టీడీపీలో చేరబోతున్న....వచ్చే ఎన్నికల్లో పోటీ చేస్తా....హాస్య నటుడు సప్తగిరి

వచ్చే ఎన్నికల్లో పోటీచేస్తానని... టీడీపీలో చేరబోతున్నట్లు సినీ నటుడు సప్తగిరి వెల్లడించారు. తిరుపతిలో జరిగిన ఓ ప్రైవేట్ కార్యక్రమంలో పాల్గొన్న ఆయన.. తన పొలిటికల్ ఎంట్రీపై క్లారిటీ ఇచ్చారు. తనది చిత్తూరు జిల్లానే అని.. పేదల కష్టాలు తెలుసని.. పేదలకు సేవ చేయడానికి ఏ చిన్న అవకాశం వచ్చినా తన వంతు కృషి చేస్తాను అన్నారు. టీడీపీ నుంచి ఆఫర్ ఉన్నమాట వాస్తవమని.. కాకపోతే ముందే చెప్పడం సరికాదన్నారు. మరో 10, 15 రోజుల్లో శుభవార్త చెబుతాను అంటున్నారు.

చంద్రబాబు డెవలప్‌మెంట్‌ను అందరూ చూశారని.. తాను ఎన్నికల్లో పోటీచేయడంపై పార్టీ పెద్దలు నిర్ణయం తీసుకుంటారన్నారు సప్తగిరి. ఇప్పటికే నారా లోకేష్‌ను పాదయాత్రలో కలిశానని చెప్పుకొచ్చారు. తాను నిజాయితీతో సినిమారంగంలో మంచి, మంచి అవకాశాలను దక్కించుకోగలిగానని.. అలాగే రాజకీయాల్లో కూడా మంచి పేరు తెచ్చుకుంటాను అంటున్నారు. తనకు సినిమా వల్లే రాజకీయంగా అవకాశాలు వచ్చాయని.. సినిమాలను వదిలేసేది లేదన్నారు.

చిత్తూరు జిల్లాతో తనకు అనుబంధం ఉందన్నారు సప్తగిరి. తాను ఐరాలలో పుట్టాననని.. బంగారుపాళ్యం, పుంగనూరులో చదివాను అన్నారు. తెలుగుదేశం పార్టీ నుంచి అవకాశం వస్తే చిత్తూరు జిల్లాలోని పార్లమెంటు కానీ, అసెంబ్లీకి కానీ పోటీకి సిద్ధంగా ఉన్నట్లు ప్రకటించారు. చంద్రబాబు, లోకేష్‌ లు ఏం ఆదేశిస్తే అది చేయడానికి సిద్ధంగా ఉన్నానని.. టీడీపీ అధికారంలో తెచ్చేందుకు తన సేవలు అవసరమైతే రాష్ట్రవ్యాప్తంగా ప్రచారం చేయడానికి సిద్ధమన్నారు. సప్తగిరి తాను టీడీపీలో చేరబోతున్నట్లు నేరుగా ప్రకటించారు. అలాగే ఎన్నికల్లో పోటీకి రెడీ అన్నారు.. ఈ ప్రకటనపై టీడీపీ ఎలా స్పందిస్తుందన్నది చూడాలి.

చిత్తూరు జిల్లా నుంచి సినిమా ఇండస్ట్రీలోకి వెళ్లి.. ఇటు రాజకీయాల్లో రాణిస్తున్నవారు లేకపోలేదు. రోజా టీడీపీలో చేరి రాజకీయాల్లోకి అడుగు పెట్టారు.. ఎన్నికల్లో పోటీచేసి ఓడిపోయారు. ఆ తర్వాత రాజకీయ పరిణామాలతో వైఎస్సార్‌సీపీ కండువా కప్పుకుని.. నగరి నియోజకవర్గం నుంచి పోటీచేసి విజయం సాధించారు.. ఇప్పుడు ఏకంగా జగన్ కేబినెట్‌లో పర్యాటకశాఖ మంత్రి కూడా అయ్యారు. అంతేకాదు దివంగత నటుడు, చిత్తూరు మాజీ ఎంపీ శివప్రసాద్ కూడా సినిమాల్లో నటించారు.. చంద్రబాబుతో ఉన్న స్నేహంతో టీడీపీలో చేరి రాజకీయాల్లోకి అడుగుపెట్టారు. చిత్తూరు నుంచి ఎంపీగా విజయం సాధించారు. ఇప్పుడు సప్తగిరి కూడా అదేబాటలో నడుస్తున్నారు.. టీడీపీలో చేరి పొలిటికల్ ఎంట్రీకి సిద్ధమయ్యారు. సప్తగిరి కూడా రోజా, శివప్రసాద్‌లా టీడీపీలో చేరి తన అదృష్టాన్ని పరీక్షించుకోబోతున్నారు.. మరి ఆయన ఏ మేరకు సక్సెస్ అవుతారో చూడాలి.