మంత్రి పదవి రాకపోవడంవల్లే ఆనం అలా చేశారు...,నెదురుమల్లి రామ్ కుమార్ రెడ్డి

ఎమ్మెల్యే ఆనం విషయం మొదటి నుంచి ఊహించినదేనని వైసీపీ నేత నెదురుమల్లి రామ్ కుమార్ రెడ్డి  అన్నారు. మంత్రి పదవి రాలేదని ప్రభుత్వంపై ఆనం రాంనారాయణ రెడ్డి విమర్శలు చేశారని, గడిచిన నాలుగు సంవత్సరాల్లో వెంకటగిరిని కలుషితం చేశారని నేరుమల్లి ఆరోపించారు. ఎక్కడికక్కడ అవినీతి, అక్రమాలు చేశారని పేర్కొన్న ఆయన.. మంత్రివర్గ విస్తరణలో అయినా పదవి దక్కుతుందని ఎదురు చూశాడని ఆరోపించారు. వైసీపీని బ్రష్టుపట్టించాలనే తెలుగుదేశం పార్టీకి కొమ్ము కాశారని, నియోజకవర్గంలో జరగాల్సిన అభివృద్ధి పనులన్నీ ఆపారని మండిపడ్డారు. ఆనం రాంనారాయణ విషయం తెలుసుకునే ముఖ్యమంత్రి వైఎస్ జగన్మోహన్ రెడ్డి ఆయన్ను పక్కన పెట్టారన్నారు. వెంకటగిరి మున్సిపాలిటీలోని జగనన్న కాలనీలో జరిగిన అవకతవకలు బయటపెడతానని ఆయన హెచ్చరించారు. రాజకీయ చరిత్ర అని చెప్పుకునే ఆనం కుటుంబం ఎంత మందిని ఎమ్మెల్యేలను, ఎంపీలను చేసిందని ప్రశ్నించారు.

ఇక నెల్లూరులో ఆనం వెంకటరమణారెడ్డిపై జరిగిన దాడి హేయమైన చర్యే అని నేదురుమల్లి రామ్ కుమార్ రెడ్డి అన్నారు. పోలీసులు ఆ ఘటనపై దర్యాప్తు చేస్తున్నారని చెప్పారు. అయితే ఈ దాడి జరిగిన రోజును ఆనం రామనారాయణరెడ్డి బ్లాక్ డే అన్నారని.. కానీ అదే ఆనం వెంకటరమణారెడ్డిపై గతంలో ఆనం రామనారాయణరెడ్డి కర్ర తీసుకుని దాడి చేయడానికి వెళ్లారని గుర్తు చేశారు. ఆ ఘటనపై పోలీస్ స్టేషన్‌లో కూడా ఫిర్యాదు చేశారని తెలిపారు.

దీనికి ఆనం రాంనారాయణ రెడ్డి ఏ బదులు ఇస్తారని నేదురుమల్లి రామ్ కుమార్ రెడ్డి ప్రశ్నించారు. ఇక, రాజ్యాంగ బద్ధంగా ఎన్నికైన ఎమ్మెల్యేలను గతంలో కొనుగోలు చేసిన టీడీపీ.. ఇప్పుడు కూడా వైసీపీ సస్పెండ్ ఎమ్మెల్యేలను తీసుకుంటోందని దుయ్యబట్టారు. ఇలా చేయడం వల్ల వైసీపీకి నష్టం ఏమీ లేదన్నారు. మంత్రి పదవి ఇవ్వ లేదని టీడీపీలోకి వెళ్లే ఆనం రాంనారాయణ రెడ్డికి ఆ పార్టీలో మంత్రి పదవి ఇస్తారా అని ప్రశ్నించారు. అసలు తెలుగు దేశం పార్టీ ప్రభుత్వం వచ్చే అవకాశం లేదని రామ్ కుమార్ రెడ్డి ఎద్దేవా చేశారు. 2024లో మళ్లీ అధికారంలోకి రాబోయేది వైసీపీ ప్రభుత్వమే అని ఆయన ధీమా వ్యక్తం చేశారు.