ఒక్క రూపాయి కూడా చెల్లించకుండా,,,,ఫైవ్ స్టార్ హోటల్‌లో 603 రోజులు బస

ఫైవ్ స్టార్ హోటల్‌లో ఒక్క రోజు బస చేయాలంటే వేలాది రూపాయలు ఖర్చు చేయాల్సి ఉంటుంది. అలాంటిది ఓ వ్యక్తి ఢిల్లీ లాంటి నగరంలో.. ఓ ఫైవ్ స్టార్ హోటల్‌లో ఒక్క రూపాయి కూడా చెల్లించకుండానే దాదాపు రెండేళ్లపాటు ఫైవ్ స్టార్ హోటల్‌లో బస చేశాడు. నమ్మశక్యంగా లేకపోయినప్పటికీ ఇది నిజమే. ఢిల్లీలోని ఇందిరాగాంధీ ఇంటర్నేషనల్ ఎయిర్‌పోర్ట్ సమీపంలో రోజియెట్ హౌస్ అనే ఫైవ్ స్టార్ హోటల్ ఉంది. అసోంకి చెందిన అంకుశ్ దత్తా అనే వ్యక్తి 2019 మే 30వ తేదీన ఓ రాత్రి బస చేయడం కోసం ఆ హోటల్లో గది తీసుకున్నాడు. ఐడెంటిటీ ప్రూఫ్‌గా పాస్‌పోర్ట్ నకలు సమర్పించాడు.

ఆ రాత్రి గడిచాక అంకుశ్ తన గదిని ఖాళీ చేయలేదు. ఒక్కో రోజును పొడిగించుకుంటూ.. 2021 జనవరి 22 వరకు అదే హోటల్‌లో ఉన్నాడు. సాధారణంగా రెండు మూడు రోజులకు మించి హోటల్ రూమ్‌లో ఉంటే సిబ్బంది డబ్బులు చెల్లించాలని అడుగుతారు. కానీ దత్తా 603 రోజులు ఉన్నప్పటికీ.. అతడు డబ్బులేమీ కట్టలేదు. అతడికి హోటల్ సిబ్బంది ఎవరైనా సహకరించి ఉండొచ్చు అని అనుకుంటున్నారా..? మీ అనుమానం నిజమే.

ఆ హోటల్‌లో ఫ్రంట్ ఆఫీస్ విభాగం హెడ్‌గా పని చేసే ప్రేమ్ ప్రకాశ్ అనే వ్యక్తి దత్తాకు సహకరించాడని హోటల్ మేనేజ్‌మెంట్ చెబుతోంది. ఆ హోటల్‌కు సంబంధించిన రూమ్‌ల ధరలు, ఇతర ఛార్జీలను ప్రేమ్ నిర్ణయిస్తారు. బిల్లులు, గెస్ట్‌లు చెల్లించాల్సిన మొత్తానికి సంబంధించిన వివరాలను ప్రత్యేకమైన ఐడీ, పాస్‌వర్డ్ ద్వారా మెయింటెయిన్ చేస్తారు. గెస్టులందరి అకౌంట్లను ఆయన యాక్సెస్ చేయగలరు. దత్తా డబ్బులు కట్టకపోయినా.. ప్రకాశ్ అతడు హోటల్‌ బసను పొడిగించారు.

హోటల్‌ నిబంధనల ప్రకారం 72 గంటల కంటే ఎక్కువ పేమెంట్ చెల్లించాల్సిన గెస్టుల వివరాలతో ఓ డాక్యుమెంట్‌ను రూపొందించాల్సి ఉంటుంది. ఒక గెస్ట్‌కు ఒక బిల్లును మాత్రమే తయారు చేయాలి. ఆ వివరాలన్నీ సీఈవోతోపాటు ఫైనాన్షియల్ కంట్రోలర్‌ (ఎఫ్‌సీ)కి పంపించాలి. కానీ 2019 అక్టోబర్ 25 వరకు ప్రకాశ్ ప్రిపేర్ చేసిన రిపోర్ట్‌లో దత్తా చెల్లించాల్సిన బకాయిల గురించి పేర్కొనలేదు. అదే సమయంలో ఇతర గెస్టులకు సంబంధించిన రిపోర్టులను సీఈవో, ఎఫ్‌సీ ప్రతిరోజూ పంపించారు. కానీ దత్తా పేరును మాత్రం అందులో నుంచి తొలగించారు. దీంతో హోటల్ మేనేజ్‌మెంట్ దత్తాతోపాటు అతడికి సహకరించిన తమ ఉద్యోగి ప్రకాశ్‌పై ఫిర్యాదు చేసింది. దత్తా ఫేక్ చెక్కులను ఇచ్చారని కూడా ఫిర్యాదులో పేర్కొన్నారు. 603 రోజులపాటు దత్తా తమ హోటల్‌లో బస చేయడం వల్ల రూ.58 లక్షలు నష్టం వాటిల్లినట్లు ఫిర్యాదులో పేర్కొన్నారు.