సీఎం జగన్‌కు హరిరామ జోగయ్య మరో లేఖ

ఏపీ ముఖ్యమంత్రి వైఎస్ జగన్‌ కు మాజీ ఎంపీ, కాపు సంక్షేమ సేన అధ్యక్షుడు చేగొండి హరిరామ జోగయ్య వరుసగా లేఖలు రాస్తున్నారు. ఈ  క్రమంలోనే ఆయన తాగా మరో లేఖ రాశారు. 'మీ నాన్నగారితో నాకు సన్నిహిత సంబంధం ఉండేది. మొదట్లో ఆయనను విమర్శించినా.. ఆ తర్వాత ఆయన అభిమానిగా మారాను. ప్రతిపక్ష నాయకుల పట్ల ఆయన అప్పడప్పుడు చేస్తుండే విమర్శనాస్త్రాలు ఎంత హుందాగా ఉండేవో ప్రజలందరికి తెలిసినవే. ముఖ్యమంత్రిగా ఆయన హుందాతనంలో 10వ వంతు కూడా మీకు లేవని అనిపిస్తోంది. ముఖ్యమంత్రిగా మీ ప్రవర్తన చూస్తుంటే చాలా బాధగా ఉంది' అన్నారు.

ప్రజల ఆరాధ్య నాయకుడైన పవన్ కళ్యాణ్ విషయంలో జగన్ చేస్తున్న వ్యక్తిగత విమర్శలు విన్న తర్వాత.. ఏపీ సీఎంను సినిమాల్లోని విలన్‌ పాత్రధారిగా వర్ణించబోవచ్చేమో అనిపిస్తోందన్నారు. చట్టపరంగా ఆయన ఎన్ని పెళ్లిళ్లు చేసుకొంటే ప్రజలకు లేని అభ్యంతరం జగన్‌కు ఎందుకన్నారు. ఏ కారణం చేతనైనా.. చట్టపరంగా విడిపోయి.. చట్టపరంగానే మరో పెళ్లి చేసుకుంటే చట్టపరంగా తప్పేంటని ప్రశ్నించారు. పవన్ కళ్యాణ్‌పై బురద చల్లడానికి ఇతర కారణాలేవీ లేక ఇలాంటి చవకబారు విమర్శలతో లబ్ధిపొందాలని చూస్తున్నట్లుగా అనిపిస్తోందన్నారు.

మరోసారి చవకబారు విమర్శలు చేయకుండా.. నోరు జాగ్రక్త పెట్టుకుంటే మంచిది అన్నారు. మాట్లాడితే పవన్‌ కళ్యాణ్‌ను చంద్రబాబుకి దత్తపుత్రుడు.. ప్యాకేజ్‌ అంటూ విమర్శిస్తూ ఉంటారని.. జగన్ తెలంగాణ ముఖ్యమంత్రి కేసీఆర్‌కి దత్తపుత్రుడుగా.. 2019 ఎన్నికలలో ఓటర్లను కొనుక్కునే నిమిత్తం.. కోట్లాది రూపాయలను ప్యాకేజ్ తీసుకొని ఆంధ్రప్రదేశ్‌ని తెలంగాణకు తాకట్టు పెట్టలేదా అని ప్రశ్నించాల్సి వస్తోందన్నారు. 'మీ ఈ చర్యకు మీరు ఓట్లకు నోట్లను ఇవ్వచూపిన ఓటర్లే ఇందుకు సాక్షులు కాదా?' అని ప్రశ్నించారు.

'మీ తాత రాజారెడ్డి దగ్గర నుంచి మీ వరకు మీ కుటుంబం అందరికి దోచుకోవటం, దాచుకోవటం అలవాటే కదా.. కాదని చెప్పగల దమ్ముందా మీకు, లేక మీ అందరి అవినీతి చిట్టా అంతా మరోసారి ప్రజల ముందుకు తీసుకురమ్మంటారా' అన్నారు. ఇకపై ప్రతిపక్ష నాయకులపై, ముఖ్యంగా పవన్ కళ్యాణ్‌పై అనవసరమైన దుర్భాషలాడటం మానుకుంటే మంచిదన్నారు. ఒకటి అని నాలుగు అనిపించుకోవడం ఏ సలహాదారు నేర్పారని.. ఇలాంటి వ్యాఖ్యలతో 'మీతో మాట్లాడించి మిమ్మల్ని ముంచడానికే అనిపిస్తుంది' అన్నారు. మంచిగా మాట్లాడి.. మంచి రోజులు తెచ్చుకోవడానికి ప్రయత్నం చేసుకోవాలన్నారు. మీపై ఈ అభియోగాలు మోపాల్సిన పరిస్థితి ఏర్పడినందుకు బాధగా ఉంది' అన్నారు. అయినా ఇది ప్రజాభిప్రాయం కనుక తప్పనిసరి పరిస్థితి అయ్యిందన్నారు. అధికార పక్ష నేతైనా, ప్రతిపక్ష నేతైనా.. తనకు ఉన్నది ఉన్నట్లు మాట్లాడటం అలవాటన్నారు. తప్పు ఎవరిదైనా వాళ్ల ముఖం మీదే కుండబద్దలు కొట్టడం తన నైజం అన్నారు.. చివర్లో Sorry చెప్పారు.