మృతదేహాలను ఇంకా గుర్తించాల్సి ఉంది: అమర్‌నాథ్
Andhra Pradesh Telugu | Suryaa Desk | Published : Mon, Jun 05, 2023, 06:10 PM
ఒడిశాలో జరిగిన రైలు ప్రమాదంపై రాష్ట్ర ఐటీ మంత్రి గుడివాడ అమర్‌నాథ్ కీలక వివరాలు వెల్లడించారు. ప్రమాదానికి గురైన రెండు రైళ్లలో.. ఏపీకి చెందిన 342 మందిని గుర్తించామని చెప్పారు. 9 మందికి విశాఖలో చికిత్స జరుగుతోందని వివరించారు. మొత్తం 276 మంది మృతి చెందినట్లు ఒడిశా ప్రభుత్వం ప్రకటించిందని.. అయితే.. 187 మృతదేహాలను ఇంకా గుర్తించాల్సి ఉందని.. మంత్రి అమర్‌నాథ్ చెప్పారు. వారిని గుర్తించాక.. పూర్తి స్పష్టత వస్తుందన్నారు.
అయితే.. రైల్వే శాఖ అధికారికంగా ప్రకటించిన మృతుల సంఖ్య 275 కాగా.. ఇప్పటివరకు మృతుల సంఖ్యపై స్పష్టత రాలేదు. జనరల్ బోగీల్లో ప్రయాణించిన వారి శవాలను గుర్తించడంలోనే సమస్య వస్తోందని అధికారులు చెబుతున్నారు. భువనేశ్వర్‌ ఎయిమ్స్‌లోనే ఇంకా 150కి పైగా మృతదేహాలు ఉన్నాయి. వారిని గుర్తించడం సాధ్యం కాకపోతే.. రైల్వే శాఖ అధికారులే సామూహిక ఖననం చేసే అవకాశం ఉంది.
మరోవైపు.. రైలు ప్రమాదంపై సీబీఐ రంగంలోకి దిగింది. లోకో పైలట్ వైఫల్యం కాదని అధికారులు నిర్ధారణకు వచ్చారు. ఈ ఘటనలో కుట్ర కోణం వెలుగులోకి రావడంతో.. సీబీఐ అధికారులు భువనేశ్వర్‌లో కీలక సమావేశం నిర్వహించారు. మొన్న జరిగిన ప్రమాదం అలా ఉంటే.. తాజాగా మరో యాక్సిడెంట్ జరిగింది. ఒడిశాలోని బారాగఢ్‌లో గూడ్స్ రైలు పట్టాలు తప్పింది. లైమ్‌స్టోన్‌ను తీసుకెళ్తుండగా ఐదు బోగీలు పట్టాలు తప్పాయి. ఆ సమయంలో అటువైపు ఏ రైళ్లు రాకపోవడంతో పెనుప్రమాదం తప్పింది.
|
|