సరోగసీ తల్లి ఆవు ద్వారా జన్మించిన ఆవు,,,టీటీడీ ఈవో ధర్మారెడ్డి కీలక ప్రకటన

ఏపీలో అద్భుతం చోటుచేసుకుంది. సరోగసీ తల్లి ఆవు ద్వారా మరో ఆవు జన్మించింది. కొత్తగా పుట్టిన ఆవుకు పద్మావతిగా నామకరణం చేశారు. ఏపీలో ఇలా ఆవిష్కృతం కావడం ఇదే తొలిసారి అని టీటీడీ ఈవో ధర్మారెడ్డి తెలిపారు. గిర్ ఆవు పిండం ఒంగోలు ఆవు గర్భంలో ప్రవేశ పెట్టడం జరిగిందని అన్నారు. దేశీయ ఆవు పాల ఉత్పత్తి చేయాలన్నదే తమ లక్ష్యమని, ఇందుకోసం 3.8 కోట్లు టీటీడీ ద్వారా ఎస్వీ వెటర్నరీ యూనివర్సిటీకు ఇచ్చినట్లు స్పష్టం చేశారు.

దేశీయ ఆవులు అంతరించిపోతున్న నేపథ్యంలో సరోగసీ విధానం ద్వారా ఆవులను అభివృద్ధి చేస్తున్నామని ధర్మారెడ్డి చెప్పారు. గో ఆధారిత వ్యవసాయం చేయాలని లక్ష్యంగా పెట్టుకున్నామని, 11 ఆవులకు ఎంబ్రియో ఆవులు సిద్దం ఉన్నాయన్నారు. ఏడాదికి 94 సరోగసీ ఆవు దూడలు పుట్టించేందుకు సిద్దం చేశామని, సాహివాల్ ఎంబ్రీయో ఆవులను ఒంగోలు జాతి ఆవులలో అభివృద్ది చేసినట్లు తెలిపారు. రోజుకు 60 కిలోల నెయ్యి శ్రీవారి ఆలయంలో అవసరం ఉందని, స్వచ్ఛమైన పాలను స్వామివారు, అమ్మవారికి అందించాలనే ఉద్దేశంతో దేశీయ ఆవులను అభివృద్ది చేస్తున్నట్లు ధర్మారెడ్డి అన్నారు.

'40 కేజీలు పాలకు ఒక కిలో నెయ్యి వస్తుంది. 2500 లీటర్లు పాలు రోజుకు 500 దేశీయ ఆవుపాలు అవసరం ఉంది. ఐదు మంది దాతలు 500 ఆవులు ఇచ్చేందుకు సిద్దంగా ఉన్నారు రామమయం ట్రస్ట్ వాళ్ళు 100 ఆవులు, రిలయన్స్ ఎగ్జిక్యూటివ్ డైరెక్టర్ ప్రసాద్ 70 ఆవులు డొనేషన్ ఇచ్చారు. వచ్చే ఐదేళ్లలో టీటీడీ గోశాలలో వెయ్యి ఆవుల్ని సిద్దం చేసి శ్రీవారి ఆలయం, అమ్మవారు ఆలయంకు అవసరం మేరకు వినియోగిస్తాం. గో ఆధారిత పశుగ్రాసం తయారు చేసేందుకు జిల్లా రైతులకు అవకాశం ఇస్తాం' అని ధర్మారెడ్డి పేర్కొన్నారు.

అటు శ్రీ వేంకటేశ్వర వెటర్నరీ యునివర్సిటీ వైస్ ఛాన్సలర్ పద్మనాభ రెడ్డి మాట్లాడుతూ.. 'స్వదేశీ అవుల సంతతి పెంచుకోవాల్సిన అవశ్యకత చాలా ఉంది. ఐఈవీఈ టెక్నాలజీ ద్వారా ఒక ఆవు నుంచి పది నుంచి 15 వరకు పిండాలు సేకరించి అద్దె గర్భం ఆవుల్లో ప్రవేశపెడుతున్నాం. సరోగసి ద్వారా అధిక పాలు ఉత్పత్తి చేయడం ద్వారా 530 ఆవు దూడలు,మొదటి ఏడాది 36 ఆవు దూడలు పుట్టించేందుకు లక్ష్యంగా పెట్టుకున్నాం. జగన్ అన్న పాల వెల్లువలో భాగంగా సహివాల్, గిర్, ఒంగోలు జాతి ఆవులను అభివృద్ధి చేస్తున్నాం' అని చెప్పారు. కాగా టీటీడీ ఆధ్వర్యంలో గోశాల నడుస్తోన్న విషయం తెలిసిందే.