ఆషాడ ఏకాదశి రోజున పండూర్పూర్‌లో ప్రత్యేక పూజలు,,,భక్తులపై లాఠీఛార్జ్

భక్తులపై పోలీసులు లాఠీఛార్జికి దిగిన ఘటన మహారాష్ట్రలో తీవ్ర రాజకీయ దుమారానికి కారణమవుతోంది. పండార్పూర్‌లోని వార్కారీ భక్తులు, పోలీసుల మధ్య గొడవ జరిగి చివరకు లాఠీఛార్జికి దారితీసింది. విఠోబా (శ్రీకృష్ణుడు)లైన వార్కారీ భక్తులపై లాఠీచార్జి జరగడం ఇదే మొదటిసారి. పూణెకు 22 కిలోమీటర్ల దూరంలోని అలందిలో ఉన్న శ్రీ క్షేత్ర ఆలయంలోకి భక్తులు వెళ్తున్న సమయంలో ఈ ఘటన చోటుచేసుకుంది. పోలీసులు, భక్తులకు మధ్య మొదలైన గొడవ చినిచినికి గాలివానలా మారి పోలీసులు లాఠీలకు పనిచెప్పారు. భక్తులపై లాఠీచార్జి చేసిన దృశ్యాలు సోషల్ మీడియాలో వైరల్ అయ్యాయి. దీంతో ప్రభుత్వంపై ప్రతిపక్షాలు దుమ్మెత్తి పోస్తున్నాయి.

అయితే, పోలీసులు మాత్రం భక్తులను అదుపు చేయడానికే స్వల్పంగా లాఠీఛార్జి చేసినట్టు తెలిపారు. ఆలయ ప్రాంగణంలోకి ప్రవేశానికి 75 మందికి మాత్రమే అనుమతి ఉండగా.. 400 మంది ఒక్కసారిగా చొచ్చుకెళ్లేందుకు ప్రయత్నించారని చెబుతున్నారు. అందుకే వారిని నిలువరించడానికి లాఠీచార్జి చేసినట్టు వివరణ ఇచ్చారు. అంతేకాదు, ఇది లాఠీఛార్జి కాదని, చిన్నపాటి గొడవ మాత్రమేనని డిప్యూటీ సీఎం దేవేంద్ర ఫడ్నవీస్ పేర్కొన్నారు. వార్కారీలపై లాఠీఛార్జి జరగలేదని స్పష్టం చేశారు. బారికేడ్లను విరగ్గొట్టడంతోనే పోలీసులు వారిని అదుపుచేసే ప్రయత్నం చేశారని వివరించారు. ఈ ఘటనలో కొంత మంది పోలీసులు కూడా గాయాలైనట్టు పేర్కొన్నారు.

ఆషాడ ఏకాదశి రోజున అలంది పండార్పూర్‌కు సంత్ ధ్యానేశ్వర్ మహారాజ్ సమాధి మందిరాన్ని దర్శించుకోడానికి ఏటా పెద్ద సంఖ్యలో భక్తులు వస్తుంటారు. ఆదివారం ఏకాదశి కావడంతో వార్కారీ భక్తులు భారీగా చేరుకున్నారు. ఈ సమయంలో పోలీసులు, భక్తుల మధ్య ఘర్షణ చోటుచేసుకుంది.

అటు, వార్కారీ భక్తులపై జరిగిన దాడిపై శివసేన (ఉద్ధవ్ వర్గం) సీనియర్ ఎంపీ సంజీవ్ రౌత్ మండిపడ్డారు. హిందుత్వ ప్రభుత్వం ముసుగు తొలగిందని, ఔరంగజేబు కూడా దీనికి భిన్నంగా ప్రవర్తించలేదని ఆయన ధ్వజమెత్తారు. మహారాష్ట్రలోకి తిరిగి ముస్లింలు వచ్చేశారని విమర్శించారు. భక్తులపై దాడిని ఎన్సీపీ నేత చగన్ భుజ్‌బల్ కూడా ఖండించారు. ఎన్సీపీ వర్కింగ్ ప్రెసిడెంట్ సుప్రియా సూలే, మహారాష్ట్ర కాంగ్రెస్ అధ్యక్షుడు నానా పటోలే సహా ప్రతిపక్ష నేతలు దీనిపై ఉన్నత స్థాయి విచారణ జరిపించాలని డిమాండ్ చేశారు.

అయితే, ఈ విమర్శలను మహారాష్ట్ర డిప్యూటీ సీఎం దేవేంద్ర ఫడ్నవీస్ తోసిపుచ్చారు. ఇది కేవలం చిన్నపాటి గొడవ మాత్రమే అని అన్నారు. గతేడాది తలెత్తిన తొక్కిసలాట పరిస్థితిని దృష్టిలో ఉంచుకుని.. రద్దీ నియంత్రణకు పోలీసులు ముందస్తు చర్యలు తీసుకున్నట్టు ఫడ్నవీస్ తెలిపారు. ప్రతిపక్షాలు లేనిపోని రద్దాంతం చేస్తున్నాయని దుయ్యబట్టారు.