కరోనా టీకాలు, గుండె పోట్లకు ఉన్న సంబంధం తెలుసా,,,ఐసీఎంఆర్ చేసిన అధ్యయనాలు ఏం చెబుతున్నాయి

ఇటీవలి కాలంలో హార్ట్ ఎటాక్‌తో అకస్మాత్తుగా చనిపోతున్న ఘటనలు మనం చూస్తూనే ఉన్నాం. ఆరోగ్యవంతంగా ఉన్నవారు, రోజూ జిమ్, వ్యాయామాలు చేసే వారు కూడా.. గుండె పోటుకు గురై ప్రాణాలు కోల్పోయిన సంఘటనలు మనకు కనిపిస్తూనే ఉన్నాయి. అయితే కొవిడ్ తర్వాతనే ఇలాంటి ఘటనలు చోటు చేసుకుంటున్నాయన్న ఆరోపణలు వినిపిస్తున్నాయి. మరోవైపు.. కొవిడ్ టీకా తీసుకున్న తర్వాత హార్ట్ ఎటాక్‌లు ఎక్కువగా వస్తున్నాయన్న పుకార్లు కోడై కూస్తున్నాయి. ఈ నేపథ్యంలోనే ఇండియన్ కౌన్సిల్ ఆఫ్ మెడికల్ రీసెర్చ్ - ఐసీఎంఆర్ పలు అధ్యయనం చేపట్టింది.

కొవిడ్ టీకాలు, గుండె పోట్లకు మధ్య సంబంధాన్ని తెలుసుకునేందుకు ఐసీఎంఆర్ నాలుగు వేర్వేరు అధ్యయనాలను నిర్వహించింది. కార్డియాక్ అరెస్ట్‌తో ఒక్కసారిగా కుప్పకూలిపోయి చనిపోతున్న ఘటనలపై పలు రకాల అధ్యయనాలు చేపట్టారు. అయితే ఈ మరణాలకు కరోనా వ్యాక్సిన్లకు మధ్య ఉన్న సంబంధం ఏంటి అనేది ఈ పరిశోధనల ద్వారా తెలుసుకోనున్నట్లు పరిశోధకులు వెల్లడించారు. అయితే ఈ అధ్యయనాలకు సంబంధించిన నివేదికలు మరో రెండు వారాల్లో వెలువడనున్నట్లు తెలుస్తోంది. ఈ మేరకు ఐసీఎంఆర్ డైరెక్టర్ జనరల్ రాజీవ్ భల్ చెప్పినట్లు మీడియా కథనాలు వెలువడ్డాయి.

అయితే ఈ అధ్యయనాలకు సంబంధించిన ప్రాథమిక ఫలితాలను పరిశోధకులు సిద్ధం చేశారు. అయితే వాటిని బహిర్గతం చేసే ముందు సంబంధిత నిపుణులతో శాస్త్రీయ పరమైన ధ్రువీకరణ అవసరమని పేర్కొన్నారు. అప్పటి వరకు ఈ అధ్యయనాలకు సంబంధించిన తుది నివేదిక సిద్ధం కాదని తెలిపారు. కొవిడ్ టీకాలు, హార్ట్ ఎటాక్‌లకు సంబంధించిన అధ్యయనాల నివేదికలను ఇండియన్ జర్నల్ ఆఫ్ మెడికల్ రీసెర్చ్ - ఐజేఎంఆర్‌ ఆమోదించిందని.. స్వతంత్ర ధ్రువీకరణ జరుగుతోందని వివరించారు.

ఈ కొవిడ్ టీకాలు, గుండె పోట్లకు మధ్య సంబంధాన్ని కనుగొనేందుకు పరిశోధకులు మొత్తం నాలుగు అధ్యయనాలు నిర్వహిస్తున్నారు. ఇందులో మొదటిది.. యువతలో ఆకస్మిక మరణాలకు సంబంధించిన కారణాలను అధ్యయనం చేయడంపై దృష్టి సారిస్తుంది. ఇక రెండో అధ్యయనం.. వాక్సినేషన్, దీర్ఘ కాలిక కొవిడ్, రోగికి ఉన్న కొవిడ్ తీవ్రత కారణంగా ఒక్కసారిగా కుప్పకూలిపోయి మరణిస్తున్నారా అనే కోణాల్లో పరిశోధనలు చేస్తుంది. కరోనా వైరస్ సోకి ఆస్పత్రుల్లో చేరిన రోగుల ఆరోగ్య వివరాలపై ఐసీఎంఆర్ సంవత్సరం నుంచి అబ్జర్వ్ చేస్తోంది. దీని ప్రకారం ఈ అధ్యయనానికి సంబంధించిన వివరాలు 40 ఆస్పత్రుల క్లినికల్ రిజిస్ట్రీ నుంచి తీసుకున్నారు.

ఇక మూడో అధ్యయనం ఆకస్మిక మరణాలపై దృష్టి సారించింది. ఈ అకస్మాత్తు మరణాల్లో బాధితులు గుండెపోటు లేదా బ్రెయిన్ స్ట్రోక్ కారణంగా ఒక్కసారిగా చనిపోయిన వారిని భారీ సంఖ్యలో గుర్తించారు. ఇక చివరిదైనా నాలుగో అధ్యయనం గుండెపోటుతో బాధపడుతూ చనిపోని వారిపై దృష్టి సారించింది.

మరోవైపు.. కరోనా మహమ్మారి తర్వాత గుండె పోటు కారణంగా చనిపోయిన వారి సంఖ్య పెరగడాన్ని కేంద్రం అంగీకరించింది. దీనికి సంబంధించి కేంద్ర ఆరోగ్య శాఖ మంత్రి మన్‌సుఖ్ మాండవియా.. ఐసీఎంఆర్ చేసిన అధ్యయనం నివేదికను మార్చిలో

నిర్వహించిన రైజింగ్ ఇండియా సమ్మిట్‌లో తెలిపారు. గుండె పోటు కారణంగా మరణించిన వారి సమాచారం తీసుకుని ఢిల్లీ ఎయిమ్స్‌లోని పరిశోధకులు.. పరిశోధనలు చేస్తున్నారని వెల్లడించారు.