సంప్రదాయ వస్త్రాలే ధరించాలని,,,టీచర్ల వస్త్రధారణపై అసోం కీలక నిర్ణయం
national | Suryaa Desk | Published : Sun, May 21, 2023, 09:15 PM
విద్యార్థుల మాదిరిగానే ప్రభుత్వ ఆధ్వర్యంలో నడుస్తున్న అన్ని పాఠశాలల్లోని ఉపాధ్యాయులకూ అసోం ప్రభుత్వం డ్రెస్‌ కోడ్‌ నిర్ణయించింది. జీన్స్‌, టీషర్టులు, లెగ్గిన్స్‌ను పూర్తిగా నిషేధిస్తూ ఈ మేరకు అసోం పాఠశాల విద్యాశాఖ ఉత్తర్వులు జారీ చేసింది. ఉపాధ్యాయుల్ని చూసి విద్యార్థులు ఎన్నో విషయాలు నేర్చుకుంటారని, వారి వస్త్రధారణ కూడా పిల్లలపై ప్రభావం చూపుతుందని ఉత్తర్వుల్లో పేర్కొంది. అందుకే వారికి డ్రెస్‌ కోడ్‌ తప్పనిసరి చేసినట్లు పేర్కొంది.
‘‘కొన్ని పాఠశాల్లోని ఉపాధ్యాయులు తమకు నచ్చిన దుస్తులు వేసుకొని విధులకు హాజరవుతున్నారని మా దృష్టికి వచ్చింది.. ఇది ఏమాత్రం ఆమోదయోగ్యం కాదు.. ఉపాధ్యాయులు విద్యార్థులకు ఆదర్శంగా నిలవాలి.. వృత్తికి గౌరవం తీసుకొచ్చేలా హుందాగా ఉండే దుస్తులు ధరించడం అవసరం’’ అని పాఠశాల విద్యాశాఖ కార్యదర్శి నారాయణ్‌ కౌన్వార్‌ తన ఉత్తర్వుల్లో స్పష్టం చేశారు. ప్రభుత్వ ఆదేశాలను ధిక్కరించిన వారిపై చర్యలు తీసుకుంటామని హెచ్చరించారు. పురుష ఉపాధ్యాయులు ఫార్మల్ షర్ట్, ప్యాంటులు.. మహిళలు హుందాగా ఉండే సల్వార్ సూట్లు, చీరలు, సంప్రదాయ వస్త్రాలు ధరించాలని పేర్కొన్నారు.‘ఉపాధ్యాయుడు తన విధులను నిర్వర్తించేటప్పుడు అన్ని రకాల మర్యాదలకు ఉదాహరణగా భావిస్తారు.. కాబట్టి, విధుల్లో మర్యాద, వృత్తి నైపుణ్యం, గంభీరతను ప్రతిబింబించే వస్త్రధారణను అనుసరించడం అవసరం’ అని వ్యాఖ్యానించారు.
|
|