వందకిపైగా దేశాల్లో 3.7 కోట్ల కిలోమీటర్ల ప్రయాణం,,,33 ఏళ్లుగా విమానాల్లో ప్రయాణిస్తున్న వ్యక్తి

ట్రావెలింగ్.. ఈ పేరు వినగానే ఎగిరి గంతేసే వారు చాలా మంది ఉంటారు. అయితే ఉద్యోగాలు, పని ఒత్తిళ్లు, కుటుంబ బాధ్యతలు, ఆర్థిక స్తోమత కారణంగా ఎంతో మంది పర్యాటకాలు చేయడానికి వెనక్కి తగ్గుతుంటారు. కొంతమంది మాత్రం ప్రయాణాలే లక్ష్యంగా సాగుతూనే ఉంటారు. రాష్ట్రాలు, దేశాలు, ఖండాలు దాటి మరీ ట్రావెల్ చేస్తూ ఉంటారు. రోజుల, నెలలు, సంవత్సరాల తరబడి ప్రయాణిస్తూ కొత్త కొత్త ప్రదేశాలను ఆస్వాదిస్తూ ఉంటారు. ఇదే విధంగా ఓ అమెరికాకు చెందిన వ్యక్తి గత 33 ఏళ్లుగా తిరుగుతూనే ఉన్నాడు. తన ప్రయాణాల్లో టామ్ బిల్ ముర్రే, స్టీవ్ టైలర్, జానెట్ జాక్సన్‌లను కలిసే అవకాశాన్ని కూడా పొందాడు.

అమెరికాలోని న్యూజెర్సీకి చెందిన టామ్ స్టుకర్ వయసు ప్రస్తుతం 69 సంవత్సరాలు. టామ్ స్టూకర్ 36 ఏళ్ల వయసులో ఉన్నపుడు 1990 లో తన ప్రయాణాన్ని ప్రారంభించాడు. ఇప్పటి వరకు దాదాపు 23 మిలియన్ మైళ్లు అంటే 3.7 కోట్ల కిలోమీటర్లు ప్రయాణం చేశాడు. దీంతో ప్రపంచంలో ఎవరూ ప్రయాణించనంత దూరాన్ని చుట్టి వచ్చిన ఏకైక వ్యక్తిగా నిలిచాడు. 100 కు పైగా దేశాలలో టామ్ స్టుకర్ పర్యటించాడు. తన భార్యను 120 హనీమూన్‌లకు తీసుకెళ్లినట్లు తెలిపాడు. ప్రపంచ వ్యాప్తంగా నాలుగు ట్రిప్పులు తిరిగినట్లు టామ్ వెల్లడించాడు. ఒక్క ఆస్ట్రేలియాకే 300 కంటే ఎక్కువ సార్లు ప్రయాణించినట్లు చెప్పాడు.

తన సుదీర్ఘ పర్యటనలో విలాసవంతమైన హోటళ్లలో టామ్ స్టుకర్ బస చేశాడు. అత్యాధునిక రెస్టారెంట్లలో ప్రత్యేక విందును స్వీకరించాడు. ఇవే కాకుండా క్రిస్టల్ క్రూయిజ్‌లలో కూడా ప్రయాణం చేశాడు. టామ్ స్టుకర్ కార్ డీలర్‌షిప్ కన్సల్టెంట్‌గా పనిచేసేవాడు. 1984 లో పని మీద ఆస్ట్రేలియాకు టామ్ స్టుకర్ ప్రయాణించాడు. అప్పుడే అతనికి ట్రావెలింగ్ మీద ఆసక్తి కలిగిందని పేర్కొన్నాడు. ఆ పర్యటనలో తనకు ఆస్ట్రేలియా దేశం నచ్చిందని.. అందుకో 300 సార్లు అక్కడికి వెళ్లినట్లు చెప్పాడు. ఎవరైనా కొత్త ప్రదేశాలకు వెళ్లేందుకు సెలవులు తీసుకుంటారని.. కానీ తాను మాత్రం.. కేవలం ప్రయాణించడం కోసమే వెళ్తానని వెల్లడించాడు.

1990 లో యునైటెడ్ ఎయిర్‌లైన్స్ తీసుకువచ్చిన లైఫ్‌టైమ్ పాస్‌ను టామ్ కొనుగోలు చేశాడు. ఈ లైఫ్‌టైమ్ పాస్‌ను టామ్ 2.90 లక్షల అమెరికన్ డాలర్లు అనగా మన కరెన్సీలో రూ. 2 కోట్ల 34 లక్షల 94 వేల 680 తో కొన్నాడు. అయితే ఈ పాస్‌ను కొనుగోలు చేసిన వారు ఏ ఎయిర్‌లైన్స్‌లో అయినా జీవితకాలం ఉచితంగా ప్రయాణించ వచ్చని ఆ కంపెనీ పాలసీలో ఉంటుందని చెప్పాడు. తనకు విమానంలో ఇష్టమైన సీటు 1B అని తెలిపాడు. తన ప్రతీ ప్రయాణంలో అతడు ఈ 1B సీటులో మాత్రమే ప్రయాణం చేసేవాడు. ఈ లైఫ్‌టైమ్ పాస్‌లో కేవలం విమాన ప్రయాణాలే కాకుండా.. లగ్జరీ హోటళ్లు, హై ఫై రెస్టారెంట్లలో ప్రత్యేక ఫుడ్, క్రిస్టల్ క్రూయిజ్‌లలో ప్రయాణాలు వంటివి అదనంగా అందుతాయి. తన ప్రయాణంలో 2019 సంవత్సరం ఎంతో ప్రత్యేకమని.. అదే అత్యుత్తమ ఏడాది అని టామ్ పేర్కొన్నాడు. ఆ ఒక్క ఏడాదిలోనే 373 విమానాల్లో 1.46 మిలియన్ మైళ్ల దూరం అంటే 23 లక్షల 50 వేల కిలోమీటర్లు ప్రయాణించినట్లు వెల్లడించాడు. తాను గత 33 ఏళ్లుగా చేసిన ప్రయాణాలన్నింటికీ డబ్బులు చెల్లిస్తే 2.44 మిలియన్ డాలర్లు అంటే మన కరెన్సీలో రూ. 20 కోట్లకు పైగా ఖర్చయ్యేదని తెలిపాడు.

తన సుదీర్ఘ పర్యటనల గురించి టామ్ స్టుకర్ ఒక ఇంటర్వ్యూలో వెల్లడించాడు. తాను ఈ లైఫ్‌టైమ్ పాస్‌ను ఉపయోగించి 100 కంటే ఎక్కువ దేశాలకు వెళ్లినట్లు తెలిపాడు. నెవార్క్ నుంచి శాన్ ఫ్రాన్సిస్కోకు వెళ్లిన సమయంలో దాదాపు 12 రోజుల పాటూ మంచం మీద పడుకోకుండా ఉన్నట్లు చెప్పాడు. అక్కడి నుంచి బ్యాంకాక్, దుబాయ్ దేశాలకు వెళ్లినట్లు వెల్లడించాడు. కేవలం ఎయిర్‌పోర్ట్ లాంజ్‌లలో ఉంటూనే ప్రపంచవ్యాప్తంగా నాలుగు ట్రిప్పులు తిరిగినట్లు చెప్పాడు. తాను తరచుగా విమానాల్లో ప్రయాణిస్తూనే ఉంటానని టామ్ స్టుకర్ తెలిపాడు. భూమి మీద ఒక వారం కంటే ఎక్కువ ఉండనని.. ఆ వారం రోజుల్లోపు ఏదో ఒకసారి విమానంలో ప్రయాణం చేస్తానని పేర్కొన్నాడు. గాలిలో ఉండటం కంటే నేలపై ఉండటానికే ఎక్కువ భయపడతానని టామ్ స్టుకర్ స్పష్టం చేశాడు.