ఓటమిని కప్పిపుచ్చేందుకు ఉపయోగించిన మంత్రం: ఎంకే స్టాలిన్‌

రెండు వేల  నోట్లను ఉపసంహరణపై తమిళనాడు ముఖ్యమంత్రి ఎంకే స్టాలిన్ ట్విట్టర్‌లో స్పందించారు. కేంద్రంలో అధికారంలో ఉన్న బీజేపీ పాలకులు కర్ణాటక అసెంబ్లీ ఎన్నికల్లో ఓటమిని కప్పిపుచ్చేందుకు ఉపయోగించిన మంత్రమని ఎంకే స్టాలిన్‌ విమర్శించారు. ఈ సందర్శంగా 2016 నవంబరులో రూ.1,000, రూ.500 నోట్ల రద్దు అంశాన్ని తమిళనాడు సీఎం ప్రస్తావించారు.  ‘500 సందేహాలు, 1000 మర్మాలు.. 2000 తప్పిదాలు ఇదంతా కర్ణాటకలో చిత్తుగా ఓడిపోయిన విషయాన్ని కప్పిపుచ్చేందుకు ఉపయోగించే ఏకైక తూతూ మంత్రం’ అంటూ స్టాలిన్ ఎద్దేవా చేశారు. మరోవైపు, రూ.2 వేల నోట్లను బ్యాంకులలో మార్చుకునేందుకు డిసెంబర్‌ నెలాఖరు వరకు గడువు పెంచాలని తమిళనాడు వాణిజ్య సంఘాల సమాఖ్య నేత విక్రమ్‌రాజా విజ్ఞప్తి చేశారు. పెద్ద నోట్ల రద్దు సమయంలో నోట్లను బ్యాంకుల్లో ఇచ్చి మార్చుకునేందుకు ప్రజలు తీవ్ర ఇబ్బందులకు గురయ్యారని, ప్రస్తుతం ఆ పరిస్థితి తలెత్తకుండా చూడాలని కోరారు. సెప్టెంబర్ 30 లోగా నోట్ల మార్పిడి చేసుకోవడం, డిపాజిట్ చేయడం వంటివి చేయాలని ఆర్బీఐ సూచించిన విషయం తెలిసిందే.

పశ్చిమ్ బెంగాల్ సీఎం మమతా బెనర్జీ ట్విట్టర్‌లో విరుచుకుపడ్డారు. ‘కాబ్టి ఇది రూ.2,000 ధమాకా కాదు, బిలియన్ భారతీయులకు బిలియన్ డాలర్ల ధోకా (మోసం). ప్రియమైన సోదరులు, సోదరీమణులారా మేల్కొలపండి. నోట్ల రద్దు వల్ల మనం పడిన బాధలు మరచిపోలేం.., ఆ బాధలు కలిగించిన వారిని క్షమించకూడదు.. రూ.2000 నోట్లతో కూడిన మరో విచిత్రమైన, తుగ్లక్ డ్రామా సామాన్య ప్రజలను భారీ వేధింపులకు గురి చేయడం ద్వారా మరోసారి తీవ్రంగా దెబ్బతీస్తుంది. ఈ దుర్మార్గపు చర్యలు ప్రాథమికంగా ప్రజా వ్యతిరేక, పెట్టుబడిదారీ స్వభావాన్ని మభ్యపెట్టడానికి ఉద్దేశించినవి.. ఈ నిరంకుశ ప్రభుత్వం చేసిన ఇటువంటి దుస్సాహసాలను ప్రజలు మరచిపోలేరు’ అని దీదీ విరుచుకుపడ్డారు.

అటు, నల్లధనం అడ్డుకట్ట వేయడంలో భాగంగానే నోట్ల రద్దు చేశామన్న కేంద్రం వాదనతో కాంగ్రెస్ విభేదించింది. మొదటి పెద్ద నోట్ల రద్దుతో ఆర్థిక వ్యవస్థకు తీవ్ర గాయం చేశారని.. దాని వల్ల మొత్తం అసంఘటిత రంగం నాశనమైందని కాంగ్రెస్ అధ్యక్షుడు మల్లిఖార్జున ఖర్గే దుయ్యబట్టారు. ఎమ్ఎస్ఎమ్ఈలు నిలిచిపోయాయి.. కోట్లాది ఉద్యోగాలు పోయాయని ఆరోపించారు. ఇప్పుడు రూ. 2000 నోట్ల ఉపసంహరణతో రెండోసారి నోట్ల రద్దుకు తెరలేపారని ఆక్షేపించారు. నిష్పక్షపాతంగా దర్యాప్తు చేస్తేనే దోపిడీలో నిజానిజాలు వెల్లడవుతాయని అన్నారు.

రూ. 2000 నోట్ల ఉపసంహరణ నిర్ణయంపై ఢిల్లీ సీఎం, ఆమ్ ఆద్మీ పార్టీ జాతీయ కన్వీనర్ అరవింద్ కేజ్రీవాల్ ఛలోక్తులు విసిరారు. రూ. 2000 నోటును తీసుకువస్తే అవినీతికి అడ్డుకట్ట పడుతుందని మోదీ మొదట చెప్పారని గుర్తు చేశారు. ఇప్పుడు అదే రూ. 2000 నోటును ఉపసంహరించుకుంటే అవినీతి అంతమైపోతుందని చెబుతున్నారని అన్నారు. అందుకే దేశానికి చదువుకున్న వ్యక్తి ప్రధానమంత్రి కావాలని తాము చెబుతున్నామని పేర్కొన్నారు. నిరక్షరాస్యుడైన ప్రధానికి ఎవరైనా ఏదైనా చెప్పొచ్చని.. అప్పుడు వారు అర్థం చేసుకోలేరని తీవ్ర స్థాయిలో విమర్శలు గుప్పించారు. అలా తీసుకున్న నిర్ణయాలతో ప్రజలు తీవ్ర అవస్థలు పడాల్సి వస్తుందనే విషయం ప్రధానికి అర్థం కాదు అని ఎద్దేవా చేశారు.