కొండేపి నియోజకవర్గంలో హైటెన్షన్ వాతావరణం,,,టీడీపీ ఎమ్మెల్యే ముట్టడికి పిలుపునిచ్చిన వైసీపీ

ప్రకాశం జిల్లా కొండేపి నియోజకవర్గంలో హైటెన్షన్ వాతావరణం నెలకొంది. టీడీపీ ఎమ్మెల్యే బాల వీరాంజనేయ స్వామి ఇంటిని ముట్టడించడానికి.. వైసీపీ నేత వరికూటి అశోక్ బాబు పిలుపునిచ్చారు. టీడీపీ అధికారంలో ఉండగా.. కేంద్ర ప్రభుత్వం అమలు చేసిన స్వచ్ఛభారత్ కార్యక్రమంలో కొండేపి ఎమ్మెల్యే స్వామి అక్రమాలకు పాల్పడ్డారంటూ.. వైఎస్సార్సీపీ నిరసన కార్యక్రమానికి పిలుపునిచ్చింది. 2 వేల మందితో కలిసి.. చెంబులతో ఎమ్మెల్యే ఇంటి ముట్టడికి అశోక్ బాబు యత్నించారు. వారిని పోలీసులు అడ్డుకున్నారు.

పోలీసులు అడ్డుకోవడంతో.. పార్టీ నాయకులు, కార్యకర్తలతో కలిసి టంగుటూరు వైసీపీ ఆఫీస్ ఎదుట ప్లకార్డులు పట్టుకుని వరికూటి అశోక్ బాబు నిరసన వ్యక్తం చేశారు. అటు టీడీపీ కేడర్ కూడా వైసీపీకి పోటీగా ర్యాలీ నిర్వహించే ప్రయత్నం చేశారు. ఈ క్రమంలో ఎమ్మెల్యే డోలాను, కార్యకర్తలను పోలీసులు అడ్డుకున్నారు. ఆ సమయంలో.. ఎమ్మెల్యే చొక్కా చిరిగిపోయింది. పరిస్థితి ఉద్రిక్తంగా మారడంతో.. పోలీసులు ఆయన్ను అక్కడి నుంచి తరలించారు. ఈ ఘటనపై ప్రతిపక్ష నేత చంద్రబాబు స్పందించారు.

'కొండపి ఎమ్మెల్యే డోలా బాల వీరాంజనేయ స్వామిపై ప్రభుత్వ కక్ష సాధింపు చర్యలను తీవ్రంగా ఖండిస్తున్నా. నాడు అసెంబ్లీలో దాడి నుంచి నేటి అక్రమ అరెస్టు వరకు.. ప్రతి చర్య దళిత నాయకుడైన స్వామి గొంతు నొక్కేందుకు చేస్తున్న కుట్రే. తమ పట్ల ప్రభుత్వం అనుసరిస్తున్న అహంకార ధోరణిని దళిత సమాజం గమనిస్తోంది. మీకు బుద్ది చెప్పడానికి సిద్దం అయ్యింది. నా సోదరుడు స్వామి.. మీ అక్రమ అరెస్టులకు, వేధింపులకు భయపడే నేత కాదు. ఎదిరించి పోరాడే నాయకుడు. పోలీసులు వైసీపీ క్రియాశీల కార్యకర్తల్లా కాకుండా.. చట్టబద్దంగా వ్యవహరించాలి. వెంటనే స్వామిని విడుదల చేయాలి' అని చంద్రబాబు డిమాండ్ చేశారు.