నరసింహస్వామి ఉత్సవాల ఊరేగింపులో డాన్సులు చేస్తూ పాల్గొన్న జనం,,,గొడవకు దిగిన అటుగా వచ్చిన వ్యక్తి,,,విషయం కోర్టుకు

గొడవ సమయంలో ప్రత్యర్ధి ప్రయివేట్ భాగాలను పట్టుకుని లాగడం హత్యాయత్నం కాదని కర్ణాటక హైకోర్టు స్పష్టం చేసింది. ఈ మేరకు ఓ హత్యాయత్నం కేసులో ట్రయల్ కోర్టు ఇచ్చిన తీర్పును పక్కనబెట్టింది. బాధితుడికి తీవ్రమైన బాధ కలిగించిన 38 ఏళ్ల వ్యక్తిని దోషిగా నిర్ధారించిన ట్రయల్ కోర్టు తీర్పుతో హైకోర్టు విభేదించింది. అలాగే ఏడేళ్ల జైలు శిక్షను మూడేళ్లకు తగ్గించింది. బాధితుడ్ని హత్య చేయాలనే ఉద్దేశం నిందితుడికి లేదని, ఘర్షణ సమయంలో అనుకోకుండా జరిగిపోయిందని హైకోర్టు వ్యాఖ్యానించింది.

‘అప్పటికప్పుడు నిందితుడి, ఫిర్యాదుదారుడికి మధ్య వాగ్వాదం జరిగింది.. ఆ గొడవలో బాధితుడి వృషణాలను పట్టుకుని నొక్కేయాలని అనుకున్నాడు.. అందువల్ల నిందితుడు ఒక ఉద్దేశంతో లేదా హత్య చేయడానికి సిద్ధపడి వచ్చాడని చెప్పలేం.. హత్య చేయాలనే ఉద్దేశం ఉంటే అతడు తన వెంట కొన్ని మారణాయుధాలు తీసుకుని వెళ్లి ఉండొచ్చు’అని తెలిపింది.

బాధితుడ్ని నిందితుడు తీవ్రంగా గాయపరిచాడని వ్యాఖ్యానించిన కోర్టు.. గాయం బాధితుడి మరణానికి కారణమైనప్పటికీ నిందితుడి ఉద్దేశం చంపడం కాదని ఉద్ఘాటించింది. ‘అతడి మరణానికి కారణమయ్యే శరీరంలోని ముఖ్యమైన భాగమైన వృషణాలను ఎంచుకున్నప్పటికీ, గాయపడిన వ్యక్తికి శస్త్రచికిత్స చేసి, వృషణాలను తొలగించారు, ఇది తీవ్రమైన గాయం. కాబట్టి, మా దృష్టిలో నిందితుడు ఉద్దేశపూర్వకంగా లేదా ముందుస్తు ప్రణాళికతో హత్యకు ప్రయత్నించాడని చెప్పలేం.. నిందితుడు నేరాన్ని ఐపీసీ సెక్షన్ 324 కిందకు తీసుకురావచ్చు.. శరీరంలోని ముఖ్యమైన ప్రైవేట్ భాగాన్ని నొక్కడం ద్వారా తీవ్రమైన గాయాన్ని కలిగించాడు’అని జస్టిస్ కే నటరాజన్ ఇటీవలి తన తీర్పులో పేర్కొన్నారు.

చిక్కమగళూరు జిల్లా కడూరు తాలూకా మొగలికట్టే గ్రామానికి చెందిన బాధితుడు ఓంకారప్ప.. ఊరిలో జరుగుతున్న నరసింహస్వామి ఊరేగింపులో తాను, మరికొందరు కలిసి నృత్యం చేస్తుండగా నిందితుడు పరమేశ్వరప్ప మోటారు సైకిల్‌పై అక్కడికి వచ్చి గొడవ పడ్డాడని ఫిర్యాదులో పేర్కొన్నారు. ఆ గొడవలో పరమేశ్వరప్ప ఓంకారప్ప వృషణాలను నొక్కడంతో తీవ్ర గాయమైంది. పోలీసుల విచారణ, విచారణ అనంతరం అతడిని దోషిగా నిర్ధారించిన ట్రయల్ కోర్టు శిక్ష ఖరారు చేసింది.

దీంతో ట్రయల్ కోర్టు తనకు విధించిన శిక్షను సవాలు చేస్తూ హైకోర్టును ఆశ్రయించారు. ట్రయల్ కోర్టు ఐపీపీ 307 (హత్యాయత్నం) కింద ఏడేళ్ల జైలు శిక్ష, సెక్షన్ 341 కింద ఒక నెల జైలు శిక్ష (తప్పు నిర్బంధం), సెక్షన్ 504 (రెచ్చగొట్టేలా అవమానించడం) కింద ఒక సంవత్సరం జైలు శిక్ష విధించింది. 2010లో జరిగిన ఈ సంఘటనలో ట్రయల్ కోర్ట్ 2012లో పరమేశ్వరప్పను దోషిగా నిర్ధారించింది. పరమేశ్వరప్ప 2012లో దాఖలు చేసిన అప్పీల్‌ను ఇటీవల హైకోర్టు పరిష్కరించింది.