హనీమూన్ కోసం బాలి దీవికి కొత్త జంట,,,ఫోటో షూట్ చేసుకుంటుండంగా ప్రమాదం
national | Suryaa Desk | Published : Mon, Jun 12, 2023, 10:31 PM
పెళ్లైన తర్వాత హనీమూన్‌కు వెళ్లిన నవ దంపతులు ప్రమాదవశాత్తూ సముద్రంలో పడి మృత్యువాతపడ్డారు. ఇండోనేషియాకు వెళ్లిన తమిళనాడు జంట.. వాటర్‌బైక్‌పై ప్రయాణిస్తూ ఫోటో షూట్ చేస్తుండగా అనుకోకుండా సముద్రంలో పడి ప్రాణాలు పోగొట్టుకున్నారు. వివరాల్లోకి వెళ్తే.. తిరువళ్లూరు జిల్లా పూనమల్లి సమీపం సెన్నీర్‌కుప్పానికి చెందిన డాక్టర్ విభూషిణియాకు.. చెన్నైకి చెందిన లోకేశ్వరన్‌తో జూన్ 1న వివాహం జరిగింది. పెళ్లైన నాలుగు రోజుల తర్వాత హనీమూన్ కోసం ఇండోనేసియాలోని బాలీ దీవికి వెళ్లారు.
ఈ క్రమంలో జూన్ 9న అక్కడ సముద్రంలో బోటు షికారుకు వెళ్లి.. ఫోటో షూట్ చేసుకుంటున్నారు. ఒక్కసారిగా బోటు బోల్తాపడటంతో ఇద్దరూ సముద్రంలో పడి మృతిచెందారు. అక్కడ ఉన్నవారు వెంటనే లోకేశ్వరన్‌ మృతదేహాన్ని వెలికితీశారు. శనివారం విభూషిణియా మృతదేహం లభ్యమైంది. రెండు మృతదేహాలను తమిళనాడుకు తీసుకురావడానికి కుటుంబసభ్యులు ప్రయత్నిస్తున్నారు. ఈ విషయంలో తమిళనాడు ప్రభుత్వం, కేంద్ర ప్రభుత్వాలను సంప్రదించింది. బాధిత కుటుంబసభ్యుల విన్నపంపై స్టాలిన్ ప్రభుత్వం సానుకూలంగా స్పందించింది. మృతదేహాలను తీసుకొచ్చేందుకు ఏర్పాట్లు చేసింది.
మరోవైపు, ఘటనపై అక్కడ పోలీసులు కేసు నమోదు చేసి దర్యాప్తు చేస్తున్నారు. విచారణ కొనసాగుతున్నందున విషాదానికి దారితీసిన ఖచ్చితమైన సమాచారం ఇంకా వెల్లడి కాలేదు. ఇండోనేషియా నుంచి నేరుగా చెన్నైకు విమాన సర్వీసులు లేకపోవడంతో మలేసియా మీదుగా మృతదేహాలు రానున్నాయని బాధిత కుటుంబాలు తెలిపారు.
|
|