ఎమ్మెల్యే కిలివేటి సంజీవయ్య ఇంటి పని మనిషి ఆత్మహత్యయత్నం

నెల్లూరు జిల్లా సూళ్లూరుపేట వైఎస్సార్ కాంగ్రెస్ పార్టీ ఎమ్మెల్యే కిలివేటి సంజీవయ్య ఇంట్లో పని చేస్తున్న అరుణకుమారి అనే మహిళ ఆత్మహత్యాయత్నానికి పాల్పడటం తీవ్ర కలకలం రేపింది. అరుణకుమారిని వెంటనే ఆస్పత్రికి తరలించగా.. చికిత్స పొందుతూ మరణించారు. అయితే ఈ కేసులో ఓ షాకింగ్ ట్విస్ట్ వెలుగు చూసింది. వివాహేతర సంబంధమే అరుణకుమారి ఆత్మహత్యకు కారణమనే కోణం తెరపైకి వచ్చింది.  కొన్ని నెలల క్రితమే అరుణకుమారిని ఆమె బంధువులు ఎమ్మెల్యే సంజీవయ్య ఇంట్లో పనికి కుదిర్చారు. మొదట్లో అంతా సజావుగానే సాగింది. అయితే, ఎమ్మెల్యే కార్యాలయంలో వాచ్‌మెన్‌గా పని చేస్తున్న తేజ పరిచయంతో అరుణకుమారి జీవితంలో ఊహించని పరిణామాలు చోటు చేసుకున్నాయి.

రోజులు గడిచే కొద్దీ అరుణకుమారి, తేజ మధ్య సాన్నిహిత్యం మరింత పెరిగింది. ఇద్దరు కలిసి షికారుకి వెళ్లిన వీడియోలను సైతం రికార్డ్ చేసుకున్నారు. ఈ విషయం అరుణకుమారి కుటుంబ సభ్యులకు తెలియడంతో.. వాళ్లు మందలించారు. ఈ క్రమంలో అరుణకుమారి భర్త, అతని స్నేహితులు ఓ సారి తేజను నెల్లూరు నగర శివారు ప్రాంతానికి తీసుకెళ్లి తీవ్రంగా మందలించినట్లు తెలుస్తోంది. మరోసారి సన్నిహితంగా మెలిగితే పరిణామాలు మరోలా ఉంటాయని హెచ్చరించారని సమాచారం.

అయినా ఇద్దరిలో మార్పు రాలేదని అరుణకుమారి భర్త గణేష్ ఆరోపించారు. తేజ వల్లే తన భార్య ఆత్మహత్యకు పాల్పడిందని, తన భార్య మృతికి అతడే కారణమని ఆరోపిస్తున్నారు. అరుణకుమారి మృతి చెందిన నాలుగు రోజుల తర్వాత తనకు పోలీసులు సమాచారం అందించారని.. చనిపోయిన వెంటనే ఎందుకు తెలియచేయలేదని గణేష్ ప్రశ్నించారు. తనకు పిల్లలు ఉన్నారని, తన కుటుంబాన్ని ఆదుకోవాలని గణేష్ కోరారు.

మరోవైపు, ఈ కేసులో అనుమానితుడిగా భావిస్తున్న తేజను పోలీసులు అరెస్ట్ చేశారు. మూడు రోజుల పాటు జైల్లో ఉంచి, ఆయన్ను ప్రశ్నించారు. అనంతరం తేజను పోలీసులు పంపించినట్టుగా తెలుస్తోంది. ఈ కేసుని తాము అన్ని కోణాల్లోనూ విచారిస్తున్నామని.. అరుణకుమారి ఆత్మహత్యకు తేజతో ఉన్న సాన్నిహిత్యమే కారణమా? లేక మరే ఇతర కారణాలున్నాయా? తేల్చేందుకు దర్యాప్తు చేస్తున్నామని పోలీసులు తెలిపారు. త్వరలోనే ఈ కేసుకు సంబంధించి పూర్తి వివరాలు వెల్లడిస్తామని చెప్పారు.