ఎల్లో మీడియాపై మండిపడ్డ సజ్జల రామకృష్ణారెడ్డి

విచారణను పక్కదారి పట్టించేలా, దర్యాప్తును ప్రభావితం చేసేలా తెలుగు దేశం పార్టీ అధినేత చంద్రబాబునాయుడు అనుకూల మీడియా చర్చలు పెట్టిందని  వైఎస్సార్‌ కాంగ్రెస్ పార్టీ ప్రధాన కార్యదర్శి, ప్రభుత్వ సలహాదారు సజ్జల రామకృష్ణారెడ్డి దుయ్యబట్టారు.  మాజీ మంత్రి వైఎస్ వివేకానందరెడ్డి హత్య కేసులో సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) విచారణపై ఓ వర్గం మీడియాలో తప్పుడు కథనాలు ప్రచారం చేస్తోందని ఆయన మండిపడ్డారు. వివేకా హత్య కేసుకు సంబంధించి తెలంగాణ హైకోర్టులో కడప వైఎస్సార్ కాంగ్రెస్ పార్టీ ఎంపీ వైఎస్ అవినాష్‌ రెడ్డికి బెయిల్‌ మంజూరైన నేపథ్యంలో సజ్జల మీడియాతో మాట్లాడుతూ.. విచారణను పక్కదారి పట్టించేలా, దర్యాప్తును ప్రభావితం చేసేలా తెలుగు దేశం పార్టీ అధినేత చంద్రబాబునాయుడు అనుకూల మీడియా చర్చలు పెట్టిందని దుయ్యబట్టారు. ముఖ్యమంత్రి వైఎస్ జగన్మోహన్ రెడ్డిని ఎదుర్కోలేక ఇలాటి పనులు చేస్తున్నారని మండిపడ్డారు. వ్యవస్థను కించపరిచేలా ఒక మూకలా తయారై ఇలాంటి దుష్ప్రచారం చేస్తున్నారని ఆగ్రహం వ్యక్తం చేశారు. ఓ వర్గం మీడియా పరిధులు దాటి వ్యహరిస్తోందని విమర్శించారు.

ఇక, తెలంగాణ హైకోర్టు జడ్జికి దురుద్దేశాలు ఆపాదిస్తూ.. ఆయనకు డబ్బు మూటలు అందాయంటూ ఆ వర్గం మూఠా చేసిన వ్యాఖ్యలు ఘోరమని సజ్జల రామకృష్ణారెడ్డి అన్నారు. జడ్జి వ్యక్తిత్వాన్ని దెబ్బతీసేలా కొన్ని ఛానల్స్ కథనాలు ప్రచురించాయని.. స్వేచ్ఛ గా నిర్ణయం తీసుకోకుండా ప్రభావితం చేసేలా చర్చలు నిర్వహించిందని తెలిపారు. వ్యక్తిత్వ హననానికి మీడియా ప్రయత్నించిందని ఆరోపించారు. అయినా, సీబీఐ దర్యాప్తునకు సంబంధించిన అంశాలు ఒక వర్గం మీడియాకే ఎలా తెలుస్తున్నాయని ప్రశ్నించారు.

ఓ వర్గం మీడియా తమ సొంత అజెండాతో దుష్ప్రచారం చేస్తోందని సజ్జల రామకృష్ణారెడ్డి చెప్పారు. వివేకా హత్య కేసులో మీడియా ప్రమేయం లేకుండా స్వేచ్ఛగా దర్యాప్తు జరగాలన్నారు. ఇక, టీవీ ఛానళ్ల డిబేట్లలో రెచ్చిపోయి కొందరు వ్యక్తులు వ్యాఖ్యలు చేస్తున్నారని.. తాము ఉన్నది ఉన్నట్లు మాట్లాడితే కొందరు అహంకారపూరితంగా వ్యవహరిస్తున్నారని చెప్పారు. ప్రజా జీవితంలో ఉన్నవారిపై తప్పుడు ఆరోపణలు చేస్తున్నారని.. నిజాయితీపరులపై అమానుషంగా వ్యాఖ్యలు చేస్తున్నారని ఆవేదన వ్యక్తం చేశారు. టీడీపీకి అనుకూలంగా కోర్టు తీర్పులు వస్తేనే ప్రజాస్వామ్యం గెలిచినట్టా? ప్రతికూలంగా కోర్టు తీర్పులు వస్తే ప్రజాస్వామ్యం ఓడినట్టా అని సజ్జల ప్రశ్నించారు. ఎవరెన్ని కుట్రలు చేసినా చివరికి న్యాయమే గెలుస్తుందని హైకోర్టు తీర్పుతో స్పష్టమైందన్నారు.

ఇక, ముఖ్యమంత్రి వైఎస్‌ జగన్మోహన్ రెడ్డి చెమటోడ్చి నిర్మించుకున్న పార్టీ వైఎస్సార్‌ కాంగ్రెస్ అని సజ్జల అన్నారు. వైసీపీ పెట్టిన చాన్నాళ్ల తర్వాత వివేకా పార్టీలో చేరతానంటే పార్టీ అధినేత జగన్‌ ఆహ్వానించారని గుర్తు చేశారు. పార్టీలో ఎవరికి టికెట్లు ఇవ్వాలనే విషయంలో సీఎం జగన్‌దే తుది నిర్ణయమని.. ఎవరికి టికెట్లు ఇస్తే పార్టీకి ఉపయోగపడుతుందనేది పూర్తిగా జగన్మోహన్ రెడ్డి ఇష్టమన్నారు. వివేకా హత్య కేసులో రాజకీయం కోణం ఎక్కడా లేదని.. రాష్ట్రంలో ఎవరిని అడిగినా ఈ విషయం చెప్తారని పేర్కొన్నారు..

అయితే, వివేకా హత్య సమయంలో రాసిన లేఖను దాచిపెట్టాలని ఆయన అల్లుడు రాజశేఖర్‌రెడ్డి చెప్పారని.. కానీ, సీబీఐ మాత్రం కేవలం ఒక్క కోణంలోనే దర్యాప్తు చేస్తోందని సజ్జల రామకృష్ణారెడ్డి చెప్పారు. వివేకానందరెడ్డి హత్య వెనక ఆస్తికి సంబంధించి వివాదాలు ఉన్నాయని.. కానీ ఆస్తి, కుటుంబ వ్యవహారాల్లో దర్యాప్తు జరపడం లేదన్నారు. కీలక అంశాలపై సీబీఐ విచారణ చేపట్టలేదన్నారు.