ఫూటుగా తాగిన డ్రైవర్.. మహారాష్ట్ర బస్సు ప్రమాదంలో సంచలనం వెలుగులోకి

అర్ధరాత్రి 25 మంది సజీవదహనమైన మహారాష్ట్ర బస్సు ప్రమాదం ఘటనలో సంచలన విషయం వెలుగులోకి వచ్చింది. ప్రమాద సమయంలో బస్సు డ్రైవర్ ఫూటుగా తాగి ఉన్నట్లు తేలింది. అతడి రక్త నమూనాల్లో ఆల్కహాల్ శాతం సాధారణం కంటే ఏకంగా 30 శాతం అధికంగా ఉంది. పైగా, దుర్ఘటన జరిగిన 12 గంటల తర్వాత డ్రైవర్ నుంచి నమూనాలు సేకరించారు. టైర్ పేలడం వల్లే ఈ ప్రమాదం జరిగిదంటూ డ్రైవర్ చెప్పిన విషయాన్ని అధికారులు ఇప్పటికే ఖండించిన సంగతి తెలిసిందే.

మహారాష్ట్రలోని బుల్దానా జిల్లాలో 25 మంది ప్రయాణికులను బలి తీసుకున్న ఘోర బస్సు ప్రమాదానికి సంబంధించి సంచలన విషయం వెలుగులోకి వచ్చింది. ప్రమాద సమయంలో బస్సు డ్రైవర్ మద్యం సేవించి ఉన్నట్లు ఫోరెన్సిక్ నివేదికల్లో తేలింది. మద్యం తాగి, నిద్ర మత్తులో తూగడం వల్లే బస్సు అదుపుతప్పి డివైడర్‌ను, స్తంభాన్ని ఢీకొట్టి బోల్తా పడిందని అధికారులు తెలిపారు. బోల్తా పడటానికి ముందు బస్సు చక్రాల యాక్సెల్ విరిగిపోయి బస్సు కింది భాగం రోడ్డుకు రాసుకుపోవడంతో నిప్పు రవ్వలు చెలరేగి డీజిల్ ట్యాంక్‌కు మంటలు అంటుకొని క్షణాల్లో బస్సు దగ్ధమైంది. ప్రయాణికులకు తప్పించుకునేందుకు అవకాశమే లేకుండా పోయింది. టైర్ పేలిపోవడం వల్లే ఈ ఘటన జరిగిందని ప్రమాదం తర్వాత బస్సు డ్రైవర్ షేక్ దనిష్ చెప్పాడు. అయితే, అది వాస్తవం కాదని.. టైర్ పేలిపోలేదని పోలీసులు ఆ మరుసటి రోజే తేల్చి చెప్పారు.

నాగ్‌పూర్ నుంచి పుణే వెళ్తున్న ప్రైవేట్ ట్రావెల్స్ స్లీపర్ బస్సులో శనివారం (జూలై 1) అర్ధరాత్రి ప్రయాణికులందరూ గాఢ నిద్రలో ఉండగా ఈ దుర్ఘటన జరిగింది. ప్రమాద సమయంలో బస్సులో 33 మంది ఉండగా.. డ్రైవర్, క్లీనర్ సహా 8 మంది మాత్రమే తప్పించుకోగలిగారు. డ్రైవర్ షేక్ దనిష్ రక్త నమూనాల్లో మోతాదు కంటే 30% అధికంగా మద్యం ఆనవాళ్లు ఉన్నాయని ఫోరెన్సిక్ ల్యాబ్ నివేదికలో పేర్కొన్నారు. మరొక ముఖ్యమైన అంశం ఏమిటంటే.. ప్రమాదం జరిగిన 12 గంటల తర్వాత డ్రైవర్ నుంచి రక్త నమూనాలను సేకరించారు. అప్పటికి ఆల్కహాల్ ప్రభావం బాగా తగ్గి ఉంటుంది. అంటే, ప్రమాద సమయంలో అతడు ఎంతగా తాగి ఉన్నాడో ఊహించుకోవచ్చు. అంత ఆల్కహాల్ సేవించి డ్రైవింగ్ చేయడం చాలా ప్రమాదకరమని, అందుకే నిద్రమత్తులోకి జారుకొని ఉంటాడని బుల్దానా ఎస్పీ సునీల్ ఖడాన్సే అన్నారు.

ఈ ఘోర బస్సు ప్రమాదంలో 25 మంది ప్రయాణికులు గుర్తు పట్టడానికి వీల్లేకుండా సజీవదహనమయ్యారు. వీరిలో 23 మృతదేహాలకు డీఎన్‌ఏ పరీక్షలను పూర్తి చేసినట్లు అధికారులు తెలిపారు. ఆ నివేదికల ఆధారంగా మృతదేహాలను వారి బంధువులకు అప్పగించారు. మరో రెండు మృతదేహాలకు సంబంధించిన DNA రిపోర్టులు రావాల్సి ఉందని చెప్పారు.

మరోవైపు.. ప్రమాదానికి కారణమైన ఈ బస్సుపై 25 చలాన్లు ఉన్నట్లు పోలీసులు తెలిపారు. వీటిలో 6 చలాన్లను క్లియర్ చేయగా.. ఇంకా 19 చలాన్లు పెండింగ్ ఉన్నట్లు వెల్లడించారు. ప్రమాదం జరిగిన రోజు ఈ బస్సును నాగ్‌పూర్ నుంచి కరంజా వరకు డ్రైవర్ అర్వింద్ నడపగా.. కరంజా నుంచి షేక్ దనిష్ డ్రైవింగ్ చేసినట్లు అధికారులు తెలిపారు. రాత్రి 11 గంటల సమయంలో ఈ బస్సు సమృద్ధి మహామార్గ్ ఎక్స్‌ప్రెస్ వే పైకి చేరుకుంది. అంతకుముందే విరామ సమయంలో డ్రైవర్ షేక్.. మద్యం సేవించి ఉంటాడని అధికారులు భావిస్తున్నారు. అర్ధరాత్రి 1.32 గంటల సమయంలో బస్సు ప్రమాదానికి గురైంది. మరో 152 కి.మీ. ప్రయాణిస్తే గమ్యం చేరుకుంటారనగా.. ఘోర విషాదం చోటు చేసుకుంది. 25 మంది మృతికి కారణమైన డ్రైవర్ షేక్ దనిష్‌కు 10 ఏళ్ల కఠిన కారాగార శిక్ష, జరిమానా విధించే అవకాశం ఉందని న్యాయ నిపుణులు చెబుతున్నారు.