సునాక్ వాడుతున్న పెన్నుపై భద్రతపరంగా విమర్శలు,,,మరో వివాదంలో చిక్కుకున్న బ్రిటన్ ప్రధాని

ఎన్నో సవాళ్లు, సంక్షోభాల మధ్య పదవిని చేపట్టిన బ్రిటన్ ప్రధానమంత్రి రిషి సునాక్‌ చుట్టూ.. మొదటి నుంచి వివాదాలు చెలరేగుతూనే ఉన్నాయి. బ్రిటన్‌ ప్రధానమంత్రిగా బాధ్యతలు చేపట్టిన నాటి నుంచి వరుసగా ఏదో ఒక అంశంలో రిషి సునాక్ విమర్శలను ఎదుర్కొంటునే ఉన్నారు. అయితే తాజాగా ఆయన మరో వివాదంలో చిక్కుకున్నారు. రిషి సునాక్ వాడే పెన్నుపై బ్రిటన్‌లో ఉన్న నిపుణులు ఆందోళనలు వ్యక్తం చేస్తున్నారు. ఎందుకంటే అది ఎరేజబుల్‌ ఇంక్‌తో ఉన్న పెన్ను అని చెబుతున్నారు. దాని వల్ల భద్రతా పరమైన సమస్యలు తలెత్తుతాయని వారు ఆందోళన వ్యక్తం చేస్తున్నారు.

ప్రస్తుతం బ్రిటన్ ప్రధానమంత్రి హోదాలో రిషి సునాక్ ఎరేజబుల్ ఇంక్ పెన్ను వాడుతున్నారని నిపుణులు, వివిధ మీడియా సంస్థలు చెబుతున్నాయి. ఈ పెన్నుతో ఏదైనా రాసిన తర్వాత దాన్ని తుడిచివేసి మళ్లీ రాసే వీలు ఉంటుందని పేర్కొంటున్నారు. గతంలో రిషి సునాక్‌ ఛాన్సలర్‌గా ఉన్న సమయంలో డిస్పోసబుల్‌ పైలట్‌ వి పెన్నులను వినియోగిస్తున్నట్లు తెలుస్తోంది. అయితే ప్రస్తుతం ప్రధాని అయిన తర్వాత కూడా అవే పెన్నులను అధికారిక కార్యక్రమాల్లో ఉపయోగిస్తున్నారని చెబుతున్నారు. 15 రోజుల క్రితం బ్రిటన్ మంత్రివర్గ సమావేశంలో కూడా సునాక్‌ చేతిలో ఇదే రకమైన పెన్ను కన్పించడంతో విమర్శలకు తావిస్తోంది. ఇటీవల మాల్డోవాలో జరిగిన యూరోపియన్‌ పొలిటికల్‌ కమ్యూనిటీ సమావేశంలో అధికారిక పత్రాలపైనా ఇదే పెన్నుతో రిషి సునాక్ సంతకాలు చేశారు. దీంతో ఈ పెన్నుపై తీవ్ర స్థాయిలో ఆందోళనలు వ్యక్తమవుతున్నాయి.

ఈ పెన్నుతో ఏదైనా రాస్తే తర్వాత దాన్ని తుడిచి వేసే సదుపాయం ఉంటుంది. అయితే ఇప్పుడు ఇదే భద్రతాపరంగా అనేక సవాళ్లు తీసుకువస్తాయనే అభిప్రాయాలు వెల్లువెత్తుతున్నాయి. ఈ మేరకు ది గార్డియన్‌ పత్రిక ఓ కథనాన్ని ప్రచురించింది. ఏదైనా తప్పుగా రాస్తే.. దాన్ని ఇంక్‌ ఎరాడికేటర్స్‌తో తొలగించి.. మళ్లీ కొత్తగా రాసే వీలుంటుంది. అయితే ప్రస్తుతం రిషి సునాక్‌ కూడా ఇలాంటి పెన్ను వాడుతున్నారని.. అధికారిక పత్రాల్లో రాసిన అంశాలను ఎవరైనా తొలగించే అవకాశం ఉంటుందని నిపుణులు ఆందోళన వ్యక్తం చేస్తున్నారు. ఇలాంటి పెన్నులు ఉపయోగించడం వల్ల రాజకీయ నాయకులపై ప్రజల్లో విశ్వాసం పోతుందని హెచ్చరికలు జారీ చేస్తున్నారు.

ఈ ఎరేజబుల్ ఇంక్ పెన్నుల విషయంపై బ్రిటన్ ప్రధాని కార్యాలయం అయిన 10 డౌనింగ్‌ స్ట్రీట్‌ వర్గాలు స్పందించాయి. అధికారిక పత్రాలు అన్నింటిని ప్రధాని రిషి సునాక్ తనకు భద్రంగా ఉంచుకుంటారని పేర్కొన్నాయి. ఇలాంటి పెన్నులను సివిల్‌ సర్వీస్‌లో అధికారులు ఎక్కువగా ఉపయోగిస్తారని.. రిషి సునాక్‌ మీడియా కార్యదర్శి వెల్లడించారు. ఇలాంటి పెన్నులతో రాసిన రాతలను.. ప్రధాని రిషి సునాక్ ఎప్పుడూ చెరిపివేసే ప్రయత్నం చేయలేదని.. భవిష్యత్తులో కూడా అలా చేయరని తెలిపారు. మరోవైపు.. బ్రిటన్ రిటైల్‌ మార్కెట్‌లో రిషి సునాక్ వాడే పెన్ను ధర 4.75 పౌండ్లు. అంటే భారత కరెన్సీలో దాదాపు రూ.495 అన్నమాట.