సబ్సిడీపై కేజీ రూ.50కే టమెటా ప్రజలకు అందజేత

సామాన్యులకు ఊరాటకల్పించేలా ఏపీ  సర్కార్ నిర్ణయం తీసుకొంది. ఇదిలావుంటే తెలుగు రాష్ట్రాల్లో కూరగాయల ధరలు భారీగా పెరిగాయి. టమాటా ధర కొండెక్కుతుండగా.. పచ్చి మిర్చి ధర ఘాటెక్కిస్తోంది. టమాటా ధర కేజీ రూ.100 దాటగా.. పచ్చిమిర్చి కేజీ రూ.150 దాటింది. అలాగే రెండు కట్టల ఆకు కూరల ధర రూ.20 దాటింది. ఇక బీరకాయ, బెండకాయ ధరలు కూగా పెరుగుతున్నారు. బీరకాయ, బెండకాయలు కేజీ రూ.50 నుంచి రూ.80 వరకు పలుకుతున్నాయి.

నిత్యావసర కూరగాయల ధరలు పెరుగుతుండటంతో.. ఏపీ ప్రభుత్వం కీలక నిర్ణయం తీసుకుంది. టమాటాను రైతు బజార్లలో సబ్సిడీపై అందిస్తోంది. రాయితీపై రూ.50కే కిలో టమాటా అందిస్తున్నారు. ఇందుకోసం ఆధార్ కార్డు చూపించాల్సి ఉంటుంది. నేటి నుంచే రాష్ట్రంలోని అన్ని రైతు బజార్లలో ప్రజలకు రాయితీపై టమాటాలు అందిస్తున్నారు. బహిరంగ మార్కెట్‌లో కంటే తక్కువ ధరకు సబ్సిడీపై అందిస్తుండటంతో.. ప్రజలు క్యూ కడుతున్నారు. దీంతో రైతు బజార్లు కస్టమర్లతో కిక్కిరిసిపోతున్నాయి.

బహిరంగ మార్కెట్‌లో కిలో టామాటా రూ.150కి విక్రయిస్తుండటంతో.. సామాన్య, మధ్యతరగతి ప్రజలు కొనడం మానేశారు. ప్రభుత్వం సబ్సిడీ ధరలకు అందిస్తుండటంతో టమాటా ధరల నుంచి ప్రజలకు కాస్త ఉపశమనం లభించింది. మార్కెట్ ఇంటర్‌వెన్షన్ స్కీమ్ కింద రైతుల నుంచి టమాటాలు సేకరిస్తున్నారు. వీటిని సబ్సిడీపై వినియోగదారులకు అందిస్తున్నారు. అలాగే కృత్రిమ కొరత సృష్టించే వ్యాపారులపై అధికారులు నిఘా పెట్టారు.

కృతిమ కొరత సృష్టిస్తే కఠిన చర్యలు తీసుకుంటామని, కేసులు నమోదు చేస్తామని వ్యాపారులను హెచ్చరిస్తున్నారు. అలాగే సీఎం యాప్ ద్వారా కూరగాయల ధరలను సమీక్షిస్తూ కూరగాయల ధరల నియంత్రణకు చర్యలు తీసుకుంటున్నారు. ఏపీలో కేజీ టమాటా రూ.100 దాటగా.. తెలంగాణలో రూ.130 వరకు చేరుకుంది. ఢిల్లీ, ముంబై, బెంగళూరు, కాన్పూర్‌లో రూ.80 నుంచి రూ.100కు అమ్ముతున్నారు. యూపీలోని కాన్పూర్‌లో రూ.150కి చేరుకోవచ్చనే అంచనాలు ఉన్నాయి. ఈ ఏడాది ఏప్రిల్, మే నెలల్లో అకాల వర్షాలు, వడగాళ్ల వాన, వేసవిలో అధిక ఉష్ణోగ్రతలకు టమాటా పంటకు భారీ నష్టం ఏర్పడింది.

టమాటా పంటకు తెగుళ్లు, చీడపీడలు కూడా రావడంతో పంట దిగుబడి సగానికి పడిపోయింది. అలాగే సకాలంలో మార్కెట్‌కు తరలించేందుకు వాహనాలు కూడా అందుబాటులో ఉండటం లేదు. ధరలు పెరగడానికి ఇవే కారణాలుగా మార్కెట్ వర్గాలు చెబుతున్నాయి. మరో నెల పాటు ధరలు ఇలాగే కొనసాగే అవకాశముందని చెబుతున్నారు. కేంద్ర ప్రభుత్వం కూడా ధరల పెరుగుదలపై దృష్టి పెట్టింది. ఉత్పత్తి కేంద్రాల నుంచి సరఫరా పెరిగిందని, మరో 15 రోజుల్లో టమాటా ధర తగ్గే అవకాశముందని ఇటీవల స్పష్టం చేసింది.