లోకమాన్య తిలక్ ఎక్స్‌ప్రెస్‌లో పొగలు,,,భయంతో రైలు దిగి పరుగులు తీసిన ప్రయాణికులు

చెన్నై సమీపంలో లోకమాన్య తిలక్ సూపర్‌ఫాస్ట్ ఎక్స్‌ప్రెస్‌ (ట్రైన్ నెం 12164)లో పెద్ద ఎత్తున పొగలు రావడం ప్రయాణికులను ఆందోళనకు గురిచేసింది. ప్రయాణికులు ప్రాణ భయంతో రైలు నుంచి దిగి పట్టాల వెంట పరుగు అందుకున్నారు. ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది. లోకమాన్య తిలక్ సూపర్‌ఫాస్ట్ ఎక్స్‌ప్రెస్ రైలు గురువారం (జూన్ 22) సాయంత్రం 6.20 గంటలకు MGR చెన్నై సెంట్రల్ స్టేషన్ నుంచి ముంబైకి బయలుదేరింది. అర గంట తర్వాత వ్యాసర్పాడి జీవా స్టేషన్‌ సమీపానికి చేరుకోగానే ఈ ఘటన చోటు చేసుకుంది. రైలు ముందు భాగంలో ఉన్న లోకోమోటివ్, పవర్ కార్ మధ్య అండర్ గేర్‌లో పొగలు వ్యాపించాయి. ఒడిశాలో రైలు ప్రమాద ఘటన తీవ్ర విషాదం నింపిన నేపథ్యంలో ఈ ఘటన అలజడి రేపింది.

పవర్ కార్, లోకోమోటివ్ మధ్య ఎలక్ట్రిక్ లింక్‌లో షార్ట్ సర్క్యూట్ కారణంగా పొగలు వెలువడ్డాయని రైల్వే అధికారులు ఆ తర్వాత వివరణ ఇచ్చారు. మంటలు వెలువడ్డాయంటూ వస్తున్న వార్తలను వారు ఖండించారు. మంటలు వెలువడలేదని స్పష్టం చేశారు. బయలుదేరిన కొద్ది నిమిషాలకే ఈ ఘటనతో రైలు ఆగిపోయింది. రైలు నుంచి పొగలు వెలువడటం చూసిన ప్రయాణికులు, కోచ్‌ల నుంచి దూకి దూరంగా పరుగెత్తడం వైరల్ అవుతున్న వీడియోల్లో కనిపిస్తోంది. కొంత మంది ప్రయాణీకులు పక్క ట్రాక్‌పై నిలిచి ఉన్న మరో రైలును ఎక్కారు. ప్రమాదం తప్పడంతో ప్రయాణికులు ఊపిరి పీల్చుకున్నారు. రైల్వే సిబ్బంది వెంటనే స్పందించి మరమ్మతు చర్యలు చేపట్టారు. అనంతరం 18.50 గంటలకు రైలు అక్కడ నుంచి బయల్దేరి వెళ్లింది. ఈ ఘటన కారణంగా రైలు సుమారు గంట ఆలస్యంగా నడుస్తోంది.