ఏపీకి భారీగా ఎంబీబీఎస్ సీట్లు మంజూరు,,,ఈ నాలుగేళ్లలో 702 సీట్లు పెరుగుదల
Andhra Pradesh Telugu | Suryaa Desk | Published : Wed, Jun 07, 2023, 06:05 PM
ఏపీ వైద్య విద్యలో మహర్థశ మొదలైంది. ఆంధ్రప్రదేశ్ రాష్టానికి ఒకేసారి కొత్తగా 750 ఎంబీబీఎస్ సీట్లతోపాటు.. అదనంగా 510 పీజీ వైద్య సీట్లు మంజూరు అయ్యాయి. వైద్య విద్యా రంగం గతంలో ఎన్నడూ లేని విధంగా పీజీ సీట్లు పెరుగుతున్నాయి. వైద్య విద్యను బలోపేతం చేస్తూ.. ప్రభుత్వం తీసుకున్న చర్యల కారణంగా.. 702 పీజీ సీట్లు కొత్తగా మంజూరయ్యాయి. వైఎస్ జగన్ మోహన్ రెడ్డి అధికారంలోకి రాగానే.. వైద్య రంగంలో అనేక మార్పులకు శ్రీకారం చుట్టారు.
కొత్తగా 17 మెడికల్ కాలేజీలను ఏర్పాటు చేశారు. వీటితో పాటు.. అప్పటికే ఉన్న 11 మెడికల్ కాలేజీలపై ఫోకస్ పెట్టారు. వసతులను కల్పించారు. జాతీయ వైద్య కమిషన్‌ నిబంధనలకు అనుగుణంగా.. కళాశాలల్లో వైద్యులు, సిబ్బందిని నియమించారు. ఫలితంగా 1956 నుంచి ఇప్పటివరకు రాష్ట్ర చరిత్రలో ఎన్నడూలేని విధంగా రికార్డు స్థాయిలో వైద్య సీట్లు పెరిగాయి.
ఏపీలోని పది వైద్య కళాశాలల్లో నాలుగేళ్ల కిందటి వరకూ.. 966 పీజీ సీట్లు మాత్రమే ఉన్నాయి. నెల్లూరు జిల్లా ఏసీఎస్‌ఆర్‌ కాలేజీలో ఒక్క పీజీ సీటు కూడా లేదు. అలాంటిది నాలుగేళ్లలో వరుసగా 2020లో 24 సీట్లు, 2021లో 31 సీట్లు, 2022లో 137 సీట్లు చొప్పున రాష్ట్రానికి అదనంగా పీజీ సీట్లు సమకూరాయి. 2023లో 737 సీట్లు పెంచాలని ఎన్‌ఎంసీకి ప్రతిపాదించగా.. ఇప్పటి వరకు 510 సీట్లు మంజూరయ్యాయి. మిగిలిన సీట్ల పెంపు ప్రక్రియ కొనసాగుతోందని అధికారులు చెబుతున్నారు.
|
|