ద.కొరియాలో రెండు నెలల్లో 27 శాతం పెరిగిన ఉప్పు ధరలు

దక్షిణ కొరియాలో విచిత్రమైన పరిస్థితి నెలకుంది. కొద్ది రోజులుగా ఆ దేశ ప్రజలు ఉప్పు, ఇతర సముద్ర ఉత్పత్తులను భారీగా కొనుగోలు చేసి.. ఇళ్లలో నిల్వ చేసుకుంటున్నారు. దీంతో దుకాణాల్లో ఉప్పు కొరత ఏర్పడుతోంది. ఇలా పెద్ద మొత్తంలో కొనుగోలు చేయడానికి కారణం.. 2011లో ప్రమాదం జరిగిన పుకుషిమా దైచీ న్యూక్లియర్ పవర్ ప్లాంట్ నుంచి జపాన్ ఒక మిలియన్ మెట్రిక్ టన్నులకుపైగా శుద్ధి చేసిన రేడియోధార్మిక జలాలను సముద్రంలోకి విడిచిపెట్టేందుకు సిద్ధంగా ఉన్నట్టు వార్తలు రావడమే. దీంతో ఆరోగ్య భద్రత దృష్ట్యా దక్షిణకొరియా వాసులు ముందు జాగ్రత్త చర్యల్లో భాగంగా ఉప్పు, ఇతర వస్తువుల నిల్వలపై దృష్టి సారించారు.

2011లో జపాన్‌లో వచ్చిన భూకంపం కారణంగా సునామీ సంభవించి ఫుకుషిమా అణుకేంద్రం దెబ్బతిన్న విషయం తెలిసిందే. అప్పటి నుంచి రేడియోధార్మిక జలాలు పెద్ద మొత్తంలో అక్కడ పేరుకుపోయాయి. అణు రియాక్టర్‌ను చల్లబర్చేందుకు వినియోగించనవి, వర్షపునీరు వంటివి ఇందులో ఉన్నాయి. వ్యర్థ జలాలను జపాన్‌ భారీ ట్యాంకుల్లో నిల్వ చేసింది. వీటిని త్వరలోనే సముద్రంలో వదిలేందుకు సిద్ధమైందనే ప్రచారం సాగుతోంది. అత్యాధునిక పద్ధతుల ద్వారా ఈ జలాలను శుద్ధి చేసి, చాలా వరకు రేడియోధార్మిక వ్యర్థాలను తొలగించామని జపాన్‌ చెబుతోంది.

అయితే, దీనిపై సమీప దేశాల తీరప్రాంతవాసుల నుంచి తీవ్ర వ్యతిరేకత వ్యక్తం అవుతోంది. ప్రజారోగ్యానికి ముప్పుతో పాటు సముద్ర పర్యావరణం దెబ్బతింటుందని చైనా మండిపడుతోంది. జపాన్ తీరుపై విమర్శలు గుప్పిస్తోంది. ఈ పరిణామాలతో అప్రమత్తమైన దక్షిణ కొరియా ప్రజలు.. ఉప్పును భారీగా నిల్వ చేసుకుంటున్నారు. దీంతో గత రెండు నెలల్లో దక్షిణ కొరియాలో ఉప్పు ధర దాదాపు 27 శాతం పెరిగింది. ఇది ఇలాగే కొనసాగితే మరింత తీవ్రమవుతుందని భావించిన దక్షిణ కొరియా ప్రభుత్వం అప్రమత్తమైంది. జులై 11 వరకు మార్కెట్ ధరల కంటే 20 శాతం తగ్గింపుతో రోజుకు 50 మెట్రిక్ టన్నుల ఉప్పును అందుబాటులో ఉంచనున్నట్లు తెలిపింది.

ఇదే సమయంలో భవిష్యత్తులో ఉప్పు మడుల్లో రేడియోధార్మికత పెరగకుండా నిఘా ఉంచుతామని దక్షిణ కొరియా మత్స్యశాఖ అధికారులు చెబుతున్నారు. అయితే, ఇప్పటికే ఫుకుషిమా సమీప తీరంలోని సముద్ర ఆహారంపై దక్షిణ కొరియా నిషేధం విధించింది. ఇదిలావుంటే మార్చి 2011లో సునామీ తర్వాత ఫుకుషిమా అణు విద్యుత్ కేంద్రం దెబ్బతినడంతో దాదాపు. 1.25 మిలియన్‌ టన్నుల నీటిని అక్కడి తొట్టెల్లో ఉంచారు. ఇందులో అణు రియాక్టర్‌ను చల్లార్చేందుకు వినియోగించిన జలాలు, వర్షపునీరు వంటివి ఉన్నాయి. అత్యాధునిక అడ్వాన్స్‌డ్‌ లిక్విడ్‌ ప్రాసెసింగ్‌ సిస్టమ్‌ (ఏఎల్‌పీఎస్‌) ద్వారా ఆ నీటిని శుద్ధిచేసి, చాలా వరకు రేడియోధార్మిక వ్యర్థాలను తొలగించారు.