దేశవ్యాప్తంగా వర్షాలు,,,పలు చోట్ల కొండచరియలు విరిగిపడి ట్రాఫిక్ జామ్

దేశంలో నైరుతి రుతుపవనాలు విస్తరించడంతో వాటి ప్రభావం కారణంగా ఆయా రాష్ట్రాల్లో భారీగా వర్షాలు పడుతున్నాయి. హిమాచల్‌ ప్రదేశ్‌‌లోని మండీ జిల్లా బాగీపుల్‌ ప్రాంతంలో ఆకస్మిక వరదలు సంభవించాయి. దీంతో దాదాపు 200 మందికి పైగా పర్యాటకులు, స్థానికులు రోడ్లపైనే చిక్కుకుపోయినట్లు అధికారులు వెల్లడించారు. కుల్లు - మండీ జాతీయ రహదారి (ఎన్‌హెచ్ - 3)పై చాలా ప్రాంతాల్లో కొండచరియలు విరిగిపడ్డాయి. దీంతో కుల్లు - మండీ జాతీయ రహదారిపై 15 కిలోమీటర్ల మేర రాకపోకలు నిలిచిపోయి భారీగా ట్రాఫిక్ జామ్ ఏర్పడింది. కామాండ్ ప్రాంతంలో రోడ్డుపై 25 నుంచి 30 వాహనాలు చిక్కుకుపోయినట్లు తెలుస్తోంది. మరో 5 రోజులపాటు ప్రతికూల వాతావరణ పరిస్థితులు కొనసాగే అవకాశం ఉందని అధికారులు హెచ్చరిస్తున్నారు.

ఉత్తరాఖండ్‌, హిమాచల్‌ ప్రదేశ్‌ రాష్ట్రాల్లో భారీ వర్షాలు, వర్ష సంబంధిత ఘటనల్లో నలుగురు మృతి చెందినట్లు స్థానిక అధికారులు వెల్లడించారు. రుద్రప్రయాగ్‌ జిల్లాలో కొండచరియలు విరిగి పడటంతో శిథిలాల కింద చిక్కుకుని ఒకరు మృతి చెందారు. ఉత్తరాఖండ్‌లోని కొన్ని జిల్లాలకు ఆరెంజ్‌ అలెర్ట్‌ జారీ చేశారు. వాతావరణ సమాచారం తెలుసుకున్నాకే ముందుకెళ్లాలని ‘చార్‌ధామ్‌’ యాత్రికులకు ఉత్తరాఖండ్ ముఖ్యమంత్రి పుష్కర్‌సింగ్‌ ధామీ సూచించారు.

చిక్కుకుపోయిన ప్రయాణికులు, వాహనాలను బయటికి తీసి.. ట్రాఫిక్‌ను పునరుద్ధరించేందుకు చర్యలు తీసుకుంటున్నట్లు అధికారులు వెల్లడించారు. రోడ్లపై పడిన భారీ బండరాళ్లను పేలుళ్ల ద్వారా తొలగిస్తున్నారు. 6 నుంచి 7 గంటల్లో కుల్లు - మండీ జాతీయ రహదారిపై రాకపోకలను పునరుద్ధరిస్తామని ప్రకటించారు.

ఇక ట్రాఫిక్ జామ్‌లో చిక్కుకున్న పర్యాటకులు తీవ్ర అసంతృప్తి వ్యక్తం చేస్తున్నారు. మండీ నుంచి సుందర్‌నగర్ మధ్య పలు చోట్ల కొండ చరియలు విరిగిపడినట్లు తెలిపారు. పోలీసులు వెనక్కి వెళ్లమని చెబుతున్నారని.. కానీ ఇక్కడ 15 కిలోమీటర్ల పొడవు ట్రాఫిక్ జామ్ ఏర్పడిందని పేర్కొన్నారు. చిన్న పిల్లలు, మహిళలు, వృద్ధులు ఉన్నారని.. వారంతా తీవ్ర ఇబ్బందులు పడుతున్నారని ఆవేదన వ్యక్తం చేశారు. అక్కడ ఎలాంటి హోటల్ రూమ్‌లు దొరకడం లేదని.. వాపోయారు. అక్కడ పవర్ ప్రాజెక్టులు, టూరిస్ట్ రిసార్టులు ఉన్నప్పటికీ అక్కడికి వెళ్లేందుకు రోడ్లు లేవని చెప్పారు. ఆదివారం సాయంత్రం 5 గంటలకు జాతీయ రహదారిపై రాకపోకలు నిలిచిపోయాయని సోమవారం మధ్యాహ్నం అవుతున్నా ఇంకా పునరుద్ధరించలేదని ఆరోపించారు.