ఆస్పత్రిలో సర్జికల్ వార్డులో 10 పాము పిల్లలు,,,అవాక్కైన ఆస్పత్రి సిబ్బంది
national | Suryaa Desk | Published : Wed, Jun 21, 2023, 09:33 PM
ఆపరేషన్ థియేటర్లో పాము కనిపిస్తే.. అమ్మ బాబోయ్! ఇంకేమైనా ఉందా..? అలాంటిది ఒక్కటి కాదు, రెండు కాదు.. 10 పాము పిల్లలు కనిపించాయి. వరుసబెట్టి ఒకదాని తర్వాత మరొకటి వచ్చాయి. అన్నీ నాగుపాము పిల్లలే. అప్రమత్తమైన ఆస్పత్రి సిబ్బంది వెంటనే సర్జికల్ వార్డులోని రోగులను ఇతర వార్డులకు తరలించారు. అనంతరం ఆస్పత్రిలోని పేషంట్లందరినీ మరొక ఆస్పత్రికి తరలించి ఆ ఆస్పత్రిని తాత్కాలికంగా మూసివేశారు. కేరళలోని మలప్పురం జిల్లాలో ఈ ఘటన చోటు చేసుకుంది.
మలప్పురం జిల్లా పెరింతల్మన్న ప్రాంతంలో ఉన్న ఈ జిల్లా ఆస్పత్రి చుట్టూ దట్టమైన పొదలు ఉన్నాయి. అంతేకాకుండా ఆస్పత్రిలోని ఫ్లోర్ ధ్వంసమైంది. చాలా చోట్ల టైల్స్ విరిగిపోయి, నెర్రెలు ఏర్పడ్డాయి. ఈ రంధ్రాల ద్వారా విష సర్పాలు వచ్చి ఉండవచ్చునని ఆస్పత్రి సిబ్బంది భావిస్తున్నారు. అలా వచ్చిన ఓ తాచు పాము.. సర్జికల్ వార్డు పరిసర ప్రాంతంలో ఓ చోట పిల్లల్ని చేసి ఉంటుందని అనుమానిస్తున్నారు.
మూడు రోజుల వ్యవధిలో సర్జికల్ వార్డు, దాని ప్రాంగణంలో 10 పాములు కనిపించాయని సిబ్బంది తెలిపారు. రోగుల భద్రతను దృష్టిలో ఉంచుకొని, వార్డులో ఉన్న 8 మంది పేషంట్లను మరో వార్డుకు బదిలీ చేశామని వారు చెప్పారు. కొన్ని రోజుల కిందట కన్నూర్ జిల్లాలోని ప్రభుత్వ ఆసుపత్రిలోనూ ఇలాంటి ఘటనే చోటు చేసుకుంది. తన కుమార్తెను డెలివరీ నిమిత్తం ఆస్పత్రికి తీసుకొచ్చిన 55 ఏళ్ల మహిళ.. వార్డులో నేలపై నిద్రపోయారు. అర్ధరాత్రి ఆమెను విషసర్పం కాటేసింది. వెంటనే చికిత్స అందించడంతో వారం రోజుల తర్వాత కోలుకున్నారు.
|
|