ల్యాబ్‌లో తయారుచేసి చికెన్ ‌కు ఎఫ్‌డీఏ ఆమోదం

చికెన్ తినాలంటే కోడి కోయాల్సిందే.. కానీ, కోడితో పనిలేకుండా చికెన్ వండుకోవచ్చని అమెరికా శాస్త్రవేత్తలు నిరూపించారు. ప్రపంచంలోనే తొలిసారిగా ప్రయోగశాలలో తయారు చేసిన చికెన్ అందుబాటలోకి వచ్చింది. ల్యాబ్‌లో అభివృద్ధి చేసిన చికెన్ విక్రయానికి అమెరికా ఫుడ్ అండ్ డ్రగ్ అడ్మినిస్ట్రేషన్ ఆమోదం తెలిపింది. ఇందుకోసం రెండు సంస్థలకు అనుమతులు మంజూరు చేసింది. ముందుగా రెస్టారెంట్లలో ఈ అమ్మకాలు ప్రారంభించి, ఆ తర్వాత సూపర్ మార్కెట్లలోనూ ఈ చికెన్ ను అందుబాటులోకి తీసుకురానున్నట్టు సమాచారం.

కాలిఫోర్నియాకు చెందిన ‘అప్ సైడ్ ఫుడ్స్’, ‘గుడ్ మీట్’ సంస్థలకు కృత్రిమంగా చికెన్ తయారు చేసి విక్రయానికి అనుమతి లభించింది. గుడ్ మీట్ భాగస్వామి ‘జోయిన్ బయోలాజిక్స్’ కూడా మాంసాన్ని తయారు చేసేందుకు ఆమోదం పొందింది. ఈ కంపెనీల చికెన్ ఉత్పత్తులు మానవ వినియోగానికి సురక్షితమైనవిగా ఎఫ్‌డీఏ ధ్రువీకరించింది. ల్యాబ్‌లో కోడి మూలకణజాలాన్ని అభివృద్ధి చేయడం ద్వారా చికెన్ ఉత్పత్తి చేశారు. పోషకాల విషయంలో సాధారణ చికెన్‌కు ఏ మాత్రం తీసిపోదని శాస్త్రవేత్తలు అంటున్నారు.

అంతేకాదు, ఈ కృత్రిమ మాంసానికి అవసరమైతే పోషకాలు, విటమిన్లు, ఆరోగ్యకరమైన కొవ్వుల మోతాదులను సైతం పెంచుకోవచ్చని చెబుతున్నారు. ఇదిలా ఉండగా, దీని వల్ల పర్యావరణానికి హాని జరుగుతుందని నిపుణులు ఆందోళన చెందుతున్నారు. పశువులు, కోళ్ల పెంపకంతో పోలిస్తే ప్రయోగశాలలో అభివృద్ధి చేసే మాంసం వల్ల ఎక్కువ గ్రీన్ హౌస్ ఉద్గారాలు విడుదలవుతాయని ఆక్స్‌ఫర్డ్ యూనివర్సిటీ అధ్యయనం ఒకటి హెచ్చరించింది.

‘కృత్రిమ మాంసం తయారీకి అవసరమయ్యే ఇంధనం ఎలా ఉత్పత్తి చేస్తారనే అంశంపైనే పర్యావరణానికి ఎంత మేలు జరుగుతుందనేది ఆధారపడి ఉంటుంది’ అని ఆక్స్‌ఫర్డ్ విశ్వవిద్యాలయానికి చెందిన జాన్ లించ్ తమ పరిశోధన పత్రంలో పేర్కొన్నారు. కానీ, జంతువులను కాపాడటం.. వాటి పెంపకం, మేత, జంతు వ్యర్థాల వంటి పర్యావరణ ప్రభావాలను తీవ్రంగా తగ్గించే లక్ష్యంతో కృత్రిమ మాంసం ఉత్పత్తి చేపట్టినట్టు పరిశోధకులు చెప్పడం గమనార్హం. ‘వధించే ఈ జంతువులన్నింటికీ ఆహారం ఇవ్వడానికి ఉపయోగించే భూమి, నీటి మొత్తానికి బదులుగా మనం దానిని వేరే విధంగా చేయవచ్చు’ అని ఈట్ జస్ట్ సీఈఓ జోష్ టెట్రిక్ అన్నారు.  సాధారణ మాంసం 85 గ్రాములు తింటే అందులో కేలరీలు 122 గ్రాములు, ప్రోటీన్లు 23 గ్రాములు, కొవ్వు 2.6 గ్రాములు మనిషి శరీరానికి అందుతాయి. ఇంకా ఐరన్‌, విటమిన్‌ బీ12, జింక్‌, పొటాషియం వంటివీ శరీరానికి లభిస్తాయి.