ఒడిశా రైలు ప్రమాదంలో ఏపీకి చెందినవారు 70 మంది ఉంటారని అంచనా

ఒడిశాలో ఘోర రైలు ప్రమాదం చోటుచేసుకున్న నేపథ్యంలో ఏపీ ప్రభుత్వం అలర్ట్ అయింది. ఈ ప్రమాదంలో ఏపీకి చెందిన 70 మంది ప్రయాణికులు చిక్కుకోవడంతో వారి కోసం ప్రత్యేక చర్యలు తీసుకుంటోంది. హాస్పిటల్స్‌ను అలర్ట్ చేయడంతో పాటు హెల్ప్ లైన్ నెంబర్లు ఏర్పాటు చేసింది. అన్ని రైల్వేస్టేషన్లలో రైల్వే అధికారులు హెల్ప్ డెస్క్‌లు ఏర్పాటు చేశారు. జిల్లా కలెక్టర్ కార్యాలయల్లో ఎంక్వైరీ విభాగాలను ఏపీ ప్రభుత్వం ఏర్పాటు చేసింది. ఏపీకి చెందిన 70 మంది ఆచూకీ ఇంకా లభించలేదు. విజయవాడకు చెందిన దాదాపు 30 మంది ప్రయాణికులు ఒడిశా రైలు ప్రమాదంలో ఉన్నట్లు తెలుస్తోంది.

ఒడిశా రైలు ప్రమాద ఘటనపై సీఎం జగన్ ఉన్నత స్థాయి సమీక్ష నిర్వహించారు. మంత్రి అమర్‌నాథ్‌ నేతృత్వంలోని ముగ్గురు ఐఏఎస్‌ల బృందాన్ని ఏర్పాటు చేశారు. ఈ టీమ్ ప్రమాదం జరిగిన ప్రాంతానికి వెంటనే వెళ్లాలని ఆదేశించారు. ఘటనాస్థలానికి పంపించడానికి అంబులెన్స్‌లు సన్నద్ధం చేయాలని ఆదేశాలు జారీ చేశారు. ఎమర్జెన్సీ సేవల కోసం విశాఖ సహా ఒడిశా సరిహద్దు జిల్లాల్లోని శ్రీకాకుళం, విజయనగరం ఆస్పత్రులను అలర్ట్‌ చేశారు. ఏపీకి చెందిన ప్రయాణికుల సమాచారం కోసం ఒడిశా సీఎంవో, రైల్వే అధికారులుతో టచ్‌లో ఉండాలని సూచించారు.

ఈ ప్రమాదం నుండి ఏలూరుకు చెందిన ఘోర చంద్ పాల్, శ్రీకర్ బాబు బయటపడ్డారు. ఘోర చంద్ పాల్‌కు స్వల్ప గాయాలవ్వగా.. బాలేశ్వర్ ఆసుపత్రిలో చికిత్స పొందుతున్నాడు. ఇక శ్రీకర్ బాబు. ఏలూరు నుంచి తిరుగు పయనమయ్యాడు. షాలిమర్ నుండి తాడేపల్లిగూడెం రైల్వే స్టేషన్‌కు బయల్దేరిన ఉమా మహేశ్వరరావు (37), రంజిత్ దాలి (63) ఆచూకీ ఇంకా లభ్యం కాలేదు. ప్రయాణీకుల ఆచూకి కోసం ఏపీ ప్రభుత్వం ప్రత్యేక చర్యలు చేపడుతోంది. రైల్వే అధికారులతో ఎప్పటికప్పుడు సమాచారం సేకరిస్తోంది. ఒడిశా ఘోర ప్రమాదం నేపథ్యంలో ఏలూరు, తాడేపల్లి గూడెం జంక్షన్ల మీదుగా వెళ్లే 12 రైళ్లను రైల్వేశాఖ రద్దు చేసింది. మరో 8 రైళ్లను రైల్వే అధికారులు దారి మళ్లించారు.

ప్రమాదానికి సంబంధించిన వివరాలు, ఏపీ ప్రయాణికుల గురించి జగన్ ఎప్పటికప్పుడు అధికారుల నుంచి తెలుసుకుంటున్నారు. ఎప్పటికప్పుడు వివరాలను తనకు అందించాలని అధికారులకు జగన్ సూచించారు. కాగా మూడు రైళ్లు పరస్పరం ఢీకొట్టడంతో జరిగిన ఘోర ప్రమాదంలో ఇప్పటివరకు 288 మంది మరణించగా.. 980 మందికి తీవ్ర గాయాలయ్యాయి. మృతుల సంఖ్య అంతకంతకు పెరుగుతోంది. ప్రధాని మోదీ సాయంత్రం ఘటనా స్థలాన్ని పరిశీలించి సహాకయ చర్యల గురించి తెలుసుకోనున్నారు.