ఈ నెలలోనే ప్రకాశంలో పర్యటించనున్న లోకేష్
Andhra Pradesh Telugu | Suryaa Desk | Published : Wed, Jul 05, 2023, 05:36 PM
తెలుగుదేశం పార్టీ జాతీయ ప్రధాన కార్యదర్శి నారా లోకేష్ రాష్ట్రంలో నిర్వహిస్తున్న యువగళం పాదయాత్ర ప్రకాశం జిల్లాలో ఈనెల 13వ తేదీ నుంచి ప్రారంభమయ్యే అవకాశం ఉంది. ప్రస్తుతం నెల్లూరు జిల్లాలో కొనసాగుతున్న ఆయన పాదయాత్ర 12వ తేదీ సాయంత్రంతో ముగియనుంది. దీంతో 13వ తేదీ మధ్యాహ్నం తర్వాత ఏదైనా ప్రతికూల వాతావరణ పరిస్థితులు ఎదురైతే ఆ తర్వాత రోజు జిల్లాలో పర్యటన మొదలవుతుంది. ఉమ్మడి ప్రకాశం జిల్లా టీడీపీ ఎమ్మెల్యేలు, ఇన్‌చార్జిలు ఐక్యంగా ముందడుగు వేస్తూ యువగళం యాత్రలో పలు ప్రాంతాల్లో పాల్గొన్న విషయం విదితమే. అందులోభాగంగా మంగళవారం సాయంత్రం నెల్లూరులో జరుగుతున్న పాదయాత్రకు వారంతా తరలివెళ్లారు. ముందుగా ఉదయం తిరుమల వెళ్లి వెంకటేశ్వర స్వామిని దర్శించుకుని ఉమ్మడి ప్రకాశం జిల్లాలో జరగనున్న యువగళం పాదయాత్ర జయప్రదం కావాలని పూజలు చేశారు. అనంతరం నెల్లూరు చేరి కాలికి గాయంతో విశ్రాంతి తీసుకుంటున్న పార్టీ రాష్ట్ర ప్రధాన కార్యదర్శి బీద రవిచంద్రను పరామర్శించారు.
|
|