విజయవాడలో ముదిరిన ఫ్లెక్సీల వార్,,,ఎన్టీఆర్ విగ్రహం చుట్టూ వివాదం షురూ

విజయవాడ పటమట సెంటర్‌లో ఎన్టీఆర్‌ విగ్రహం చుట్టూ వైఎస్సార్‌సీపీ ఫ్లెక్సీల ఏర్పాటుపై వివాదం రేగింది. ఎన్టీఆర్‌, సీఎం జగన్, మాజీ మంత్రి దేవినేని నెహ్రూ, దేవినేని అవినాష్ , కడియాల బుచ్చిబాబు ఫొటోలతో ఫ్లెక్సీలు ఏర్పాటు చేశారు. నందమూరి తారక రామారావు శత జయంతి నీరాజనాలు అంటూ ఫ్లెక్సీలు చుట్టూ వెలిశాయి. ప్రశాంతంగా ఉన్న విజయవాడలో రెచ్చగొట్టే చర్యలకు దేవినని అవినాష్ పాల్పడుతున్నారని టీడీపీ శ్రేణుల ఆగ్రహం వ్యక్తం చేశాయి. ఫ్లెక్సీలను ఎవరూ తొలగించకుండా పోలీసు బలగాలతో బందోబస్తు ఏర్పాటు చేశారు.

దేవినేని అవినాష్ తీరుపై విజయవాడ తూర్పు నియోజకవర్గ ఎమ్మెల్యే గద్దే రామ్మోహన్ ఆగ్రహం వ్యక్తం చేశారు. దేవినేని నెహ్రూకు ఎన్టీఆర్‌తో అనుబంధం ఉన్న మాట వాస్తవమని.. నెహ్రూ పసుపు జెండా పార్టీవ దేహం మీద కప్పించుకున్నారన్నారు. చంద్రబాబు అనాడు స్వయంగా పార్టీ జెండా కప్పారని.. కానీ నెహ్రూ కుమారుడు దేవినేని అవినాష్ చర్యలను ఖండిస్తున్నామన్నారు. ఎన్టీఆర్‌ స్థాపించిన పార్టీ కార్యాలయం పై దాడి చేయించారని.. పార్టీ జెండాను కింద వేసి తొక్కారన్నారు.

దేవినేని అవినాష్ కవ్వింపు చర్యలు మానుకోవాలి: గద్దె రామ్మోహన్

హెల్త్ యూనివర్శిటీకి ఎన్టీఆర్‌ పేరు తొలగిస్తే అవినాష్ ఎందుకు మాట్లాడలేదని ప్రశ్నించారు. టీడీపీ ఆధ్వర్యంలో కార్యక్రమం జరిగే ఎన్టీఆర్‌ విగ్రహం దగ్గర వారి ఫ్లెక్సీలు ఎందుకని ప్రశ్నించారు. ధన బలం, రౌడీయిజంతో ఏమైనా చేయొచ్చంటే.. తగిన మూల్యం చెల్లించుకుంటారన్నారు. విజయవాడలో ప్రశాంతంగా ఉన్న వాతావరణాన్ని కలుషితం‌ చేయొద్దని.. పోలీసు అధికారులకు‌ చెప్పినా తమ వల్ల కాదని చేతులేత్తేశారన్నారు. ఇటువంటి చర్యలు పోలీసులు కంట్రోల్ చేయక పోవడం దారుణమని.. దేవినేని అవినాష్ కూడా ఒకసారి ఆలోచించాలన్నారు. ఇటువంటి చర్యలు ద్వారా వారి గొయ్యి వారే తవ్వుకుంటున్నారన్నారు. ఇప్పుడు అయినా మారకుంటే ప్రజలే తగిన బుద్ది చెబుతారన్నారు.

ఎన్టీఆర్ అందరికీ ఆరాధ్య దైవం అన్నార దేవినేని అవినాష్. ఎన్టీఆర్ శతజయంతి వేడుకలు ఆదివారం ఘనంగా నిర్వహిస్తున్నామన్నారు. దేవినేని నెహ్రూ చారిటబుల్ ట్రస్ట్, ఎన్టీఆర్ విజ్ఞాన్ ట్రస్ట్ సంయుక్త ఆధ్వర్యంలో వేడుకలు నిర్వహించబోతున్నట్లు తెలిపారు. ఎన్టీఆర్ విజ్ఞాన్ ట్రస్ట్ ఆధ్వర్యంలో ఎన్టీఆర్ లలితకళ అవార్డును సినీ నటులు పోసాని కృష్ణమురళికి ప్రధానం చేస్తామని.. ఎన్టీఆర్, వైఎస్సార్ అంటే తన తండ్రి నెహ్రూకి ఎంతో అభిమానం అన్నారు. టీడీపీ నేతలు అధికారంలో ఉన్నప్పుడు ఎన్టీఆర్ పేరు కూడా ప్రస్తావన రాకుండా చేసేవారన్నారు.

మేమూ ఎన్టీఆర్ అభిమానులమే.. దేవినేని అవినాష్

ఎన్టీఆర్ పేరు జిల్లాకు పెట్టిన మనసున్న నేత సీఎం జగన్ మోహన్ రెడ్డి.. ఎన్టీఆర్ పేరును జగన్ మోహన్ రెడ్డి చిరస్థాయిగా చరిత్రలో నిలిచిపోయేలా చేశారన్నారు. కనీవినీ ఎరుగని రీతిలో అమరావతిలో జరిగిన ఇళ్ల పట్టాల పండుగకు లబ్ధిదారులు తరలివచ్చారని.. చంద్రబాబు సభలకు జనం రావాలంటే డబ్బులు, బిర్యానీ ప్యాకెట్లు ఇవ్వాలన్నారు. కానీ జగన్ మోహన్ రెడ్డి సభకుసంతోషంతో లబ్ధిదారులు తరలివచ్చారన్నారు. టీడీపీ నేతలు మూడేళ్లు పేదలకు ఇళ్లు రాకుండా వ్యవస్థల ద్వారా అడ్డుకున్నారని.. అమరావతిలో తన పెట్టుబడిదారులు.. రియల్ ఎస్టేట్ వ్యక్తులు మాత్రమే ఉండాలని చంద్రబాబు అనుకున్నాడన్నారు.

దమ్మున్న మొనగాడిలా జగన్ మోహన్ రెడ్డి పేదల తరపున పోరాడారని.. ఇళ్ల పట్టాల పండుగను చూసి టీడీపీ నేతలకు, అనుకూల మీడియాకు నిద్రపట్టడం లేదన్నారు. పేదల సొంతింటి కల నెరవేరుతుంటే చూసి ఓర్వలేకపోతున్నారని.. టీడీపీ అధికారంలోకి వస్తే ఇళ్ల పట్టాలను రద్దు చేస్తామంటున్న టీడీపీ నేతలకు సిగ్గుందా అన్నారు. సెంటు స్థలం పై విమర్శలు చేసిన టీడీపీ నేతలు తలలెక్కడ పెట్టుకుంటారన్నారు. జగన్సభను చూసి టీడీపీ నేతలకు దిమ్మతిరిగిందన్నారు.

తామూ ఎన్టీఆర్ అభిమానులమే అన్నారు అవినాష్. ఎన్టీఆర్‌కు బ్యానర్లు కట్టే హక్కు ఉందన్నారు. ఎన్టీఆర్ సర్కిల్ టీడీపీకి ఎవరూ రాసివ్వలేదు.. అది వాళ్ల పార్టీ ఆఫీసు కాదన్నారు. తాము బ్యానర్లు కట్టే వరకూ అక్కడ ఎన్టీఆర్‌కు బ్యానర్లు కట్టే వారే లేరని.. వారి ప్రవర్తన చాలా బాధగా అనిపించిందన్నారు. ఎమ్మెల్యే గద్దె రామ్మోహన్ కవ్వింపు చర్యలకు పాల్పడి తమపై నిందలు మోపుతున్నారన్నారు. ధనబలం, మీడియా ఉందని ప్రజలను రెచ్చగొట్టాలని చూడటం సరికాదని.. కవ్వింపు చర్యలు.. అల్లర్లను ప్రోత్సహించే విధానం మానుకోవాలని గద్దె హెచ్చరిస్తున్నాను అన్నారు.