తాగునీరు అపరిశుభ్రంగా ఉన్నాయని.. మంగళగిరిలో మహిళల ఆందోళన

మంగళగిరిలో ఉన్న టిడ్కో ఇళ్లకు సరఫరా చేస్తున్న తాగునీరుపై స్థానికులు ఆందోళనకు దిగారు. తమకు సరఫరా అవుతున్న నీళ్లు మరీ దారుణంగా ఉన్నాయని.. ఇలాంటి నీళ్లను తాగితే అనారోగ్యంపాలవడంతో పాటూ ప్రాణాలు పోయే ప్రమాదం ఉందంటున్నారు. ఇలాంటి నీటిని ఇచ్చే కంటే విషం ఇచ్చి మమ్మల్ని చంపేయండి అంటూ ఓ మహిళ ఆవేదన వ్యక్తం చేశారు. స్థానిక ఎమ్మెల్యే ఆళ్ల రామకృష్ణారెడ్డి, అధికారులు ఇలాంటి నీటిని మీరు తాగగలరా? వాడుకోగలరా? అంటూ ప్రశ్నించారు.

ఇలాంటి నీటిని 1728 ఇళ్లకి, సుమారు 6000 మందికి అందిస్తున్నారన్నారు స్థానిక మహిళ. ఎమ్మెల్యే ఆళ్ల రామకృష్ణారెడ్డి కొండలు గుట్టలు పట్టుకుని తిరగటం కాదు.. ఈ నీళ్లను ఓసారి చూడాలన్నారు. అధికారులు కమిషనర్ ఏం చేస్తున్నారో తెలియదని.. వీటి కన్నా చెరువులో నీళ్లు చాలా నయం అంటున్నారు. పెద్దవారు చిన్న పిల్లలు అందరూ ఈ నీళ్లు తాగి వ్యాధుల బారిన పడుతున్నారని.. ఒళ్లు దురదలు, చర్మవ్యాధులు వస్తున్నాయని చెప్పుకొచ్చారు.

ఎమ్మెల్యేకు, అధికారులకు ట్యాంకును క్లీన్ చేయించడం చేతకాకపోతే, తీరిక లేకపోతే తామే స్వయంగా చేసుకుంటామంటున్నారు. తమకు సప్లై అయ్యే నీటిని చూసి మంగళగిరి టిడ్కో గృహవాసులు ఆవేదన వ్యక్తం చేశారు. ఈ వీడియో సోషల్ మీడియాలో వైరల్ అవుతోంది. ఈ విషయం తెలియడంతో టీడీపీ జాతీయ ప్రధాన కార్యదర్శి, మంగళగిరి నియోజకవర్గ టీడీపీ ఇంఛార్జ్ నారా లోకేష్ ట్విట్టర్ వేదికగా స్పందించారు.

మంగళగిరి పట్టణంలోని టిడ్కో గృహాలకు ప్రాణాంతకమైన తాగునీటి సరఫరా చూసి ఆందోళనకు గురయ్యాను అన్నారు. దాదాపు 9 వేల మంది నివసిస్తున్న ఈ ప్రాంతంతో పాటు ఏపీఐఐసీ, ఇతర సంస్థలకీ కలుషిత నీరు సరఫరా చేయడం దారుణమన్నారు. స్థానికుల ఫిర్యాదుతో టీడీపీ నేతలు ఫిల్టర్ బెడ్స్, పచ్చగా మారిన నీరు, అక్కడి అపరిశుభ్ర పరిస్థితులు పరిశీలించి తన దృష్టికి తీసుకొచ్చారని తెలిపారు. టిడ్కో నివాసితులకి తక్షణమే సురక్షితమైన తాగునీరు సరఫరా చేయాలని డిమాండ్ చేస్తున్నామని.. ప్రభుత్వానికి చేతకాకపోతే, తాము సొంత నిధులతో ఫిల్టర్ బెడ్స్ క్లీన్ చేయించి సురక్షితమైన తాగునీరు అందిస్తామన్నారు. ఈ నీళ్ల వ్యవహారంపై అధికారులు స్పందించాల్సి ఉంది.