నెల్లూరు నారాయణ మెడికల్ కళాశాలలో ,,,చైతన్య అనే వైద్య విద్యార్థిని ఆత్మహత్య

ఇటీవల మెడికోల ఆత్మహత్యలు తెలుగు రాష్ట్రాలను విస్మయానికి గురిచేస్తున్నాయి. ఈ క్రమంలోనే నెల్లూరు జిల్లాలో విషాదకర ఘటన చోటుచేసుకుంది. మెడిసిన్ చదువుతున్న చైతన్య (24) అనే విద్యార్థిని ఆత్మహత్య చేసుకుంది. హాస్టల్ గదిలో ఉరేసుకొని ఆత్మహత్యకు పాల్పడింది. పోలీసులు తెలిపిన వివరాల ప్రకారం.. శ్రీకాకుళం జిల్లా పలాసకు చెందిన చైతన్య నెల్లూరులోని నారాయణ మెడికల్‌ కాలేజీలో ఉంటూ హౌస్ సర్జన్‌గా పనిచేస్తోంది. ఆదివారం ఉదయం కళాశాల హాస్టల్ గదిలో చైతన్య విగతజీవిగా కనిపించింది. తోటి మెడికల్ విద్యార్థులు హాస్టల్ సిబ్బందికి సమాచారమివ్వగా వారు వెంటనే పోలీసులకు ఫోన్ చేసి విషయం చెప్పారు. హాస్టల్‌కు చేరుకున్న పోలీసులు చైతన్య మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. అనంతరం కుటుంబ సభ్యులకు సమాచారం అందించారు.

ఆమె మృతికి కుటుంబ కలహాలే కారణమని పోలీసులు భావిస్తున్నారు. రెండు నెలల క్రితం చైతన్యకు వివాహం కాగా.. పెళ్లి తర్వాత కుటుంబ కలహాలు మెుదలైనట్లు తెలిసింది. భర్తతో తాను వేగలేకపోతున్నానని చైతన్య తరచూ తల్లితో చెప్పేదని తెలిసింది. గత రాత్రి తన తల్లి, భర్తతో ఆమె చివరి ఫోన్ కాల్స్ చేసినట్లు తెలిసింది. భర్తతో మాట్లాడిన తర్వాత... తల్లికి కాల్ చేసి హాస్టల్ గదిలోకి వెళ్లి సూసైడ్ చేసుకుందని తెలిసింది. ఘటనపై కేసు నమోదు చేసిన పోలీసులు.. దర్యాప్తు చేస్తున్నారు. చైతన్యకు ఆమె భర్తతో ఏమైనా గొడవలు జరిగాయా ? లేక కాలేజీలో వేధింపులు ఉన్నాయా ? ఇతర కారణాలేమైనా ఉన్నాయా ? అనే కోణంలో పోలీసులు ఆరా తీస్తున్నారు.

మరోవైపు ఆమె ఆత్మహత్యకు కారణం భర్త వేధింపులేనని చైతన్య మేనమామ శ్రీరామ్ ఆరోపించారు. చైతన్య తండ్రి తన చిన్నతనంలో ఆర్మీలో చనిపోగా.. అమ్మమ్మ ఇంట్లో పెరిగిందని చెప్పారు. ఎంతో కష్టపడి చదువుకుంటూ ఈ స్థాయికి వచ్చిందన్నారు. ఈ ఏడాది మార్చి 8న అడిగినంత కట్నకానుకలు ఇచ్చి చైతన్యకు పెళ్లి చేశామని పెళ్లిచేశామన్నారు. అయితే పెళ్లి తర్వాత భర్తలు అసలు నిజస్వరూపం బయటపడిందన్నారు. అప్పటి నుంచి చైతన్య తీవ్రమనస్తాపానికి గురైందని భర్త వేధింపుల వల్లే చనిపోయిందని మేనమామ శ్రీరామ్ ఆరోపించారు.