కష్టపడి భార్యను చదివిస్తే.... ఉద్యోగం వచ్చాక భర్తను కాదని మరొకరితో సంబంధం

భార్య కోరిక కోసం అహర్నిషలు కష్టపడిన భర్తకు చివరికి చిప్పకూడే దిక్కయింది. ఆమె లక్ష్యం కోసం తాను కష్టపడితే భార్య కేసు పెట్టడంతో జైలు పాలయ్యాడు. ఈ ఘటన ఉత్తర్‌ప్రదేశ్‌లో జరిగింది. భార్య కోరిక మేరకు ఆమె ప్రభుత్వ ఉద్యోగం సాధించేందుకు కష్టపడి రూపాయి రూపాయి పోగేసి చదివించిన భర్తకే ఆమె వెన్నుపోటు పొడిచింది. గవర్నమెంట్ జాబ్ వచ్చిన తర్వాత భర్తను వదిలేసి మరో వ్యక్తితో సంబంధం పెట్టుకుంది. తర్వాత భర్తపైనే వరకట్నం కేసు పెట్టింది.

ఉత్తర్‌ప్రదేశ్‌లోని ప్రయాగ్‌రాజ్‌ జిల్లాకు చెందిన అలోక్ మౌర్య.. 2010 లో జ్యోతి మౌర్యను పెళ్లి చేసుకున్నాడు. వారిది మధ్య తరగతి కావడంతో చిన్న ఉద్యోగం చేసుకుంటూ అలోక్ మౌర్య.. కుటుంబాన్ని పోషించేవాడు. అయితే తనకు చదువుకోవాలని.. ప్రభుత్వ ఉద్యోగం సాధించాలనే కోరిక ఉందని జ్యోతి మౌర్య.. పెళ్లి తర్వాత తన భర్త అలోక్ మౌర్యకు చెప్పింది. అయితే ఏదో ఓ చిన్న ఉద్యోగం చేసుకునే అలోక్‌ మౌర్య.. భార్య కోరికను కాదని అనలేక ఒప్పుకున్నాడు. అందుకోసం అహర్నిషలు కష్టపడి డబ్బులు పోగేశాడు.

భార్య ప్రభుత్వ ఉద్యోగం సాధించేందుకు.. ఆమెను ప్రయాగ్‌రాజ్‌లోని ఓ కోచింగ్ సెంటర్‌లో చేర్పించాడు. తర్వాత 2016 లో ఉత్తర్‌ప్రదేశ్ ప్రభుత్వం విడుదల చేసిన ఉద్యోగాల్లో సబ్ డివిజనల్ మేజిస్ట్రేట్ ఉద్యోగాన్ని జ్యోతి మౌర్య సాధించింది. దీంతో ఆమెకు, ఆమె భర్తకు పట్టరాని సంతోషం కలిగింది. అయితే అసలు సమస్య అక్కడి నుంచే ప్రారంభమైంది. భార్యకు ప్రభుత్వ ఉద్యోగం వచ్చింది.. ఇక తమ కష్టాలు తొలగిపోతాయని సంతోషించేలోపు అలోక్ మౌర్యకు జ్యోతి మౌర్య ఊహించని షాక్ ఇచ్చింది.

ప్రభుత్వ ఉద్యోగం సాధించిన జ్యోతి మౌర్య.. చిన్న ఉద్యోగం చేస్తున్న భర్త పట్ల ఎడమొహం పెడమొహంగా ఉండటం ప్రారంభించింది. ఇదే క్రమంలో ఘజియాబాద్‌లో హోంగార్డు కమాండెంట్‌ మనీశ్ దూబేతో వివాహేతర సంబంధం పెట్టుకున్నట్లు అలోక్ మౌర్య ఆరోపించాడు. ఈ ఏడాది ఫిబ్రవరిలో తన ఇంట్లో జ్యోతి మౌర్య, మనీశ్ దూబే.. ఏకాంతంగా ఉండటాన్ని చూసి అలోక్ మౌర్య తీవ్ర మనస్తాపానికి గురయ్యాడు. తన భార్యకు నచ్చజెప్పి.. మంచి మార్గంలో పెట్టేందుకు అలోక్ మౌర్య చేసిన ప్రయత్నాలేవీ ఫలించలేదు.

అయితే అలోక్ మౌర్య చెప్పిన మాటలు వినని.. ఆయన భార్య జ్యోతి మౌర్య.. తిరిగి అతని మీదే అక్రమ కేసు బనాయించింది. తనను వరకట్నం కోసం హింసిస్తున్నాడని.. వరకట్న కేసు కింద ఫిర్యాదు చేసింది. దీంతో అలోక్ మౌర్యను అరెస్ట్ చేసిన పోలీసులు జైలుకు పంపించారు. అనంతరం బెయిల్‌పై బయటికి వచ్చిన అలోక్ మౌర్య తన భార్య చేసిన మోసాన్ని చెప్పుకుని విలపించాడు. ప్రస్తుతం తనకు ఉన్న చిన్న ఉద్యోగం కూడా పోయి.. రోడ్డున పడినట్లు పేర్కొన్నాడు. జ్యోతి మౌర్య ఆమె ప్రియుడు మనీశ్ దూబే ఇద్దరూ కలిసి తనను చంపేస్తామని బెదిరిస్తున్నారని వాపోయాడు. తనకు ప్రాణహాని ఉందని.. రక్షించాలని కోరుతున్నాడు.