వైసీపీ కార్యకర్త హత్య కేసులో ప్రతాప్‌రెడ్డి సహా ఆరుగురిని అరెస్ట్

వైఎస్సార్ జిల్లాలో సంచలనం రేపిన వైఎస్సార్ కాంగ్రెస్ పార్టీ కార్యకర్త శ్రీనివాసుల రెడ్డి హత్య కేసులో ప్రధాన నిందితుడు ప్రతాప్‌రెడ్డి సహా ఆరుగురిని అరెస్టు చేసినట్లు ఎస్పీ అన్బురాజన్‌ వెల్లడించారు. నిందితుల్లో శ్రీనివాసులు, సురేష్ కుమార్‌, హరిబాబు, సుబ్బయ్య, రాణి ఉన్నట్లు చెప్పారు. శ్రీనివాసుల రెడ్డి హత్యకు భూ వివాదాలే కారణమని ఎస్పీ పేర్కొన్నారు.  గతంలో శ్రీనివాసులరెడ్డి, ప్రతాప్‌రెడ్డి మధ్య ల్యాండ్‌ సెటిల్‌మెంట్‌ విభేదాలున్నాయని ఎస్పీ అన్బురాజన్‌ తెలిపారు. శ్రీనివాసులరెడ్డి.. ప్రతాప్‌రెడ్డికి రూ.80 లక్షలు, శ్రీనివాసులకు రూ.60 లక్షలు ఇవ్వాల్సి ఉందన్నారు. అయితే, డబ్బు ఇవ్వకపోవడంతో నిందితులు కక్ష పెంచుకున్నారని చెప్పారు. ఈ క్రమంలోనే నిందితులు ఈ హత్యకు పాల్పడ్డారని చెప్పారు. నిందితులకు సహకరించిన రాణి అనే మహిళను కూడా అరెస్టు చేశామని.. మరికొందరు అనుమానితులకు నోటీసులు ఇచ్చామని అన్బురాజన్‌ పేర్కొన్నారు.

ఈ కేసులో ఎంతటి వారున్నా వదిలిపెట్టే ప్రసక్తే లేదని ఎస్పీ అన్బురాజన్‌ అన్నారు. ఈ హత్యలో ఎలాంటి రాజకీయ కోణం లేదని.. భూ వివాదాలు, సెటిల్మెంట్‌ వ్యవహారాలే కారణమని చెప్పారు. గూగుల్‌ టేక్ ఔట్‌ ద్వారా ఆధారాలు సేకరిస్తున్నామని.. త్వరలోనే మరికొందరిని అదుపులోకి తీసుకుంటామని తెలిపారు.

ఈ హత్య సమయంలో కిందప్డ కత్తిని అక్కడ ఉన్న మహిళ ధైర్యంగా పక్కన పడేసిన విషయాన్ని ఎస్పీ అన్బురాజన్‌ ఈ సందర్భంగా గుర్తు చేశారు. అలాంటి సమయంలో ఆమె ధైర్యాన్ని మెచ్చుకోవాల్సిందేనని, పోలీసు శాఖ తరఫున ఆ మహిళను సన్మానిస్తామని వెల్లడించారు. గత శుక్రవారం ఉదయం జిమ్‌ నుంచి వస్తున్న శ్రీనివాసుల రెడ్డిని ఇద్దరు వ్యక్తులు బురఖాలు ధరించి కత్తులతో నరికి హత్య చేసిన విషయం తెలిసిందే.