ఊతకర్ర లేకపోతే చంద్రబాబు రాజకీయంగా నిలబడలేరు: పెద్దిరెడ్డి రామచంద్రారెడ్డి

చంద్రబాబుకు ఊతకర్ర లేకపోతే రాజకీయంగా నిలబడలేరని  రాష్ట్ర విద్యుత్ శాఖ మంత్రి పెద్దిరెడ్డి రామచంద్రారెడ్డి విమర్శించారు. అందుకే అమిత్ షా, జేపీ నడ్డాలతో చంద్రబాబు గంటసేపు చర్చలు జరిపారని ఎద్దేవా చేశారు. కేంద్ర హోం మంత్రి అమిత్ షా, భారతీయ జనతా పార్టీ జాతీయ అధ్యక్షుడు జేపీ నడ్డాతో తెలుగు దేశం పార్టీ అధినేత చంద్రబాబునాయుడు భేటీపై మంత్రి పెద్దిరెడ్డి రామచంద్రారెడ్డి సెటైర్లు వేశారు. అనంతపురం జిల్లా కళ్యాణదుర్గంలో మంత్రి ఉషశ్రీ చరణ్ ఆధ్వర్యంలో వైసీపీ విజయోత్సవ మహాసభను నిర్వహించారు. ముఖ్యమంత్రి వైఎస్ జగన్మోహన్ రెడ్డి నాలుగేళ్ల పరిపాలన, గడప గడపకు మన ప్రభుత్వం దిగ్విజయంగా పూర్తి చేసిన సందర్భంగా ఈ మహాసభను ఏర్పాటు చేశారు.

ఈ కార్యక్రమానికి ముఖ్య అతిథిగా హాజరైన మంత్రి పెద్దిరెడ్డి రామచంద్రారెడ్డి మాట్లాడుతూ.. రెండు పేజీల మేనిఫెస్టోతో వచ్చిన వైఎస్ జగన్మోహన్ రెడ్డి, ఆ హామీలన్నీ నెరవేర్చారని చెప్పారు. అదే సమయంలో 2014లో టీడీపీ మేనిఫెస్టో ఏం చేశారో అందరికీ తెలుసన్నారు. అధికారంలోకి వచ్చిన వెంటనే ఒక్క హామీని కూడా నెరవేర్చకుండా, మేనిఫెస్టోను వెబ్‌సైట్ నుంచి కూడా తొలగించిన ఘనత టీడీపీది అని విమర్శించారు.

ఇక, ఎన్నికల్లో వైఎస్సార్ కాంగ్రెస్ పార్టీ ఒంటరిగానే వెళ్తుందని ఎన్నోసార్లు చెప్పామని మంత్రి పెద్దిరెడ్డి రామచంద్రారెడ్డి చెప్పారు. 2019లో ఎలా విజయం సాధించామో, 2024 ఎన్నికల్లో కూడా అంతే స్థాయిలో ఘన విజయం సాధిస్తామని ధీమా వ్యక్తం చేశారు. చంద్రబాబు రాజకీయంగా ఒంటరిగా నడిచే పరిస్థితిలో లేకపోవడం వల్లే.. నాలుగైదు పార్టీలతో పొత్తులు పెట్టుకునేందుకు వెంపర్లాడుతున్నారని ఎద్దేవా చేశారు. చంద్రబాబు ఎంత మందితో కలిసి వచ్చినా.. వైసీపీని ఏం చేయలేరని, వైఎస్ జగన్మోహన్ రెడ్డి మరోసారి ముఖ్యమంత్రి కావడం ఖాయమన్నారు.

ఇక, పాత అబద్ధపు హామీలతో, కొత్త అబద్ధపు హామీలు కలిపి చంద్రబాబు టీడీపీ మేనిఫెస్టోని విడుదల చేశారని మంత్రి పెద్దిరెడ్డి రామచంద్రారెడ్డి విమర్శించారు. 2014 ఎన్నికల్లో చంద్రబాబు 100 పేజీల మేనిఫెస్టోలో 600 హామీలు ఇచ్చారని, కానీ ఏ ఒక్క హామీని కూడా నెరవేర్చిన పరిస్థితి లేదని విమర్శించారు. వైసీపీ సంక్షేమ పథకాలను ప్రవేశపెడితే రాష్ట్రం శ్రీలంకగా మారుతుందని చంద్రబాబు విమర్శించారని.. ఇప్పుడు టీడీపీ ‘ఆల్ ఫ్రీ’ అంటూ తమ మేనిఫెస్టో తీసుకొచ్చిందని ఎద్దేవా చేశారు.

ఇదే సమయంలో వైసీపీ కేవలం రెండు పేజీల మేనిఫెస్టోతో వచ్చి 98.44 శాతం హామీలు నెరవేర్చిందని మంత్రి పెద్దిరెడ్డి రామచంద్రారెడ్డి పేర్కొన్నారు. ఇకపై టీడీపీ కార్యకర్తలు మేనిఫెస్టోతో ప్రజల్ని మభ్యపెట్టే పనిలో పడతారని.. రాష్ట్రంలో ఎవరెన్ని కుట్రలు పన్నినా వైఎస్ జగన్ గతంలో కంటే అధిక సీట్లు సాధించి అధికారంలోకి వస్తారని ధీమా వ్యక్తం చేశారు.