అప్పన్న స్వామి గిరి ప్రదక్షిణలో,,,మూడు నుంచి నాలుగు లక్షల మంది భక్తులు పాల్గొనే అవకాశం

సింహాచలంలో నేటి నుంచి ప్రారంభమయ్యే అప్పన్న స్వామి గిరి ప్రదక్షిణలో మూడు నుంచి నాలుగు లక్షల మంది భక్తులు పాల్గొనే అవకాశం ఉందని అధికార యంత్రాంగం భావిస్తోంది. ఆషాడశుద్ధ చతుర్దశి నాడు గిరి ప్రదక్షిణ ప్రారంభించి పౌర్ణమి ఘడియలతో ముగింపు చేయడం ఆనవాయితీ. ఈ క్రమంలో ఆదివారం మధ్యాహ్నం 2 గంటలకు తొలి పావంచా నుంచి లాంఛనంగా గిరి ప్రదక్షిణ ప్రారంభం కానుందని అధికారులు తెలిపారు. ఆలయ అనువంశిక ధర్మకర్త పూసపాటి అశోక్‌ గజపతి రాజు గిరి ప్రదక్షిణ కోసం స్వామి వారి పుష్కర రథానికి పూజలు చేసి ప్రారంభించనున్నారు.

32 కిలో మీటర్ల ఈ ప్రదక్షిణ ముగిసేందుకు కనీస సమయం 6 గంటలు పట్టే అవకాశం ఉందని అధికారులు తెలిపారు. గరిష్టం 10 గంటలకు పై మాటే అని పేర్కొన్నారు. సాధారణంగా పౌర్ణమి నాడు నిండు చందమామను పోలిన స్వామి పరిపూర్ణ రూపాన్ని దర్శించుకుని మనసులోని కోర్కెను తీర్చాలని వేడుకుంటారు.

మరోవైపు గిరి ప్రదక్షిణ చేసే భక్తులకు పెద్ద ఎత్తున అల్పాహారాలు అందించేందుకు వివిధ స్వచ్ఛంద సంస్థలు, ధార్మిక సంస్థలు, యువజన సంఘాలు, వ్యాపార, వాణిజ్య సంస్థలు సిద్ధమయ్యాయి. సింగిల్‌ యూజ్‌ ప్లాస్టిక్‌ లేకుండా ఎక్కడికక్కడ మంచి నీటిని అందించేందుకే జీవీఎంసీ ఏర్పాట్లు చేసింది. పలు చోట్ల వైద్య శిబిరాలు ఏర్పాటు చేసి, అంబులెన్స్‌లు సిద్ధంగా ఉంచారు.

మరోవైపు గిరి ప్రదక్షిణ ఏర్పాట్లను శనివారం విశాఖపట్నం జిల్లా కలెక్టర్‌ డాక్టర్‌ మల్లిఖార్జున పరిశీలించారు. లుంబినీ పార్కు, వెంకోజీ పాలెం, మాధవధార ప్రాంతాలను పరిశీలించి అక్కడ చేయాల్సిన ఏర్పాట్లపై అధికారులకు సూచనలు చేశారు. భక్తులకు ఎలాంటి లోటుపాట్లు లేకుండా ఎక్కడికక్కడ సదుపాయాలు కల్పించాలని ఆదేశాలు జారీ చేశారు.

ఇదిలావుంటే సింహగిరి ప్రదక్షిణను ఆషాడ శుద్ధ చతుర్దశి నాడు భక్తులు కొండ దిగువన తొలి పావంచా నుంచి ప్రారంభించడం ఆనవాయితీగా వస్తోంది. ఇక్కడ స్వామి వారి పాదాల చెంత కొబ్బరికాయ కొట్టి పరిక్రమణకు శ్రీకారం చుడతారు. తొలి పావంచా నుంచి పాత అడివివరం, పైనాపిల్‌ కాలనీ, కృష్ణాపురం, ముడసర్లోవ, హనుమంతువాక, విశాలాక్షి నగర్‌, అప్పుఘర్‌, వెంకోజీపాలెం, సీతమ్మధార, నరసింహనగర్‌, మాధవధార, ఎన్‌ఏడీ కూడలి, గోపాలపట్నం బంకు, ప్రహ్లాదపురం మీదుగా తిరిగి తొలిపావంచా వద్దకు చేరుకుంటారు. అక్కడి నుంచి మెట్లమార్గం గుండా సింహగిరి చేరుకుని స్వామిని దర్శించుకుంటారు. పౌర్ణమి నాడు స్వామి వారి దర్శనంతో మహా పాదయాత్ర పరిసమాప్తమవుతుంది.