిన సమస్యగా మోదీ అభివర్ణించారు. అంతేకాదు, దీనికి పరిష్కారం కోసం భారత్ సాధ్యమైనంత మేర కృషి చేస్తుందని జెలెన్‌స్కీకి మోదీ మాటిచ్చారు. అంతేకాదు, ఉక్రెయిన్‌కు మానవతాసాయం అందజేస్తామని తెలిపారు. ఉక్రెయిన్‌పై రష్యా దండయాత్ర మొదలైన తర్వాత ఇరువురూ నేతలూ ప్రత్యక్షంగా భేటీ కావడం ఇదే మొదటిసారి.

‘ఉక్రెయిన్‌- రష్యా యుద్ధం ప్రపంచ మొత్తానికే చాలా పెద్ద సమస్య.. అన్ని దేశాలను చాలా విధాలుగా ప్రభావితం చేసింది. కానీ, దీన్ని నేను రాజకీయ, ఆర్థిక సమస్యగా పరిగణించడం లేదు. ఇది మానవత్వం, మానవ విలువలకు సంబంధించిన అంశం.. యుద్ధ బాధలు మా అందరికంటే మీకు బాగా తెలుసు.. ఉక్రెయిన్‌ నుంచి తిరిగొచ్చిన మా పిల్లలు అక్కడి పరిస్థితి వివరించినప్పుడు.. మీ పౌరుల వేదనను బాగా అర్థం చేసుకోగలిగాను... ఈ సమస్యను పరిష్కరించేందుకు భారత్‌తోపాటు వ్యక్తిగతంగానూ సాధ్యమైనంత వరకూ కృషి చేస్తానని హామీ ఇస్తున్నా’ అని మోదీ మాట్లాడారు.

‘మా దేశ ప్రాదేశిక సమగ్రత, సార్వభౌమాధికారానికి ప్రత్యేకించి, అంతర్జాతీయ సంస్థల వేదికల వద్ద ఉక్రెయిన్‌కు మానవతా సహాయం అందించినందుకు’ మోదీకి జెలెన్స్కీ కృతజ్ఞతలు తెలిపారు. ఈ సందర్భంగా మోదీని తమ దేశంలో పర్యటించాలని ఉక్రెయిన్ అధ్యక్షుడు కోరినట్టు విదేశాంగ శాఖ కార్యదర్శి వినయ్ క్వాత్రా వెల్లడించారు. అయితే, సెప్టెంబరులో భారత్ నిర్వహించే జీ 20 శిఖరాగ్ర సమావేశానికి మాత్రం జెలెన్‌స్కీని మోదీ ఆహ్వానించలేదని తెలిపారు.

క్వాత్రా ప్రకారం, యుద్ధం గురించి ఆందోళన వ్యక్తం చేస్తూ.. ఆహారం, ఇంధనం, ఎరువుల కొరత రూపంలో ఆర్థిక అభద్రతలతో సహా అభివృద్ధి చెందుతున్న దేశాలపై యుద్ధం విస్తృత ప్రభావం గురించి మోదీ మాట్లాడారు. ‘భారత విద్యార్థుల సురక్షిత తరలింపులో ఉక్రెయిన్ సహకారాన్ని ప్రధాని ప్రశంసించారు.. విద్యార్థులకు భారత్‌లో పరీక్ష నిర్వహించాలని ఉక్రెయిన్ విద్యాసంస్థలు తీసుకున్న నిర్ణయాన్ని స్వాగతించారు.. చర్చలు, దౌత్యం ముందుకు సాగడానికి భారతదేశం స్పష్టమైన మద్దతును ప్రధాని తెలియజేశారు.. పరిస్థితిని పరిష్కరించడం కోసం భారత్‌తో ప్రధానమంత్రి వ్యక్తిగతంగా మా శక్తి మేరకు ప్రతిదీ చేస్తామని చెప్పారు’ అని వివరించారు.

ఉక్రెయిన్‌- రష్యా వివాదంపై మోదీ, జెలెన్‌స్కీలు ఇప్పటికే పలుమార్లు ఫోన్‌లో, వర్చువల్‌గా సమావేశమై చర్చించిన విషయం తెలిసిందే. చర్చలు, దౌత్య మార్గాల ద్వారా ఇరుదేశాల మధ్య నెలకొన్న ప్రతిష్ఠంభనను పరిష్కరించుకోవాల్సిన అవసరం ఉందని భారత్‌ పలుమార్లు స్పష్టం చేసింది. శాంతి ప్రయత్నాలకు సహకారం అందజేయడానికి తాము సిద్ధంగా ఉన్నామని ఉద్ఘాటించింది.