నాని గారూ మా పార్టీలో చేరండి,,,ఆహ్వానించిన వైసీపీ ఎంపీ అయోధ్య రామిరెడ్డి

విజయవాడ టీడీపీ ఎంపీ కేశినేని నానిపై వైసీపీ రాజ్యసభ ఎంపీ అయోధ్య రామిరెడ్డి ప్రశంసల జల్లులు కరిపించారు. కేశినేని నాని చాలా మంచి వ్యక్తి అని, ఆయన వైసీపీలోకి వస్తే ఆహ్వానిస్తామని తెలిపారు. మొన్న కేశినేని నానిపై నందిగామ ఎమ్మెల్యే మొండితోక జగన్ మోహన్ రావు పొగడ్తలు కురిపించారు. ఈలోపే వైసీపీ ఎంపీ అయోధ్య రామిరెడ్డి ప్రశంసించడం ఆసక్తికరకంగా మారింది. ప్రతిపక్ష టీడీపీకి చెందిన కేశినేని నానిపై అధికార వైసీపీ నేతలు వరుసపెట్టి ప్రశంసలు కురిపించడం ఏపీ రాజకీయాల్లో చర్చనీయాంశంగా మారింది.

కేశినేని నాని వైసీపీలో చేరాలని ఆ పార్టీ నేతలు ఆహ్వానించడం ఇప్పుడు బెజవాడ పాలిటిక్స్‌లో హాట్‌టాపిక్‌గా మారింది. విజయవాడ పార్లమెంట్ నియోజకవర్గాన్ని అభివృద్ధి చేసేందుకు ఎవరితోనైనా కలుస్తానని, అభివృద్ధి కోసం వైసీపీ నేతలతో కూడా కలిసి పనిచేసేందుకు సిద్దమని కేశినేని నాని ఇటీవల చేసిన వ్యాఖ్యలు టీడీపీ వర్గాలను అసంతృప్తికి గురి చేశాయి. ఈ తరుణంలో నానిపై వైసీపీ నేతలు ప్రశంసలు కురిపిస్తుండటం, తమ పార్టీలో చేరాలని ఆహ్వానించడంతో తెలుగు తమ్ముళ్లలో కన్‌ప్యూజన్ నెలకొంది. కేశినేని నాని, వైసీపీ నేతల మధ్య జరుగుతున్న ప్రశంసల ఎపిసోడ్ ఎటువైపు దారి తీస్తుందనే చర్చ టీడీపీలో జరుగుతోంది.

గత కొంతకాలంగా చంద్రబాబుతో కేశినేని నానికి కాస్త గ్యాప్ ఏర్పడింది. తన తమ్ముడు కేశినేని చిన్నికి చంద్రబాబు ప్రాధాన్యత ఇస్తుండటంతో నాని అసంతృప్తితో ఉంటున్నారు. దీంతో చంద్రబాబుకు దూరంగా ఉంటూ వస్తోన్నారు. గతంలో చంద్రబాబు, టీడీపీని విమర్శిస్తూ నాని చేసిన ట్వీట్లు వివాదాస్పదంగా మారాయి. కృష్ణా జిల్లాలో పలువురు నేతలతో నానికి పొసగడం లేదు. ఇవి అధిష్టానం దృష్టికి వెళ్లడంతో నానిపై చంద్రబాబు సీరియస్ అయినట్లు కూడా ప్రచారం జరిగింది. వచ్చే ఎన్నికల్లో నానికి ఎంపీ టికెట్‌పై కూడా ఎలాంటి క్లారిటీ రావడం లేదు. చిన్నికి టికెట్ కేటాయిస్తారనే వార్తలు కూడా వినిపిస్తున్నాయి. ఈ పరిణామాలతో టీడీపీలో నాని అసంతృప్తిగా ఉన్నట్లు చెబుతున్నారు.

ఈ క్రమంలో ఇటీవల వైసీపీ ఎమ్మెల్యే జగన్ మోహన్‌రావు నియోజకవర్గ అభివృద్ది కోసం బాగా పనిచేస్తున్నారని చేసిన వ్యాఖ్యలు కలకలం రేపాయి. ఈ వ్యాఖ్యలపై జగన్ మోహన్ రావు స్పందిస్తే నానిని పొగిడారు. అభివృద్ధి పనులు కోసం తాము ఇద్దరం ఎందుకు కలిసి పనిచేయకూడదని ప్రశ్నించారు. ఆరోగ్యకరమైన రాజకీయాలు చేస్తున్నాం కాబట్టే ఒకరితో ఒకరు మాట్లాడుకోగలుగుతున్నామని అన్నారు. ఎంపీగా నాని అభివృద్ధి పనులు బాగా చేపడుతున్నారన్నారు.