ఇంటి పెరట్లో ఆడుకుంటోన్న 9 ఏళ్ల బాలిక,,,ఒక్కసారిగా దాడిచేసిన మూడు వీధి కుక్కలు

సోషల్ మీడియా వచ్చాక  ఎక్కడ ఏ ఘోరం జరిగినా వెంటనే బయటి ప్రపంచానికి తెలిసిపోతోంది.  తన ఇంటి పెరట్లో ఆడుకుంటోన్న ఓ చిన్నారిపై వీధి కుక్కలు యమ దూతల్లా దాడి చేశాయి. ఈ దాడిలో తీవ్రంగా గాయపడిన చిన్నారి.. ప్రస్తుతం ఆస్పత్రిలో చావుబతుకుల మధ్య కొట్టుమిట్టాడుతోంది. కేరళలో ఈ దారుణం చోటుచేసుకోగా.. ఈ ఘటన అంతా అక్కడ సీసీటీవీ పుటేజీలో రికార్డయ్యింది. ఆ వీడియో ప్రస్తుతం సోషల్ మీడియాలో వైరల్‌ అవుతోంది. కేరళలోని కన్నూర్‌ జిల్లా పచకారా గ్రామానికి చెందిన జాన్వీ అనే తొమ్మిదేళ్ల బాలిక తన ఇంటి పెరట్లో ఆడుకుంటోంది. ఈ సమయంలో మూడు వీధి కుక్కలు ఆమెపై దాడి చేశాయి. చిన్నారిని ఈడ్చుకెళ్లిన కుక్కలు విచక్షణారహితంగా కరిచాయి. ప్రాణ భయంతో బాలిక ఆర్తనాదాలు చేయడం వీడియోలో స్పష్టంగా కనిపిస్తోంది.

బాలిక చేతులు, కాళ్లు, తలపై పదే పదే కరిచిన కుక్కలు తీవ్రంగా గాయపరిచాయి. సహాయం కోసం ఆ చిన్నారి కేకలు వేయడంతో చుట్టుపక్కలవారు వెంటనే అక్కడికి చేరుకుని జాన్వీని రక్షించారు. వారిని చూసి కుక్కల అక్కడ నుంచి పరారయ్యారు. అయితే, ఈ దాడిలో బాలిక తల, మెడ, పొత్తికడుపు, తొడలు, చేతులపై తీవ్ర గాయాలయ్యాయి. ప్రస్తుతం బాధిత చిన్నారి ఓ ప్రయివేటు ఆసుపత్రిలో చికిత్స పొందుతోంది. ఇదిలా ఉండగా, కేరళలో ఈ తరహా ఘటన జరగడం ఇదే మొదటిసారి కాదు. జూన్ 11న వీధి కుక్కల దాడిలో నిహాల్ అనే పదేళ్ల బాలుడి చనిపోయాడు. బాలుడి ఇంటి సమీపంలో కుక్కలు దాడిచేసి తీవ్రంగా గాయపరచడంతో ఆస్పత్రి చికిత్స పొందుతూ మృతిచెందాడు.

కొద్ది రోజుల కిందట కొల్లం జిల్లా చతినంకులంలో 10వ తరగతి చదువుతోన్న ఆదిల్ అనే బాలుడిపై వీధికుక్కలు ఇలాగే దాడి చేసి తీవ్రంగా గాయపరిచాయి. ప్రస్తుతం ఆ బాలుడు ఆస్పత్రిలో ఉన్నారు. ఇక, హైదరాబాద్‌లోని అంబర్‌పేటలో నాలుగేళ్ల ప్రదీప్ అనే చిన్నారిపై వీధి కుక్కలు దాడి చేయడంతో చనిపోయాడు. ఈ ఘటన అప్పట్లో తీవ్ర దుమారం రేపింది