అమెరికాలోని టెకీలను వెంటాడుతోన్న లేఆఫ్‌ల భయం

అమెరికాలోని హెచ్‌-1బీ వీసాదారులకు కెనడా ప్రభుత్వం తీపి కబురు చెప్పింది. 10వేల మంది హెచ్‌-1బీ వీసాదారులు తమ దేశానికి వచ్చి పని చేసుకునేందుకు వీలుగా ఓపెన్‌ వర్క్‌-పర్మిట్‌ను ఏర్పాటు చేస్తున్నట్లు కెనడా ఇమ్మిగ్రేషన్‌ మంత్రి సీన్‌ ఫ్రేజర్‌ ప్రకటించారు. అలాగే, ఈ ప్రొగ్రామ్‌ కింద హెచ్‌-1బీ వీసాదారుల కుటుంబసభ్యులను విద్య, ఉద్యోగాలకు అనుమతిస్తామని తెలిపారు. ఈ మేరకు కెనడా వలసలు, శరణార్థులు, పౌరసత్వ సేవల శాఖ అధికారిక ప్రకటన విడుదల చేసింది.

‘‘వేలాది మంది పనిచేస్తోన్న హైటెక్‌ రంగాలకు చెందిన కొన్ని కంపెనీలు అమెరికా, కెనడాల్లోనూ పెద్ద ఎత్తున కార్యకలాపాలు నిర్వహిస్తున్నాయి.. ఇందులో ఉద్యోగులు చాలా మంది హెచ్‌-1బీ వీసాదారులే .. 2023 జులై 16 నాటికి హెచ్‌-1బీ వీసాలో అమెరికాలో పనిచేస్తున్నవారు, ఈ వీసాదారుల కుటుంబసభ్యులు కెనడా వచ్చేందుకు దరఖాస్తు చేసుకోవడానికి అర్హులు’’ అని ఆ ప్రకటనలో పేర్కొంది.

ఇదిలావుంటే ఈ కొత్త విధానం ద్వారా ఆమోదం పొందిన హెచ్‌-1బీ వీసాదారులకు మూడేళ్ల కాల వ్యవధితో ఓపెన్ వర్క్ పర్మిట్  అవకాశం లభిస్తుంది. వారు కెనడాలో ఎక్కడైనా, ఏ సంస్థలోనైనా పనిచేసేందుకు వీలుంటుందని కెనడా ఇమ్మిగ్రేషన్‌ విభాగం తెలిపింది. ఇక, వారి జీవిత భాగస్వాములు, డిపెండెంట్లు కూడా కెనడాలో విద్య లేదా ఉద్యోగాల కోసం తాత్కాలిక నివాస వీసాకు దరఖాస్తు చేసుకోవచ్చని తెలిపింది. ఈ ఏడాది చివరి నాటికి ఈ ఇమ్మిగ్రేషన్‌ విధానాన్ని అందుబాటులోకి తీసుకొస్తామని మంత్రి ఫ్రేజర్‌ వెల్లడించారు.

అయితే, ఈ కొత్త విధానం కింద దరఖాస్తుకు ఎవరు అర్హులు అనేది మాత్రం ఆయన స్పష్టంగా చెప్పలేదు. ‘ఫెడరల్ ప్రభుత్వం ప్రపంచంలోని అత్యంత ప్రతిభావంతులైన కొంతమంది వ్యక్తుల కోసం ఇమ్మిగ్రేషన్ స్ట్రీమ్‌ను అభివృద్ధి చేస్తుంది.. వారు ఉద్యోగం చేస్తున్నా లేదా లేకపోయినా టెక్ కంపెనీల కోసం పని చేయడానికి కెనడాకు రావచ్చు’అని వివరించారు.

టెక్ సహా ప్రత్యేక రంగాల్లో ఉద్యోగాలు చేసేందుకు వీలుగా విదేశీయులకు అమెరికా హెచ్‌-1బీ వీసాలను జారీ చేస్తుంది. ఈ వీసాలు పొందినవారిలో అత్యధికంగా భారతీయులే ఉంటారు. అయితే, ఆర్ధిక మాంద్యం దెబ్బకు అమెరికాలో చాలా కంపెనీలు లేఆఫ్‌లు ప్రకటించడంతో హెచ్‌-1బీ వీసాదారులకు తీవ్ర ఇబ్బందులు ఎదుర్కొంటున్నారు. వీరంతా అమెరికాలో ఉండాలంటే మరో ఉద్యోగం వెతుక్కోక తప్పని పరిస్థితి. ఈ నేపథ్యంలో అటువంటి బాధితులకు కెనడా ఆఫర్‌ ఇమ్మిగ్రేషన్ విధానం ఉపయోగపడే అవకాశముందని నిపుణులు అభిప్రాయం వ్యక్తం చేస్తున్నారు.