ఇలా దాడులు చేయడం సమంజసమేనా: దేవినేని ఉమా

ప్రతిపక్ష నేతలపై ఇలా దాడులు చేయడం సమంజసమేనా అని టీడీపీ   సీనియర్ నేత, మాజీ మంత్రి దేవినేని ఉమామహేశ్వరరావు ప్రశ్నించారు. వైఎస్సార్ కాంగ్రెస్ పార్టీ ప్రభుత్వాన్ని ప్రశ్నిస్తున్నందుకే తెలుగు దేశం పార్టీ రాష్ట్ర అధికార ప్రతినిధి ఆనం వెంకట రమణారెడ్డిపై దాడి చేశారని ఆయన ఆరోపించారు. ఈ మేరకు నెల్లూరులో సోమవారం నిర్వహించిన మీడియా సమావేశంలో దేవినేని ఉమా మాట్లాడుతూ.. ఇంకెంత మందిపై ఇలా దాడి చేస్తారు? మీ కళ్లమంట చల్లారలేదా అంటూ ఫైరయ్యారు.

రాష్ట్రంలో ప్రజా సమస్యలపై పోరాడటమే తప్పా అని దేవినేని ఉమా ప్రశ్నించారు. రాష్ట్రంలో ఇదెక్కడి సంస్కృతి అని నిలదీశారు. రాష్ట్రం ఎటు పోతుందో అర్థం కాని పరిస్థితి నెలకొందని ఆందోళన వ్యక్తం చేశారు. ముఖ్యమంత్రి వైఎస్ జగోన్మోహన్ రెడ్డి ఆజ్ఞ లేనిదే ఇలాంటి దాడులు జరగవని అనుమానం వ్యక్తం చేశారు. రాష్ట్రంలో ప్రతిపక్ష నాయకులతో పాటు టీడీపీ కార్యాలయంపై కూడా దాడులు చేశారని ఫైరయ్యారు. ఈ దాడుల కుట్రదారులెవరో బయటకు రావాల్సి ఉందన్నారు. ఆనం వెంకట రమణారెడ్డిపై దాడికి మంత్రి కాకాణి గోవర్ధన్ రెడ్డి, ముఖ్యమంత్రి జగన్మోహన్ రెడ్డి బాధ్యత వహించాలని డిమాండ్ చేశారు. సీఎం జగన్మోహన్ రెడ్డి కనుసన్నల్లో.. రాష్ట్ర ప్రభుత్వ సలహాదారు సజ్జల రామకృష్ణారెడ్డి డైరెక్షన్‌లోనే ఈ దాడులు జరుగుతున్నాయని ఆనుమానం వ్యక్తం చేశారు. ప్రతిపక్ష నేతల మీద జరుగుతున్న దాడులపై ఎస్పీ, డీఐజీ, డీజీపీ సమాధానం చెప్పాలని దేవినేని ఉమా డిమాండ్‌ చేశారు.

టీడీపీ రాష్ట్ర అధికార ప్రతినిధి ఆనం వెంకట రమణారెడ్డిపై దుండగులు దాడికి యత్నించారు. నెల్లూరు నగరంలో ఆదివారం మధ్యాహ్నం ఈ సంఘటన చోటుచేసుకుంది. మధ్యాహ్నం సుమారు 1.10 గంటల సమయంలో బీవీ నగర్‌లో ఉన్న కిలారి వెంకటస్వామి నాయుడు అపార్ట్‌మెంట్‌లోని తన కార్యాలయం నుంచి కిందికి దిగుతున్న ఆనంపై కొందరు యువకులు కర్రలతో దాడి చేసేందుకు ప్రయత్నించారు. వెంటనే అప్రమత్తమైన టీడీపీ నాయకులు, ఆనం అనుచరులు వారిని ప్రతిఘటించారు. స్థానికుల కేకలతో అక్కడి నుంచి పరారయ్యారు. వారు తీసుకొచ్చిన రెండు ద్విచక్ర వాహనాలు, కర్రలు అక్కడే వదిలి వెళ్లిపోయారు.