ఒక్కడి కోసం గాల్లోకి విమానం ఎగిరింది

వివిధ కారణాల వల్ల ప్రయాణ సమయానికి విమానాలు రద్దు కావడం, ఆలస్యం కావడం మనం చూస్తూనే ఉంటాం. మనం కూడా ఎప్పుడో ఒకప్పుడు ఇలాంటి ఇబ్బందుల్లో పడే ఉంటాం. విమానం రద్దయితే లేదా ఆలస్యం అయితే.. ప్రత్యామ్నాయ మార్గాలు చూసుకుని వెళ్తాం. ఆ సమయంలో ఎయిర్‌లైన్స్ యాజమాన్యం.. సింపుల్‌గా మీకు కలిగిన అసౌకర్యానికి చింతిస్తున్నాం అని చెబుతుంది. మరీ ఎక్కువగా ప్రయాణికులు గొడవ చేస్తే.. టికెట్ డబ్బులు తిరిగి ఇస్తుంది. ఇది తరచూ జరిగే ఘటనలే అనుకుంటున్నారా. ఇక్కడ మాత్రం అలా జరగలేదు. విమానం ఆలస్యం అవుతుందని చెప్పడంతో అందులో ప్రయాణించాల్సిన ప్రయాణికులంతా ఎయిర్‌పోర్టు నుంచి వెళ్లిపోయి ఇతర మార్గాల్లో గమ్యానికి బయల్దేరారు. కానీ ఒక్క ప్రయాణికుడు మాత్రం.. అక్కడే వేచి ఉన్నాడు. 18 గంటల పాటు ఆ ప్రయాణికుడు ఎయిర్‌పోర్టులోనే గడిపాడు. దీంతో చివరికి సదరు ఎయిర్‌లైన్స్ విమానాన్ని సిద్ధం చేసింది. ఇక్కడే అసలు ట్విస్ట్ ఉంది. ఆ విమానంలో ఆ ప్రయాణికుడు ఒక్కడే వెళ్లాడు. ఆయనకు తోడుగా ఎయిర్‌లైన్స్ సిబ్బంది ఉన్నారు. ఉచితంగా అతనికి పాస్ ఇవ్వడమే కాకుండా ఫస్ట్ క్లాస్‌లో ఒంటరిగా ప్రయాణించే అవకాశం కల్పించారు.

ఫిల్ స్ట్రింగర్ అనే వ్యక్తి అమెరికా నుంచి నార్త్‌ కరోలినాకు విమానంలో వెళ్లేందుకు అమెరికన్ ఎయిర్స్‌కు చెందిన ఎయిర్‌లైన్స్‌ విమానంలో టికెట్ బుక్ చేసుకున్నాడు. ప్రయాణం కోసం ఎయిర్‌పోర్టుకు చేరుకున్నాడు. అయితే ఫిల్ స్ట్రింగర్ ప్రయాణించాల్సిన విమానం కొన్ని కారణాల వల్ల ఆలస్యం అయింది. విమానం బయల్దేరేందుకు 18 గంటలు పడుతుందని అమెరికన్ ఎయిర్స్ ఎయిర్‌లైన్స్ చల్లగా చెప్పింది. దీంతో అప్పటి వరకు వేచి ఉండలేమని భావించిన ప్రయాణికులు వేరే మార్గాల కోసం వెళ్లిపోయారు. ఒక్క ఫిల్‌ స్ట్రింగర్‌ మాత్రం అదే ఎయిర్‌పోర్టులో ఎక్కడికీ వెళ్లకుండా ఉండిపోయాడు. దీంతో అతడికి ఉచిత పాస్‌తో పాటు ఫస్ట్‌క్లాస్‌లో ప్రయాణించే అవకాశాన్ని అమెరికన్ ఎయిర్స్ ఎయిర్‌లైన్స్ కల్పించింది. 18 గంటల పాటు ఇతర ప్రయాణికులు ఎవరూ లేకపోవడంతో అతను ఒక్కడే ఆ విమానంలో ప్రయాణించాడు. ఈ సందర్భంగా అమెరికన్ ఎయిర్స్ సిబ్బంది ఫిల్ స్ట్రింగర్ కోసం ప్రత్యేకంగా పార్టీని కూడా ఏర్పాటు చేశారు.

ఈ సందర్భంగా ఒక్కడే విమానంలో ప్రయాణించిన ఫిల్‌ స్ట్రింగర్.. తన అనుభవాలను సోషల్‌ మీడియాలో పంచుకున్నాడు. తాను విమానం వద్దకు వెళ్లేసరికి ప్రయాణికులు ఎవరూ కనిపించలేదని పేర్కొన్నాడు. అక్కడ ఉన్న ఎయిర్‌లైన్స్ సిబ్బందిని అడగ్గా.. తన ఒక్కడి కోసమే విమానం బయల్దేరుతున్నట్లు చెప్పారని తెలిపాడు. మొదట ఆ విషయం నమ్మలేదని.. విమానం ఎక్కిన తర్వాత తనకు విషయం అర్థమైందని వివరించాడు. ఒక్కడి కోసం విమానం కేటాయించడంతో కొంత ఇబ్బందిగా అనిపించిందని.. అయితే అమెరికన్ ఎయిర్స్ సిబ్బంది తనను బాగా ఎంటర్‌టైన్ చేశారని పేర్కొన్నాడు. వారితో కలిసి ప్రత్యేక పార్టీని ఎంజాయ్‌ చేసినట్లు తెలిపాడు. తాను 18 గంటల పాటు వేచి చూసినందుకు అమెరికన్ ఎయిర్స్‌ మంచి అవకాశాన్ని కల్పించిందని.. ఇది తన జీవితంలో మరుపురాని రోజు అని పేర్కొన్నాడు.